Ukraina po monitoron funksionimin e rrjeteve satelitore Starlink dhe Starshield, pas raportimeve se kufizimet e lidhjes kanë penguar operacionet me dronë. Ndërsa Donald Trump ka thënë se Elon Musk e ka rikthyer shërbimin, autoritetet ukrainase thonë se ende nuk kanë konfirmim për heqjen e kufizimeve.
Burimet i thanë BBC-së se janë regjistruar raste kur dronët kanë humbur lidhjen ndërsa lëviznin me shpejtësi prej 161 km/h, gjë që ka penguar operacionet ushtarake. Presidenti amerikan kishte mohuar se e kishte udhëzuar miliarderin e teknologjisë që të kufizonte lidhjen në “Starshield”, versionin e Starlink të destinuar për përdorim ushtarak ? ndërsa të enjten u shpreh se Musk e kishte “rikthyer” atë. Burimet nga Ministria e Mbrojtjes e Ukrainës thanë se ushtria po monitoron vazhdimisht performancën e rrjeteve Starlink dhe Starshield. Ato shtuan se “aktualisht nuk ka asnjë konfirmim që këto kufizime janë hequr”. Javën e kaluar, Kievi tha se shpejtësitë e lidhjes me satelitët në orbitën e ulët të Tokës ishin kufizuar, duke ndikuar në shpejtësinë me të cilën dronët mund të udhëtonin. Menjëherë pas kësaj, Musk tha se Starshield, të cilin Ukraina e përdor për disa nga operacionet e saj, kontrollohej nga ushtria amerikane dhe sugjeroi që Pentagoni mund të qëndronte pas problemeve. Shtëpia e Bardhë që atëherë ka mohuar vazhdimisht vendosjen e qëllimshme të kufizimeve në rrjetin në Ukrainë.
Ukraina përdor si shërbimin civil Starlink ashtu edhe atë më të sigurt Starshield, varësisht nga komunikimet e nevojshme. Rrjetet përdorin 10,000 satelitë për të siguruar lidhje, veçanërisht në zona të largëta dhe në fushën e betejës. Rusia nuk është e autorizuar të përdorë Starlink, kështu që kur Ukraina dërgon raketa me rreze të gjatë veprimi thellë në Rusi për të goditur rafineritë e naftës, rrjeti nuk funksionon.
Raportet ukrainase për një ngadalësim të shërbimit erdhën gjatë një grindjeje të tensionuar diplomatike midis Trump dhe Presidentit ukrainas Volodymyr Zelensky në lidhje me sulmet ukrainase në infrastrukturën ruse të naftës.
Burimi: RTKLive