Hyrja e një qerpiku në sy është një shqetësim i zakonshëm që mund të shkaktojë kruajtje, acarim dhe ndjesinë sikur keni rërë në sy.
Megjithëse zakonisht nuk përbën rrezik, përpjekjet e gabuara për ta larguar mund të shkaktojnë dëmtime.
Optometristi Robert Engel, për Cleveland Clinic, ka shpjeguar mënyrat më të sigurta për të hequr një qerpik nga syri pa shkaktuar probleme të tjera.
Sipas tij, hapi i parë është larja e duarve dhe heqja e lenteve të kontaktit, nëse i përdorni. Më pas, mund të provoni të pulitni sytë disa herë, pasi lotët natyralë shpesh ndihmojnë në largimin e qerpikut.
Nëse kjo nuk funksionon, rekomandohet shpëlarja e syrit me tretësirë fiziologjike, lot artificialë ose ujë të pastër e të vakët.
Në rast se qerpiku ndodhet mbi sipërfaqen e syrit, duhet shmangur prekja ose përpjekja për ta kapur me objekte.
Eksperti paralajmëron se nuk duhet të përdorni thonjtë, piskatoren apo mjete të tjera për ta hequr qerpikun, pasi mund të gërvishtni sipërfaqen e syrit. Gjithashtu, duhet shmangur fërkimi i syve.
Një tjetër shqetësim i zakonshëm është frika se qerpiku mund të kalojë pas syrit dhe të mbetet aty.
Megjithatë, Engel sqaron se kjo nuk është e mundur, pasi konjuktiva, membrana që mbulon pjesën e përparme të syrit dhe pjesën e brendshme të qepallave, pengon kalimin e trupave të huaj pas syrit.
Në shumicën e rasteve, qerpiku largohet vetë përmes lotëve ose shpëlarjes. Megjithatë, nëse shfaqen dhimbje, skuqje e vazhdueshme, sekrecione apo turbullim i shikimit, duhet të kërkoni ndihmë mjekësore.
Eksperti thekson se rënia e herëpashershme e qerpikëve është normale, por nëse kjo ndodh shpesh, rekomandohet kontrolli te mjeku për të identifikuar shkakun. /Telegrafi/