Kryetari i Aleancës, Ardian Gjini, ka reaguar ashpër pas interpretimit të një kënge nacionaliste serbe në hapjen e Forumit të Zgjerimit të Bashkimit Evropian, aktivitet i organizuar nga Komisioni Evropian dhe komisionerja për Zgjerim, Marta Kos.
Gjini e ka cilësuar këtë veprim si fyerje të rëndë ndaj shtetit të Kosovës, duke kërkuar llogari dhe sqarim zyrtar nga Brukseli për atë që ai e ka quajtur lëshim të papranueshëm.
“Brukseli duhet të japë sqarim për këtë lëshim”, ka theksuar kreu i Aleancës.
Kritika ndaj BE-së dhe akuzat për amatorizëm ndaj Qeverisë së Kosovës
Sipas Gjinit, Bashkimi Evropian përmes kësaj ngjarjeje ka treguar se nuk po e merr seriozisht Kosovën, por ai ka adresuar përgjegjësi të drejtpërdrejtë edhe te Qeveria e Kosovës.
Ai vlerësoi se diplomacia e dështuar, raportet e dëmtuara me aleatët ndërkombëtarë dhe mungesa e Kosovës në tavolinat kryesore vendimmarrëse kanë krijuar terren të përshtatshëm për provokime të tilla në skenën evropiane.
Kërkesa për reagim urgjent institucional
Gjini ka kërkuar reagim urgjent nga institucionet e Kosovës në rrugë zyrtare, duke paralajmëruar se papërgjegjësia në udhëheqjen e shtetit po sjell pasoja të rënda për vendin.
“Kur udhëheqja jonë e trajton shtetin me amatorizëm, çmimin e paguan krejt Kosova”, ka përfunduar Gjini.
Sinjali – aty ku e vërteta flet para lajmit!
Burimi: Sinjali