Mbrojtësi i Kosovës dhe Hoffenheimit, Albian Hajdari, i është nënshtruar ndërhyrjeve kirurgjikale në të dyja këmbët pas lëndimeve të pësuara së fundmi.
Hajdari është operuar në meniskun e gjurit të majtë dhe në shputën e këmbës së djathtë. Lëndimin në shputë e pësoi gjatë një stërvitjeje me Hoffenheimin, ndërsa problemin me meniskun gjatë grumbullimit të fundit të Kombëtares së Kosovës.
Futbollistin e ka vizituar të enjten kryetari i Federatës së Futbollit të Kosovës (FFK), Agim Ademi, i cili i ka uruar rehabilitim të suksesshëm dhe rikthim sa më të shpejtë në fushë.
Hajdari debutoi me Kosovën në tetor të vitit të kaluar dhe që atëherë është bërë një nga lojtarët e rëndësishëm të mbrojtjes së “Dardanëve”. Ai ka zhvilluar tetë ndeshje me fanellën e Kosovës, pasi më parë kishte luajtur një ndeshje për kombëtaren A të Zvicrës.
Sinjali – aty ku e vërteta flet para lajmit!
Burimi: Sinjali