Personat që synojnë të humbin peshë shpejt shpesh zgjedhin dieta dhe metoda ekstreme, të cilat në vend të rezultateve afatgjata mund të çojnë në rikthimin e kilogramëve të humbur.
Mjekja dhe nutricionistja María Jose Crispin, nga klinika Clínica Menorca në Madrid, ka identifikuar tri gabime të zakonshme që mund të pengojnë dobësimin e qëndrueshëm.
Gabimi i parë është ndjekja e dietave ekstreme që premtojnë humbje të shpejtë të peshës. Sipas Crispin, këto dieta mund të shkaktojnë humbje të masës muskulore dhe të lëngjeve, ndërsa pas rikthimit te ushqyerja e zakonshme, kilogramët mund të kthehen, madje edhe në sasi më të mëdha.
Ajo këshillon krijimin e zakoneve të shëndetshme që mund të ruhen për një kohë të gjatë, në vend të kufizimeve të rrepta ushqimore.
Gabimi i dytë është përqendrimi vetëm te ushqimi dhe neglizhimi i aktivitetit fizik. Nutricionistja rekomandon kombinimin e ushtrimeve kardio me stërvitjen e forcës, pasi kjo ndihmon në ruajtjen e muskujve, përmirësimin e kondicionit dhe mirëmbajtjen e peshës.
Ndërkaq, gabimi i tretë është eliminimi i plotë i yndyrave nga ushqimi.
Crispin thekson se shtimi në peshë lidhet kryesisht me marrjen e tepërt të kalorive, pavarësisht nëse ato vijnë nga yndyrat, proteinat, karbohidratet apo alkooli.
Ajo rekomandon përfshirjen e yndyrave të shëndetshme në ushqyerjen e përditshme, si ato që gjenden te salmoni, vaji i ullirit dhe avokadoja, ndërsa këshillon kufizimin e yndyrave trans dhe tepricës së yndyrave të ngopura.
Sipas nutricionistes, dobësimi i qëndrueshëm nuk arrihet përmes urisë apo eliminimit të grupeve të tëra ushqimore, por përmes ushqyerjes së ekuilibruar, aktivitetit fizik dhe zakoneve të shëndetshme afatgjata.
Sinjali – aty ku e vërteta flet para lajmit!
Burimi: Sinjali