Kurti paralajmëron rishikimin e marrëveshjes së Brukselit për energjinë nëse Serbia nuk i liron linjat e transitit

Kurti paralajmëron rishikimin e marrëveshjes së Brukselit për energjinë nëse Serbia nuk i liron linjat e transitit

Written by

in

Kryeministri i Kosovës, Albin Kurti, ka paralajmëruar se nëse Serbia nuk reflekton lidhur me bllokimin e linjave të transitit të energjisë, Qeveria e Kosovës do të shqyrtojë përshkallëzimin e kundërmasave, përfshirë edhe rishikimin e tërësishëm të zbatimit të marrëveshjes së Brukselit për energjinë.

Kurti ka bërë të ditur se, si kundërmasë ndaj bllokimit të transitit të energjisë nga Serbia, Qeveria ka vendosur të ndalojë tregtimin e energjisë elektrike me ndërmarrjet e regjistruara në Serbi ose që kanë pronarë shtetas të Serbisë.

Megjithatë, ai ka sqaruar se përjashtim nga kjo masë do të bëhet për furnizuesin e themeluar në bazë të marrëveshjes së Brukselit për energjinë.

Kurti ka paralajmëruar se Ministria e Ekonomisë do ta përcjellë vazhdimisht situatën dhe, nëse nuk ka reflektim nga Beogradi zyrtar, në të ardhmen mund të ndërmerren masa të tjera.

“Ministria e Ekonomisë obligohet që ta përcjellë situatën dhe, nëse nuk do të ketë reflektim nga ana e Beogradit zyrtar, në të ardhmen do të konsiderojmë përshkallëzimin e masave, duke përfshirë edhe masa që do të mund të prekin furnizuesin e marrëveshjes me Brukselin, si dhe rishqyrtimin e tërësishëm të zbatimit të marrëveshjes së Brukselit për energjinë”, ka deklaruar Kurti.

Ai ka shpjeguar se bllokimi i transitit të energjisë nga Serbia i ka shkaktuar Kosovës pasoja të konsiderueshme, duke përmendur rastet kur mbingarkesa e linjave me shtetet e tjera, si Mali i Zi dhe Maqedonia e Veriut, ka ndikuar në rritjen e jashtëzakonshme të çmimeve të energjisë.

Sipas tij, më 14 dhe 20 janar të këtij viti, për shkak të këtyre vështirësive, ishte pamundësuar sigurimi i energjisë elektrike, duke e detyruar KOSTT-in të aplikonte reduktime.

Kurti ka thënë se që nga marrja e detyrës në muajin mars, Qeveria ka bërë përpjekje për të siguruar mbështetjen e partnerëve ndërkombëtarë, me qëllim që të ushtrohet presion ndaj Serbisë për lirimin e linjave të transitit.

Ai ka rikujtuar se në dhjetor të vitit të kaluar, Këshilli i Ministrave i Komunitetit të Energjisë kishte konstatuar shkeljen e Traktatit të Komunitetit të Energjisë nga Serbia dhe i kishte kërkuar asaj lirimin e linjave më së largu deri më 1 korrik të këtij viti.

Megjithatë, sipas Kurtit, ky vendim nuk është zbatuar, ndonëse kanë kaluar katër muaj e gjysmë nga afati i përcaktuar. Ai ka shtuar se Kosova ka kërkuar edhe ndërmjetësimin e Bashkimit Evropian për zgjidhjen e çështjes, por kjo përpjekje nuk ka sjellë rezultate./EO

Burimi: Dukagjini