Dardan Berisha është rikthyer te skuadra e basketbollit Peja, duke u bërë një përforcim i rëndësishëm për klubin pejan në vazhdim të sezonit.
Lajmi është bërë i ditur nga vetë klubi të premten mbrëma, me Berishën që rikthehet në një ambient të njohur për të.
Kapiteni i Kosovës nuk ka qenë pjesë e ndonjë skuadre gjatë këtij edicioni, ndërsa tash do të jetë sërish në dispozicion të Pejës, ku luajti edhe në sezonin e kaluar.
Berisha ka një histori të gjatë me klubin pejan, pasi fanellën e Pejës e ka bartur edhe në disa periudha të tjera të karrierës së tij.
Basketbollisti kosovar ka luajtur gjithashtu për Prishtinën, ndërsa karrierën e tij e ka zhvilluar edhe në disa shtete evropiane, duke u shndërruar në një nga emrat më të njohur të basketbollit kosovar.
Rikthimi i tij vjen në një moment jo të lehtë për Pejën, e cila është duke kaluar një seri negative të rezultateve.
Me përvojën dhe cilësitë e Berishës, skuadra pejanë shpreson të rikthehet te fitoret dhe të përmirësojë ecurinë në vazhdim të sezonit./Telegrafi/