Trajneri i Francës, Zinédine Zidane, ka mohuar pretendimet për krisje të marrëdhënieve me kapitenin Kylian Mbappé, duke i cilësuar si “marrëzi” zërat për mosmarrëveshje mes tyre.
Në konferencën për shtyp para ndeshjes vendimtare ndaj Turqisë, që zhvillohet të dielën, më 15 nëntor, në kuadër të Ligës së Kombeve, Zidane u shpreh se raporti me yllin e Real Madridit është normal dhe pa probleme.
“Unë kam marrëdhënien e një trajneri me lojtarin e tij dhe gjithçka shkon në mënyrë perfekte. Nuk mund t’i ndaloj njerëzit të flasin, por këto janë marrëzi dhe është për të ardhur keq. Natyrisht, komentet që më janë përcjellë janë disi bezdisëse”, deklaroi Zidane.
Ndërkohë, lajmi pozitiv për përfaqësuesen franceze është rikthimi i Mbappés në dispozicion të trajnerit. Sulmuesi mungoi në humbjen 3-1 ndaj Italisë për shkak të shqetësimeve muskulore në kofshë, por Zidane konfirmoi se ai do të jetë me skuadrën për përballjen ndaj Turqisë.
“Sigurisht që Kylian ndryshon gjithçka. Ne preferojmë ta kemi me vete sesa të mos e kemi. Ai do të jetë me ne nesër”, u shpreh trajneri francez.
Megjithatë, Zidane nuk bëri të ditur nëse kapiteni do ta nisë ndeshjen nga minuta e parë, duke lënë të hapur çështjen e formacionit titullar.
Franca ndodhet në një garë të ngushtë në Grupin A1, ku ka grumbulluar 10 pikë, aq sa edhe Italia. Belgjika renditet e treta me 9 pikë, ndërsa Turqia është e fundit pa pikë.
Një barazim ndaj Turqisë do t’i mjaftonte Francës për të siguruar kualifikimin në çerekfinale, ndërsa fitorja mund t’i sigurojë vendin e parë në grup, në rast se Italia nuk fiton ndaj Belgjikës.
Sinjali – aty ku e vërteta flet para lajmit!
Burimi: Sinjali