Sekretari amerikan i Shtetit, Marco Rubio, ka deklaruar se ende nuk është e qartë nëse lufta në Ukrainë mund të përfundojë përmes negociatave, ndërsa Uashingtoni po vazhdon përpjekjet për të vlerësuar mundësinë e një zgjidhjeje diplomatike.
Në përfundim të takimit dyditor të ministrave të Jashtëm të G20-ës në Atlanta, më 31 tetor, Rubio tha se nuk ka arsye të pretendohet se palët janë pranë një marrëveshjeje.
“Nuk e di nëse paqja përmes negociatave është e arritshme në Ukrainë. Këtë po përpiqemi ta zbulojmë”, deklaroi ai në përgjigje të një pyetjeje të Radios Evropa e Lirë.
Rubio shtoi se të dërguarit e presidentit Donald Trump, përfshirë Jared Kushnerin dhe Steve Witkoffin, po angazhohen intensivisht për çështjet e Ukrainës dhe Iranit. Megjithatë, ai sqaroi se negociatat për përfundimin e luftës nuk ishin diskutuar gjatë takimit në Atlanta.
Sipas tre zyrtarëve evropianë që folën për Radion Evropa e Lirë në kushte anonimiteti, Rubio u kishte shprehur edhe privatisht homologëve perëndimorë dyshime për arritjen e një marrëveshjeje paqeje në muajt e ardhshëm.
E paqartë pjesëmarrja e Putinit në samitin e G20-ës
Sekretari amerikan i Shtetit tha se Moska ende nuk e ka konfirmuar nëse presidenti rus, Vladimir Putin, do të marrë pjesë në samitin e G20-ës, të planifikuar për dhjetor në Majami.
Zyrtarët evropianë thanë se Rubio kishte shprehur privatisht dyshime edhe për pranimin e kësaj ftese nga Putini.
Megjithatë, ai mbrojti nevojën për kontakte diplomatike me Rusinë, duke argumentuar se një marrëveshje kërkon komunikim me të dyja palët. Sipas Rubios, takimet me udhëheqës të huaj nuk nënkuptojnë miratim të veprimeve të tyre.
Ai përmendi gjithashtu arsenalin bërthamor rus si arsye për ruajtjen e kanaleve të komunikimit mes Uashingtonit dhe Moskës, me qëllim shmangien e përshkallëzimit.
Për kontaktet me ministrin e Jashtëm rus, Sergei Lavrov, Rubio sqaroi se në Atlanta nuk kishin zhvilluar takim zyrtar, por vetëm një bisedë të shkurtër mbi mundësinë e një takimi të udhëheqësve të tyre gjatë samitit të APEC-ut.
Sipas zyrtarëve perëndimorë, Rubio kishte vlerësuar privatisht se anëtarësimi i Ukrainës në NATO është jorealist në një të ardhme të afërt. Ai gjithashtu kishte paralajmëruar se kontrolli i plotë i Donbasit nuk do t’i shuante ambiciet territoriale të Rusisë.
Departamenti amerikan i Shtetit nuk iu përgjigj menjëherë kërkesës për koment mbi deklaratat private që i atribuohen Rubios.
Përpjekje për armëpushim në Detin e Zi
Pavarësisht rezervave për një marrëveshje gjithëpërfshirëse, Rubio tha se SHBA-ja po shqyrton mundësinë e një armëpushimi në Detin e Zi, për të mbrojtur transportin detar.
Ai bëri të ditur se Uashingtoni po vlerëson propozimet e Turqisë, ndërsa edhe India ka shprehur interesim për të kontribuar me ide.
Sipas tij, një marrëveshje e tillë nuk do t’i jepte fund luftës, por do të ndihmonte në zgjidhjen e një pjese të pasojave të saj. Rubio paralajmëroi se pengesat në transportin e drithërave dhe energjisë po rrezikojnë veçanërisht vendet që varen nga importet ushqimore.
Siguria e lundrimit në Detin e Zi ishte temë diskutimi edhe mes presidentit ukrainas, Volodymyr Zelensky, dhe presidentit turk, Recep Tayyip Erdogan, gjatë takimit të tyre më 31 tetor në Stamboll.
Përplasje mes delegacioneve evropiane dhe Rusisë
Takimi në Atlanta u shoqërua me tensione mes përfaqësuesve evropianë dhe Lavrovit. Refuzimi i disa delegacioneve për të marrë pjesë në fotografinë tradicionale të përbashkët çoi në anulimin e saj.
Përfaqësuesja e lartë e BE-së për Politikë të Jashtme, Kaja Kallas, e akuzoi Lavrovin për paraqitjen e narrativave të rreme mbi luftën dhe tha se sulmet e vazhdueshme ruse nuk dëshmojnë gatishmëri për paqe.
Lavrov, nga ana tjetër, kritikoi qëndrimin e evropianëve dhe përshëndeti gatishmërinë e administratës Trump për dialog me Moskën.
Rubio ritheksoi se Uashingtoni do të vazhdojë të shqyrtojë mundësitë për zgjidhje diplomatike të luftës, të cilën e cilësoi shkatërruese për të dyja vendet.
Burimi: Dukagjini