Pavarësisht nivelit të ulët të papunësisë, gjetja e një pune që përputhet me kualifikimet dhe përvojën profesionale mbetet sfidë në Zvicër, veçanërisht për të huajt.
Sipas një raportimi të SWI swissinfo.ch, procesi i punësimit mund të zgjasë me muaj, ndërsa kandidatët përballen me konkurrencë të fortë dhe mungesë të përgjigjeve nga punëdhënësit.
Në tremujorin e dytë të vitit 2026, shkalla zyrtare e papunësisë në Zvicër ishte 3 për qind, ndërsa sipas një matjeje më të gjerë, që përfshin popullsinë aktive pa punë, arrinte në 4,9%.
Megjithatë, këto shifra nuk e pasqyrojnë plotësisht vështirësinë për të gjetur një vend pune që përputhet me aftësitë e kandidatëve.
Raporti sjell shembuj të profesionistëve me përvojë ndërkombëtare dhe diploma të avancuara, të cilët kanë dërguar qindra apo mijëra aplikime pa arritur të sigurojnë një vend pune, transmeton Telegrafi.
Përveç konkurrencës, pengesa mund të jenë edhe mungesa e njohjes së tregut zviceran, leja e qëndrimit dhe nevoja për njohuri specifike të legjislacionit e institucioneve vendore.
Sipas të dhënave për vitin 2025, papunësia te shtetasit e huaj arriti në 8,3 për qind, krahasuar me 3,4 për qind te shtetasit zviceranë. Ndërkohë, kërkesa për punëtorë mbetet më e lartë në fusha si shëndetësia, teknologjia informative dhe inxhinieria, ndërsa konkurrenca është më e madhe në administratë dhe profesione të përgjithshme të zyrës.
Ekspertët e punësimit theksojnë rëndësinë e krijimit të kontakteve profesionale, përditësimit të aftësive dhe njohjes së kërkesave të tregut lokal, pasi diploma dhe përvoja nuk garantojnë automatikisht punësim./Telegrafi/