Finlanda ka hedhur poshtë kategorikisht një kërkesë të raportuar të Rusisë që ajo të largohet nga NATO, si pjesë e kushteve të mundshme për një marrëveshje paqeje në Ukrainë. Ministri finlandez i Mbrojtjes, Antti Häkkänen, ka deklaruar se anëtarësimi i vendit të tij në aleancë nuk është dhe nuk mund të jetë objekt negociatash.
“Çështje të tilla nuk janë në asnjë mënyrë çështje negociatash. Rusia e di këtë. Është absolutisht skandaloze të sugjerohet një gjë e tillë”, u tha Häkkänen gazetarëve të premten.
Finlanda, e cila ndan një kufi prej 1,340 kilometrash me Rusinë, iu bashkua NATO-s në vitin 2023, duke braktisur politikën e saj të mëparshme të mosangazhimit ushtarak. Ky ndryshim historik erdhi si pasojë e pushtimit të plotë të Ukrainës nga Rusia.
Gazeta gjermane Bild raportoi se një propozim rus, i paraqitur gjatë bisedimeve të mbajtura këtë javë në Abu Dhabi, përfshinte disa kërkesa të rëndësishme territoriale dhe të sigurisë. Sipas raportimit, Moska kërkonte të mbante territoret ukrainase që ka pushtuar, të merrte nën kontroll sipërfaqe të tjera, si dhe të çmilitarizoheshin portet e Ukrainës.
Në të njëjtin propozim, sipas Bild, Rusia kërkonte edhe largimin e bazave të NATO-s nga vendet baltike dhe tërheqjen e Finlandës nga aleanca ushtarake.
Në këmbim, Moska thuhet se kishte propozuar tërheqjen e armëve të saj bërthamore nga Bjellorusia dhe heqjen dorë nga vendosja e raketave me rreze të mesme veprimi në këtë shtet.
Megjithatë, ende nuk është e qartë se cilat prej këtyre propozimeve do të mbështeteshin nga presidenti rus, Vladimir Putin, pas diskutimeve mes ndërmjetësve.
Ndërkohë, presidenti ukrainas Volodymyr Zelenskyy ka paralajmëruar se një kuadër i ri i sigurisë për Evropën pas përfundimit të luftës, i propozuar nga amerikanët, mund të paraqesë rreziqe.
“Rusia sigurisht që nuk mund të marrë vendime në emër të të gjitha shoqërive që janë anëtare të NATO-s”, u tha Zelenskyy gazetarëve të premten.
Deklarata e tij nuk ishte një përgjigje e drejtpërdrejtë ndaj kërkesave të raportuara nga Bild, por erdhi pas takimit që ai zhvilloi të enjten në Dublin me të dërguarit amerikanë Steve Witkoff dhe Jared Kushner.
Zelenskyy ka theksuar se synimet e Putinit për ndryshimin e kufijve në Evropë përbëjnë një kërcënim serioz për sigurinë e kontinentit.
“Dëshira e Putinit për të ndryshuar kufijtë në Evropë është një fakt. Jam i sigurt se kjo është pjesë e konceptit të tij për rishikimin e garancive të sigurisë në Evropë. Kjo është e rrezikshme sepse, sipas mendimit tim, janë pikërisht gjëra të tilla që çojnë në luftëra ose përshkallëzime”, tha Zelensky.
Sinjali – aty ku e vërteta flet para lajmit!
Burimi: Sinjali