Avokati Besnik R. Berisha apeloi të mërkurën në Gjykatën e Apelit aktgjykimin me të cilin Arsim Syla u dënua në shkallë të parë me 22 vjet burgim në rastin e vrasjes së Valmir Breznicës në supermarketin “Interex” në Podujevë, raporton Gazeta Sinjali.
“Është provuar e kundërta e asaj që është shkruar”, tha Berisha gjatë shqyrtimit të ankesës së mbrojtjes. Ai kundërshtoi vlerësimin e provave nga shkalla e parë, duke thënë se “supozimet nuk mund të kthehen në prova”.
Berisha tha gjithashtu se në shkresat e lëndës ishin deponuar “sharje e fyerje më të rënda” dhe se gjyqtarët e prokurorët ishin në dijeni për to.
Avokati u ndal edhe te deklarata e të dëmtuarës. Sipas tij, nëse Apeli i fal besimin asaj deklarate, Syla do të dilte nga gjykata dhe do të shkonte në shtëpi po atë ditë.
Çfarë pretendon Prokuroria për rolin e Sylës?
Syla ishte larguar nga “Interex”-i para të shtënave. Sipas Prokurorisë, vrasja dyshohet se u krye nga një i mitur pas largimit të Sylës. Në dispozitivin e aktakuzës, Prokuroria ia atribuon Sylës rolin e porositësit të vrasjes.
Ngjarja ndodhi më 11 shtator 2023 në rrugën “Zahir Pajaziti” në Podujevë. Nga të shtënat u vra 34-vjeçari Valmir Breznica dhe u plagos bashkëshortja e tij.
Seanca e mëparshme në Apel, e caktuar më 28 tetor, ishte shtyrë për shkak të mungesës së palëve të dëmtuara, të cilat në atë kohë nuk kishin përfaqësues ligjor.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali