Kryeministri i Malit të Zi, Milojko Spajiq, deklaroi të shtunën se zhvillimet e fundit në vend dhe në rajon konfirmojnë seriozitetin e informacioneve që zotërojnë shërbimet e sigurisë vendase dhe ato partnere, lidhur me mundësinë e veprimtarive hibride.
Këto komente pasuan një kërkesë nga lëvizja e tij, “Evropa Tani” (PES), që parlamenti të shqyrtojë lidhjet midis transmetuesve televizivë kombëtarë dhe “M-tel” (në pronësi shumicë të kompanisë serbe “Telekom Srbija”), si dhe “Alta Bank” e “Alta Pay Group” (të lidhura me biznesmenin serb Davor Macura), shkruajnë mediat e huaja, përcjell Telegrafi.
Në një postim në platformën X, Spajiq theksoi se proceset aktuale “konfirmojnë seriozitetin dhe cilësinë e informacioneve që kanë në dispozicion shërbimet tona të sigurisë dhe ato partnere – për të cilat kisha paralajmëruar që në fund të muajit gusht”.
Ai shtoi se pret që institucionet, duke u bazuar në fakte, të përcaktojnë “se kush i ka mbrojtur vërtet interesat shtetërore dhe kush, duke u mbështetur në qendra joformale pushteti nga shtete të tjera dhe duke përdorur mekanizma të paautorizuar, është përpjekur të minojë stabilitetin e Malit të Zi dhe të ndalë rrugëtimin e tij drejt Bashkimit Evropian”.
Më 27 gusht, Spajiq njoftoi se qeveria dispononte informacione serioze të sigurisë operacionale, të cilat tregonin se mbyllja e kapitujve të rinj të negociatave me BE-në mund të shoqërohej nga një veprim hibrid i koordinuar, në të cilin përfshihen zyrtarë nga të paktën dy shtete të rajonit.
Në atë kohë, ai nuk i përmendi shtetet, por theksoi se pritej mbështetje nga aktorë të caktuar politikë dhe nga pjesë të skenës mediatike malazeze.
Grupi parlamentar i PES-it ka paraqitur një nismë për një seancë dëgjimore kontrolluese pranë Komisionit për Siguri dhe Mbrojtje të Kuvendit, lidhur me ndikimin e mundshëm hibrid të huaj në hapësirën mediatike dhe politike të Malit të Zi.
Dhe sipas mediave, shqyrtimi i propozuar do të përfshinte marrëdhëniet financiare, të pronësisë dhe të biznesit të televizioneve me mbulim kombëtar me kompanitë M-tel, Alta Bank, Alta Pay Group dhe subjekte të tjera të lidhura, si dhe çdo lidhje që mund të sugjerojë ndikim të organizuar politik nga jashtë.
Sipas nismës, qëllimi është të përcaktohet nëse kanalet financiare, të telekomunikacionit dhe ato mediatike janë përdorur për të ndikuar në opinionin publik, në politikën editoriale dhe në proceset demokratike, si dhe nëse ekzistojnë rreziqe sigurie për Malin e Zi.
PES-i propozon që komisioni të zhvillojë një seancë dëgjimore kontrolluese me përfaqësues të institucioneve kompetente të sigurisë dhe shtetërore, të kërkojë të dhëna përkatëse mbi këto lidhje, të shqyrtojë përfshirjen e komisioneve për arsim/kulturë dhe ekonomi/financë, si dhe të kërkojë një vlerësim mbi elementet e mundshme të ndikimit hibrid të huaj.
Nisma nuk paraqet prova se një ndikim i tillë ka ndodhur; ajo u kërkon institucioneve kompetente që të kryejnë hetime.
Siç bëhet e ditur më tej, M-tel operon në Malin e Zi që nga viti 2007 dhe është një nga operatorët më të mëdhenj të telekomunikacionit në vend, duke ofruar shërbime të telefonisë celulare dhe fikse, internetit dhe televizionit.
Kjo kompani është e lidhur në shumicë me grupin “Telekom Srbija”, i cili kontrollohet nga shteti serb.
Alta Bank dhe Alta Pay Group janë pjesë e sistemit të biznesit të sipërmarrësit serb Davor Macura.
Banka Kombëtare e Serbisë ia revokoi licencën e operimit Alta Bank-ës më 30 tetor, pasi kontrollet mbikëqyrëse zbuluan një përkeqësim të ndjeshëm të gjendjes financiare të bankës dhe rrezik për përkeqësim të mëtejshëm të likuiditetit, gjë që vë në rrezik interesat e depozituesve.
Administrimi i bankës kaloi te Agjencia për Sigurimin e Depozitave dhe u iniciuan procedura ligjore kundër bankës, aksionarëve të saj, drejtuesve dhe personave të tjerë përgjegjës. /Telegrafi/