Loja e shumëpritur Grand Theft Auto 6 (GTA 6) ka vendosur rekorde të reja, duke u bërë loja më e porositur paraprakisht në historinë e PlayStation Store dhe Microsoft Store, vetëm pak ditë para lansimit zyrtar.
Sipas të dhënave të kompanisë analitike Sensor Tower, më 10 nëntor loja kishte regjistruar rreth 9.69 milionë porosi paraprake, me një vlerë të vlerësuar prej 942 milionë dollarësh.
Megjithatë, raportimet më të fundit të 11 nëntorit tregojnë se shifra ka kaluar 10 milionë porosi dhe një miliard dollarë, ende pa dalë loja zyrtarisht në treg.
Interesimi për lojën ka tejkaluar pritshmëritë e kompanisë Take-Two Interactive, pronare e Rockstar Games.
Drejtori ekzekutiv i Take-Two, Strauss Zelnick, deklaroi se porositë paraprake janë shumë më të larta sesa parashikimet fillestare të kompanisë.
Ai shtoi se lansimi i GTA 6 pritet ta bëjë këtë një vit historik për kompaninë.
Që nga 10 nëntori, përdoruesit e PlayStation 5 dhe Xbox Series X/S kanë mundësi ta shkarkojnë lojën paraprakisht, në mënyrë që të shmangin vonesat dhe mbingarkesat e mundshme të serverëve në ditën e lansimit.
Ekspertët paralajmërojnë se kërkesa e jashtëzakonshme mund të shkaktojë ngarkesë të madhe në rrjetet e internetit, pasi miliona përdorues pritet ta shkarkojnë ose ta aktivizojnë lojën në të njëjtën kohë.
GTA 6 do të lansohet zyrtarisht më 19 nëntor 2026, për PlayStation 5 dhe Xbox Series X/S, plot 13 vjet pas debutimit të GTA 5 në shtator të vitit 2013.
Loja e re e Rockstar Games është ndër titujt më të pritur në historinë e industrisë së videolojërave dhe tashmë ka vendosur rekorde të rëndësishme, ende pa u lansuar. /Telegrafi/