Yjet evropianë vazhdojnë të dominojnë parketet e NBA-së. Victor Wembanyama, Luka Dončić dhe Nikola Jokić patën një mbrëmje të jashtëzakonshme, duke udhëhequr skuadrat e tyre drejt fitoreve dhe duke regjistruar statistika mbresëlënëse.
Protagonisti kryesor ishte francezi Victor Wembanyama, i cili realizoi 52 pikë, 24 kërcime dhe 8 bllokada në fitoren dramatike të San Antonio Spurs ndaj Dallas Mavericks, me rezultat 112:111.
Me këtë paraqitje, 22-vjeçari hyri në historinë e NBA-së si lojtari i parë që nga viti 1974, pas Bob McAdoo, që regjistron të paktën 50 pikë, 20 kërcime dhe 5 bllokada në një ndeshje. Ai vendosi edhe rekorde personale në pikë dhe kërcime, duke ndihmuar Spursat të arrijnë fitoren e gjashtë radhazi.
Edhe Luka Dončić vazhdoi formën e shkëlqyer. Ylli slloven shënoi 40 pikë, 9 kërcime dhe 7 asistime në fitoren e Los Angeles Lakers ndaj Sacramento Kings, me rezultat 116:103.
Kjo ishte ndeshja e gjashtë radhazi në të cilën Dončić realizoi të paktën 35 pikë. Për më tepër, ai u bë lojtari i parë që nga Michael Jordan në sezonin 1988/89 që shënon mbi 300 pikë në tetë ndeshjet e para të sezonit.
Ndërkohë, Nikola Jokić regjistroi një tjetër paraqitje të kompletuar në fitoren e Denver Nuggets ndaj Toronto Raptors, 128:109. Qendra serbe realizoi 32 pikë, 11 asistime dhe 10 kërcime, duke shënuar “triple-double”-in e tretë të sezonit dhe të 201-in në karrierën e tij.
Kështu, një mbrëmje e vetme në NBA u shndërrua në një spektakël të yjeve evropianë: Wembanyama me një paraqitje historike, Dončić me vazhdimësinë e tij mbresëlënëse dhe Jokić me një tjetër “triple-double”.
Sinjali – aty ku e vërteta flet para lajmit!
•
Sezoni 2026-27
Burimi: Sinjali