Francesco Totti ka përzgjedhur partnerin më të mirë të sulmit me të cilin ka luajtur te Roma, duke bërë një zgjedhje që mund të shkaktojë diskutime mes tifozëve të klubit italian.
Legjenda e Romës mori pjesë në një sfidë të publikuar në Instagram nga Panini, ku duhej të rendiste ish-bashkëlojtarët e tij në një piramidë, sipas preferencave personale.
Në krye të listës së Tottit ishte Antonio Cassano, të cilin e zgjodhi pa asnjë hezitim. Pas tij, në kategorinë e dytë, renditi Vincenzo Montellan dhe Gabriel Batistutan, dy sulmues të tjerë të njohur me të cilët ndau fushën në fanellën e klubit romak.
Ajo që tërhoqi vëmendjen ishte pozicionimi i Mohamed Salahut, i cili përfundoi në kategorinë e tretë, së bashku me Marco Delvecchion dhe Abel Balbon.
Në kategorinë e katërt, Totti vendosi Taddein, Delvecchion, Mancinin dhe Perrottën.
Zgjedhja e Cassanos në krye të piramidës mund të duket befasuese për disa tifozë, veçanërisht duke pasur parasysh emrat e mëdhenj me të cilët Totti ka luajtur gjatë karrierës së tij.
Totti dhe Cassano, një bashkëpunim i veçantë
Pas kësaj zgjedhjeje fshihet një histori e veçantë mes dy futbollistëve, të cilët në fillim të viteve 2000 formuan një nga dyshet më interesante sulmuese në futbollin italian.
Cassano iu bashkua Romës nga Bari në vitin 2001, kur ishte vetëm 19-vjeçar. Klubi romak pagoi rreth 30 milionë euro për transferimin e tij, një shumë jashtëzakonisht e lartë për një futbollist të asaj moshe në atë kohë. Totti dhe Cassano luajtën së bashku deri në janar të vitit 2006, duke krijuar një lidhje të jashtëzakonshme në fushë.
Totti ishte organizatori kryesor i lojës, ndërsa Cassano shquhej për driblimet, kreativitetin dhe lëvizjet e paparashikueshme që vështirësonin punën e mbrojtjeve kundërshtare.
Sezoni 2003/04 ishte një nga dëshmitë më të mira të bashkëpunimit të tyre. Roma përfundoi në vendin e dytë në Serie A, ndërsa Totti dhe Cassano realizuan së bashku 34 gola në kampionat.
Vite më vonë, Totti ka folur me superlativa për ish-bashkëlojtarin e tij, duke theksuar se me të kishte krijuar një lidhje të veçantë në fushë.
“Ne komunikonim me njëri-tjetrin në fushë dhe mund ta gjenim njëri-tjetrin në çdo moment. Kishim një marrëdhënie të shkëlqyer edhe jashtë fushës dhe ishim plotësisht në sinkron”, kishte deklaruar Totti.
Në një tjetër rast, legjenda italiane e përshkroi bashkëpunimin e tyre duke thënë se “flisnin të njëjtën gjuhë me këmbët e tyre”.
– YouTube www.youtube.com
Cassano zhvilloi gjithsej 161 ndeshje me Romën dhe shënoi 52 gola, duke krijuar një miqësi të fortë me Tottin edhe jashtë fushës.
Për këtë arsye, zgjedhja e tij në krye të piramidës nuk është aspak e rastësishme. /Telegrafi/