Policia e Shtetit në Shqipëri ka bërë të ditur se 23 persona janë shoqëruar për veprime të mëtejshme procedurale pas përplasjeve të ndodhura gjatë protestës së mesditës së sotme pranë godinës së Ministrisë së Arsimit në Tiranë.
Sipas njoftimit zyrtar, gjatë tubimit një grup protestuesish dyshohet se kanë dëmtuar rrethimin dhe portën hyrëse të institucionit, si dhe kanë goditur me gurë dhe sende të forta xhamat e fasadën e godinës.
Policia ndërhyri pas përshkallëzimit të situatës
Policia njofton se efektivët u kanë bërë disa thirrje protestuesve për të ndërprerë veprimet dhe për t’u larguar nga oborri i institucionit. Megjithatë, sipas autoriteteve, pas vijimit të hedhjes së molotovëve, kapsollave dhe sendeve të forta, është ndërhyrë për të rivendosur rendin publik.
“Në këto kushte, në përputhje me ligjet në fuqi dhe procedurat standarde të punës, strukturat e Policisë kanë ndërhyrë në mënyrë proporcionale për neutralizimin e autorëve të këtyre veprimeve dhe rivendosjen e rendit”, thuhet në njoftim.
Si rezultat i ndërhyrjes, 23 persona janë shoqëruar nga policia për veprime të mëtejshme procedurale.
Gjashtë policë dhe një gazetare të lënduar
Gjatë përplasjeve janë lënduar gjashtë punonjës policie të Forcës Kombëtare të Sigurisë, si dhe një gazetare. Sipas autoriteteve, të gjithë të lënduarit janë jashtë rrezikut për jetën.
Ndërkohë, strukturat hetimore të Drejtorisë Vendore të Policisë Tiranë, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, kanë nisur hetimet për identifikimin dhe kapjen e personave të përfshirë në veprimet e kundërligjshme.
Në fund të njoftimit, Policia e Shtetit ka përsëritur se do të garantojë të drejtën kushtetuese të qytetarëve për tubim paqësor, duke u bërë thirrje pjesëmarrësve të shmangin veprimet që cenojnë rendin dhe sigurinë publike.
“Policia e Shtetit thekson sërish angazhimin e saj për të garantuar plotësisht ushtrimin e së drejtës kushtetuese të qytetarëve për tubim paqësor dhe fton pjesëmarrësit në tubime që të mos bëhen pjesë e veprimeve të kundërligjshme, që cenojnë rendin dhe sigurinë publike, pasi do të përballen me pasojat penale që parashikon ligji”, apelon Policia e Shtetit.
Sinjali – aty ku e vërteta flet para lajmit!
The post 23 të shoqëruar pas përplasjeve në protestën pranë Ministrisë së Arsimit, lëndohen 6 policë dhe një gazetare appeared first on Sinjali.
Burimi: Sinjali