Nga 1 nëntori 2026, në Zvicër kanë hyrë në fuqi disa ndryshime ligjore dhe administrative që prekin dokumentet e identitetit, udhëtimet ajrore, bashkëpunimin policor dhe sektorin e bujqësisë.
Një nga ndryshimet kryesore lidhet me kartën e re biometrike të identitetit, për të cilën qytetarët zviceranë do të mund të aplikojnë nga 2 nëntori. Dokumenti do të përmbajë një çip elektronik me fotografinë e fytyrës dhe dy gjurmë gishtërinjsh, me qëllim rritjen e sigurisë dhe parandalimin e falsifikimit.
Megjithatë, qytetarët do të mund të zgjedhin edhe kartën tradicionale pa çip. Dokumentet ekzistuese do të mbeten të vlefshme deri në skadimin e afatit të tyre, ndërsa nuk do të ketë rritje të tarifave.
Ndryshime do të ketë edhe te pasaportat e përkohshme, të cilat nga 2 nëntori do të emërtohen zyrtarisht “pasaporta emergjente”, me pamje dhe elemente të përditësuara të sigurisë.
Rregulla të reja për udhëtarët ajrorë
Nga 1 nëntori hyn në fuqi edhe ligji për përpunimin e të dhënave të pasagjerëve të transportit ajror. Ai synon të ndihmojë në luftën kundër terrorizmit dhe krimeve të rënda, duke u mundësuar autoriteteve kompetente qasjen në informacione të udhëtimit.
Kompanitë ajrore do të kenë detyrimin që të transmetojnë të dhënat e pasagjerëve sipas kërkesave ligjore dhe standardeve për mbrojtjen e të dhënave personale. Megjithatë, zbatimi praktik i sistemit do të nisë më 1 shkurt 2027.
Forcohet bashkëpunimi policor në Schengen
Ndryshime janë bërë edhe në rregullat për Sistemin Informativ të Schengenit (SIS), përmes të cilave përcaktohen më qartë mënyrat e administrimit dhe shkëmbimit të të dhënave personale ndërmjet autoriteteve zvicerane dhe vendeve të tjera pjesëmarrëse.
Qëllimi është përmirësimi i bashkëpunimit policor, forcimi i sigurisë dhe rritja e efikasitetit të kontrolleve kufitare.
Ndryshime edhe për fermat
Rregulla të reja zbatohen edhe për kontrollin e diarresë virale të gjedhit (BVD), sëmundje që prek bagëtinë.
Sipas sistemit të ri, fermat do të ndahen në dy kategori: ato që janë të lira nga BVD dhe ato që nuk e kanë këtë status. Fermat që plotësojnë kushtet do të mund t’i lëvizin kafshët pa kufizime që lidhen me këtë sëmundje, ndërsa për të tjerat do të vazhdojnë masat e kontrollit.
Autoritetet zvicerane kanë bërë të ditur se më shumë se 99 për qind e fermave të gjedhit në vend janë tashmë të lira nga kjo sëmundje.
Sinjali – aty ku e vërteta flet para lajmit!
Burimi: Sinjali