Një video e shkurtër në New York e ka kthyer kryetarin e Prishtinës, Përparim Ramën, në temë diskutimi në Kosovë.
Krejt nisi me një pyetje të thjeshtë: “Me çka merresh?”
Atë ia bëri Feroz Khan Zadran, influenceri i famshëm që ndal kalimtarët dhe i interviston.
Rama i tregoi se është kryetar i Prishtinës.
Pastaj tha se synimi i tij i ardhshëm është të bëhet kryeministër i Kosovës.
Ai e goditi edhe Albin Kurtin, duke thënë se kryeministri aktual “nuk po bën punë të mirë.”
Videoja menjëherë mori hov në rrjete dhe nxiti reagime.
Por kush është njeriu me mikrofon që e nxori këtë deklaratë?
Nga policia te miliona shikime
Feroz Khan, i njohur në Instagram si @khann_journey, nuk e ka nisur karrierën si gazetar apo personazh televiziv.
Sipas biografisë në faqen e tij, ai ka studiuar infermieri, ka shërbyer në Policinë e New Yorkut dhe ka punuar edhe në arsim.
Ka folur gjithashtu për vështirësi financiare, përkujdesjen ndaj nënës dhe probleme shëndetësore.
Më pas nisi të bënte diçka fare të thjeshtë: dilte në rrugë, i ndalte njerëzit dhe i pyeste se si e fitonin bukën.
Pyetja e tij e famshme është: “What do you do for a living?” – “Me çka merresh për të nxjerrë jetesën?”.
Intervistat i bën kryesisht në Manhattan, sidomos në Bleecker Street.
Zakonisht nis me një kompliment për veshjen, pastaj pyet për punën dhe jetën.
Ndonjëherë përballë ka njerëz të zakonshëm.
Herë të tjera, biznesmenë apo emra të njohur të filmit dhe muzikës.
Nga Jennifer Lopez te Përparim Rama
Në videot e tij janë shfaqur Jennifer Lopez dhe aktori Willem Dafoe.
Ai ka intervistuar edhe këngëtaren argjentinase María Becerra.
Intervista me Becerrën, në shkurt 2026, u bë lajm edhe në median argjentinase Infobae.
Khan ka mbi një milion ndjekës në Instagram, ndërsa videot e tij mbledhin miliona shikime.
Ai njihet edhe si “Mbreti i Bleecker Street”.
Rasti i Ramës tregoi se një intervistë rrugësh mund të sjellë edhe deklarata politike.
Një pyetje që zakonisht zbulon profesionin e një kalimtari, këtë herë zbuloi ambicien e Përparim Ramës: të marrë drejtimin e Qeverisë së Kosovës.
Sinjali – aty ku e vërteta flet para lajmit!
The post Nga Jennifer Lopez te Përparim Rama: Kush është Feroz Khan, influenceri që i ndal njerëzit rrugëve të New Yorkut? appeared first on Sinjali.
Burimi: Sinjali