WhatsApp po teston një funksion të ri për pajisjet Android, i cili do t’u mundësojë përdoruesve të lexojnë mesazhet pa u shfaqur dy shenjat blu që konfirmojnë leximin.
Sipas portalit Android Authority, veçoria e re është zbuluar në versionin beta të aplikacionit WhatsApp për Android 2.26.44.12, por ende ndodhet në fazën e zhvillimit.
Funksioni do të mundësojë hapjen e një dritareje paraprake duke mbajtur gishtin të shtypur mbi një bisedë në listën e mesazheve. Përmes saj, përdoruesit do të mund të lexojnë mesazhet e fundit pa hyrë drejtpërdrejt në bisedë dhe pa aktivizuar konfirmimin e leximit.
Madje, kjo dritare do të lejojë edhe lëvizjen nëpër mesazhet më të vjetra, duke ruajtur të njëjtën mundësi për t’i lexuar ato pa u shfaqur si të lexuara.
Përveç kësaj, përdoruesit do të kenë qasje në disa veprime të shpejta, si arkivimi i bisedës, heshtja e njoftimeve, vendosja e saj në krye të listës dhe fshirja.
Risia i ngjan funksionit të parashikimit të mesazheve që tashmë ekziston në pajisjet iPhone, por versioni për Android pritet të ofrojë më shumë mundësi.
Megjithatë, funksioni nuk është ende i disponueshëm për të gjithë testuesit beta dhe WhatsApp nuk ka njoftuar se kur pritet të publikohet zyrtarisht.
Nëse testimi përfundon me sukses, kjo veçori do t’u japë përdoruesve më shumë kontroll mbi privatësinë dhe mënyrën e leximit të mesazheve.
Sinjali – aty ku e vërteta flet para lajmit!
Burimi: Sinjali