E ardhmja e Edon Zhegrovës te Juventusi po bëhet gjithnjë e më e paqartë, pasi futbollisti kosovar vazhdon të ketë pak hapësirë në skuadrën italiane. Në prag të afatit kalimtar të janarit, tri klube raportohet se kanë shprehur interesim për ta transferuar atë.
Sipas raportimeve të mediumit italian “TMW”, në mesin e klubeve të interesuara janë Al-Ittihad nga Arabia Saudite, Monaco nga Franca dhe Besiktas nga Turqia.
Al-Ittihad thuhet se kishte shfaqur interesim për Zhegrovën edhe në fund të afatit kalimtar të verës dhe tashmë është rikthyer në garë, veçanërisht pas lëndimit të anësorit Roger Fernandes.
Ndërkohë, edhe Monaco dhe Besiktas po e përcjellin situatën e futbollistit kosovar, i cili nuk ka arritur të sigurojë një vend në formacionin titullar të Juventusit.
Zhegrova iu bashkua klubit italian në verën e vitit 2025, në një marrëveshje prej 15 milionë eurosh, plus bonuse. Megjithatë, problemet fizike dhe konkurrenca në skuadër kanë bërë që ai të ketë minutazh të kufizuar.
Sezonin e kaluar, kosovari regjistroi 19 paraqitje në kampionat, të gjitha si zëvendësues, ndërsa edhe nëntë paraqitjet e tij në sezonin aktual 2026/27 kanë qenë nga banka rezervë.
Një nga paraqitjet e tij më të gjata në kohët e fundit ishte ajo me fanellën e Kosovës kundër Izraelit, ku luajti 82 minuta në barazimin 0-0.
Mbetet të shihet nëse afati kalimtar i janarit do të sjellë ndryshim për Zhegrovën dhe nëse ai do të vendosë të largohet nga Juventusi për të gjetur më shumë hapësirë në një klub tjetër.
Sinjali – aty ku e vërteta flet para lajmit!
Burimi: Sinjali