Spanja ka shpallur tri ditë zie kombëtare pas aksidentit të rëndë hekurudhor, ku të paktën 68 persona kanë humbur jetën dhe dhjetëra të tjerë janë lënduar.
Ngjarja konsiderohet një nga aksidentet më të rënda hekurudhore në historinë moderne të Evropës, shkruan BBC, transmeton Dukagjini.
Ekipet e emergjencës kanë punuar gjatë gjithë natës, nën ndriçimin e fuqishëm të reflektorëve, për të prerë pjesët metalike të vagonëve dhe për të kërkuar viktimat. Shumë prej personave që humbën jetën ende nuk janë identifikuar.
Autoritetet spanjolle kanë nisur hetimet për të zbardhur shkaqet e aksidentit, i cili ndodhi të mërkurën në mëngjes, kur një tren që udhëtonte nga Madridi drejt Seviljes u përplas me një tren tjetër që ishte i ndalur në shina.
Kryeministri spanjoll, Pedro Sánchez, ka thënë se i gjithë vendi është në zi.
“E gjithë Spanja është në zi. Jetët janë shkatërruar, familjet janë ndarë dhe dhimbja është e jashtëzakonshme”, deklaroi Sánchez.
Sipas Ministrisë së Brendshme të Spanjës, qindra pjesëtarë të ekipeve të emergjencës janë angazhuar në vendin e ngjarjes për të ndihmuar në operacionet e kërkim-shpëtimit. Për gjetjen e viktimave dhe largimin e rrënojave janë përdorur gjithashtu dronë dhe helikopterë.
Ministri spanjoll i Transportit, Óscar Puente, ka bërë të ditur se treni i kompanisë private hekurudhore Iryo, i cili ishte ndalur në shina, kishte 147 pasagjerë në bord. Sipas tij, treni kishte ndaluar për shkak të një defekti në sistemin kompjuterik.
Puente shpjegoi se, në rast të një dështimi të sistemit, kontrollin e merr një qendër 24-orëshe në Madrid. Megjithatë, sipas ministrit, kjo qendër kishte marrë një vendim që ai e cilësoi si “të pashpjegueshëm”, duke udhëzuar trenat të rifillonin lëvizjen pa kufizime të shpejtësisë.
Regjistrimet audio të komunikimeve ndërmjet kontrollorëve të trenave në Madrid dhe makinistëve duket se tregojnë se njërit prej trenave të shpejtësisë së lartë i ishte dhënë leja për të vazhduar lëvizjen, ndonëse një tren tjetër përpara tij kishte mbetur i ndalur.
Kompania Iryo ka deklaruar se treni i saj ishte “goditur nga prapa” nga një tren tjetër, i operuar nga kompania shtetërore hekurudhore Renfe, i cili kishte 397 pasagjerë në bord.
Fuqia e përplasjes bëri që disa vagonë të dilnin nga shinat dhe të përfundonin në një terren të pjerrët, poshtë nivelit të hekurudhës.
Dëshmitarët kanë përshkruar skena të rënda pas aksidentit, duke thënë se pasagjerët bërtisnin, ishin të mbuluar me gjak dhe kishin mbetur të bllokuar në ulëset e tyre. Në disa vagonë ishte përhapur tym, ndërsa njëri prej tyre kishte marrë flakë.
Kryeministri Sánchez e ka cilësuar të papranueshme që Spanja të përballet me dy aksidente të rënda hekurudhore brenda një viti. Në janar, 46 persona humbën jetën në një aksident me tren të shpejtësisë së lartë pranë Kordobës, në të njëjtën linjë hekurudhore, por më në jug.
Pas aksidentit, shumica e partive politike kanë pezulluar fushatat e tyre për zgjedhjet e ardhshme, në shenjë respekti për viktimat dhe familjet e tyre.
Përjashtim ka bërë partia e ekstremit të djathtë Vox. Lideri i saj, Santiago Abascal, deklaroi se partia nuk do të marrë pjesë në atë që ai e përshkroi si përpjekje për të “përdorur zinë për të heshtur kritikat” ndaj infrastrukturës hekurudhore të vendit.
Burimi: Dukagjini