
Koalicioni i udhëhequr nga Arabia Saudite, i cili po lufton kundër rebelëve Huthi të mbështetur nga Irani në Jemen, ka njoftuar se të premten ka goditur disa objektiva që përdoreshin nga rebelët për kontrabandimin dhe transportimin e armëve. Në të njëjtën kohë, Huthitët kanë sulmuar Arabinë Saudite me raketa dhe dronë.
Sipas koalicionit, sulmet ajrore kishin në shënjestër operacionet e kontrabandimit dhe transportimit të armëve dhe raketave balistike në portin kryesor të Jemenit, Hodeidah, në Detin e Kuq.
Po ashtu, koalicioni bëri të ditur se ka zhvilluar një operacion ushtarak në kryeqytetin Sana, i cili kontrollohet nga rebelët, duke synuar kapacitetet e tyre ushtarake. Sipas tij, qëllimi ishte parandalimi i sulmeve ndaj civilëve në Jemen dhe Arabinë Saudite.
Ndërkohë, Arabia Saudite njoftoi se të premten në mëngjes kishte interceptuar pesë dronë dhe një raketë balistike të lëshuar nga rebelët. Në mesin e objektivave të sulmit ishte edhe Riadi, kryeqyteti dhe qyteti më i madh i mbretërisë.
Këto zhvillime vijnë një ditë pasi rebelët Huthi, të mbështetur nga Irani, deklaruan se kishin shënjestruar aeroportet saudite, bazat ajrore dhe qendrën financiare të Riadit.
Huthitët nuk kanë komentuar menjëherë zhvillimet e së premtes dhe as nuk kanë marrë përgjegjësinë për sulmet e raportuara. Megjithatë, të dyja palët kanë shkëmbyer kërcënime për goditjen e porteve kryesore në territoret e njëra-tjetrës.
Në fillim të kësaj jave, Arabia Saudite kishte nisur një fushatë të gjerë ajrore në zonat e Jemenit që kontrollohen nga rebelët Huthi.
Sinjali – aty ku e vërteta flet para lajmit!
Burimi: Sinjali