NATO ka testuar teknologjitë e reja ushtarake, duke demonstruar për herë të parë koordinimin e tufave të dronëve përmes përdorimit të inteligjencës artificiale, teknologjisë 5G dhe sistemeve digjitale për shkëmbimin e të dhënave.
Demonstrimi është zhvilluar në bazën ushtarake Adazi në Letoni, në kuadër të programit të NATO-s për eksperimentimin me infrastrukturën digjitale (DiBaX), i cili është mbajtur nga 19 deri më 30 tetor.
Gjatë këtij testimi është prezantuar mënyra se si disa dronë mund të funksionojnë dhe të koordinohen në mënyrë të sinkronizuar, duke shkëmbyer informacione përmes sistemeve të avancuara digjitale.
Komandanti Suprem i Aleatëve të NATO-s për Transformim, admirali Pierre Vandier, ka deklaruar se këto teknologji mundësojnë integrimin më të shpejtë të informacionit dhe marrjen e vendimeve më efikase në fushëbetejë.
Ndërkaq, komandanti i Ushtrisë së Letonisë, Kaspars Pudāns, ka theksuar rëndësinë që këto zhvillime të mos mbeten vetëm në fazën e testimit, por të kalojnë në përdorim konkret gjatë operacioneve ushtarake.
Programi DiBaX synon krijimin e një infrastrukture të përbashkët digjitale, përmes së cilës ushtritë e vendeve anëtare të NATO-s do të mund të shkëmbejnë të dhëna dhe të koordinojnë operacionet e përbashkëta.
Ky zhvillim shënon një tjetër hap në përpjekjet e Aleancës për të integruar inteligjencën artificiale dhe teknologjitë e avancuara në operacionet e saj ushtarake.
Sinjali – aty ku e vërteta flet para lajmit!
Burimi: Sinjali