Avokati Besnik R. Berisha ka reaguar publikisht lidhur me rastin e 400 kilogramëve kokainë, duke deklaruar se kompania MC Food, Izet Sheqiri dhe punëtorët e saj janë viktima të veprimtarisë së krimit të organizuar. Ai ka kritikuar ashpër Prokurorinë për mënyrën e trajtimit të rastit, ndërsa ka kërkuar që Gjykata e Apelit të marrë një vendim të drejtë për lirimin e të mbrojturve të tij, raporton Gazeta Sinjali.
Reagimi i Berishës, i publikuar në Facebook, vjen pas raportimeve të Euronews Albania për hetimet e SPAK-ut ndaj një rrjeti ndërkombëtar që akuzohet për trafikimin e të paktën 60.7 tonëve kokainë nga Amerika e Jugut drejt Europës.
Sipas këtyre raportimeve, organizatat kriminale përdornin kompani tregtare dhe ngarkesa me produkte të ligjshme për të fshehur kokainën gjatë transportit ndërkombëtar.
Duke iu referuar këtyre zhvillimeve, Berisha ka theksuar se ato dëshmojnë se si bizneset e ligjshme mund të përfundojnë viktima të rrjeteve të trafikimit të narkotikëve.
“Rasti i 400 kilogramëve kokainë është tragjedi për MC Food, Izet Sheqirin dhe punëtorët e kësaj kompanie!”, ka shkruar Berisha.
Ai ka theksuar se mbrojtja e ka ngritur vazhdimisht këtë argument gjatë procedurës gjyqësore.
“Kjo është pikërisht ajo që mbrojtja ka argumentuar vazhdimisht në rastin e MC Food, Izet Sheqirit dhe stafit të tij. Njerëz që, në vend se të mbrohen nga krimi i organizuar, po vuajnë pasojat e tij, duke paguar me lirinë, dinjitetin, familjet dhe gjithçka që kanë ndërtuar me punë të ndershme”, ka deklaruar ai.
Berisha kritikon Prokurorinë: Nuk ka bërë dallimin mes autorëve të krimit dhe viktimave
Në reagimin e tij, avokati ka drejtuar kritika të ashpra ndaj Prokurorisë, duke pretenduar se në këtë rast nuk është bërë dallimi i domosdoshëm ndërmjet personave përgjegjës për organizimin e veprimtarisë kriminale dhe atyre që, sipas mbrojtjes, janë bërë viktima të saj.
“Për mua, ky rast është edhe një dështim serioz i Prokurorisë për të bërë dallimin thelbësor mes atyre që organizojnë dhe kryejnë krime dhe atyre që bien viktima të tyre”, ka shkruar Berisha.
Ai ka kërkuar që Gjykata të vlerësojë në mënyrë të pavarur provat, rrethanat dhe përgjegjësinë individuale të secilit të përfshirë në rast.
“Tashmë është koha që Gjykata ta bëjë këtë dallim, duke vlerësuar me pavarësi provat, rrethanat dhe përgjegjësinë individuale të secilit. E mbi të gjitha, të marrë pa vonesë një vendim të drejtë për lirimin e tyre”, ka theksuar avokati.
Pritet vendimi i Gjykatës së Apelit
Rasti i 400 kilogramëve kokainë është aktualisht në procedurë ankimore, pas kundërshtimit të aktgjykimit të shkallës së parë nga mbrojtja.
Seanca para kolegjit të Gjykatës së Apelit është mbajtur, ndërsa vendimi ende nuk është shpallur.
Në përfundim të reagimit, Berisha ka përcjellë një mesazh të fuqishëm lidhur me mënyrën se si, sipas tij, duhet të trajtohen rastet ku bizneset e ligjshme mund të shfrytëzohen nga organizatat kriminale.
“Nuk mund ta luftojmë krimin e organizuar duke ua shkatërruar jetën atyre që pretendojmë se po i mbrojmë prej tij.
Trafikantët duhet të përgjigjen për krimet e tyre. Viktimat nuk duhet të vuajnë në vend të tyre!”, ka përfunduar Berisha.
Sinjali – aty ku e vërteta flet para lajmit!
Burimi: Sinjali