Drejtorët e dorëhequr vijojnë të ushtrojnë detyrat e tyre, pavarësisht njoftimit për largim nga funksionet drejtuese.
I tillë është edhe rasti i drejtorit të përgjithshëm të Doganave, Besmir Beja, i cili ka vazhduar aktivitetin zyrtar duke vizituar Degën Doganore të Durrësit.
Gjatë vizitës, ai inspektoi mjediset e rikonstruktuara dhe zhvilloi një takim me punonjësit e administratës, raporton thch.
Sipas një njoftimi të publikuar në faqen zyrtare të Drejtorisë së Përgjithshme të Doganave, Beja kërkoi angazhim maksimal për përmirësimin e performancës dhe rritjen e cilësisë së shërbimeve ndaj qytetarëve dhe operatorëve ekonomikë.
Një tjetër çështje e diskutuar gjatë takimit ishte përmbushja e planit të të ardhurave.