Author: Momenti

  • Punoni përballë dritares? Me gjasë keni edhe këto 3 zakone pune

    Punoni përballë dritares? Me gjasë keni edhe këto 3 zakone pune

    Sipas ekspertëve të psikologjisë dhe sjelljes, mënyra si e organizoni hapësirën e punës në shtëpi mund të tregojë shumë për stilin tuaj të produktivitetit

    Gjithmonë kam pasur zili tavolinën ikonike të shkrimit të Carrie Bradshaw pranë dritares dhe mënyrën se si ajo punonte nga shtëpia ndërsa jashtë zhvillohej gjithë ritmi i gjallë i Nju Jorkut. Por rezulton se kjo mënyrë e organizimit të hapësirës mund të ndihmojë vërtet produktivitetin.

    Ekspertë të psikologjisë dhe sjelljes thonë se njerëzit që preferojnë të punojnë pranë një dritareje shpesh kanë disa zakone të përbashkëta: bëjnë mikro-pauza, përdorin dritën natyrale si orientim gjatë ditës dhe preferojnë hapësira që nuk duken të mbyllura.

    1. Bëni mikro-pauza

    Këto momente shumë të shkurtra pushimi mund t’ju japin pikërisht shtysën që ju duhet për t’u përqendruar sërish.

    “Puna përballë një dritareje u jep njerëzve mundësinë të ndalen herë pas here dhe të shikojnë diçka jashtë – pemë, re, njerëz, makina apo lëvizje të tjera – qoftë edhe vetëm për një minutë”, shpjegon psikologia e licencuar Dr. Shannon Franklin.

    Sipas saj, kjo është një mënyrë natyrale për të bërë një pushim të vogël gjatë punës dhe mund ta ndihmojë mendjen të rifitojë përqendrimin.

    Foto: William Jess Laird

    Edhe një hapësirë pune shumë e vogël mund të përfitojë nga kjo, për sa kohë ka një dritare që lejon syrin dhe mendjen të shkëputen për pak çaste nga ekrani.

    2. Përdorni dritën natyrale si sinjal

    Kur dielli nis të perëndojë dhe dita errësohet, trupi merr sinjalin se orari i punës po i afrohet fundit.

    Psikiatri Dr. Robert Davies thotë se njerëzit që punojnë përballë dritares priren ta përdorin dritën natyrale si një lloj orientimi për organizimin e rutinës së punës nga shtëpia.

    “Kjo mënyrë e organizimit u lejon atyre ta shfrytëzojnë sa më shumë dritën e diellit”, shpjegon ai.

    Foto: Derek Swalvell. Design: Zen Architects

    Drita natyrale është një nga sinjalet kryesore të mjedisit që ndikojnë në ritmin cirkadian, pra në orën e brendshme biologjike që ndihmon trupin të kuptojë kur duhet të jetë zgjuar dhe kur duhet të përgatitet për gjumë.

    Pikërisht për këtë arsye, gjatë muajve të dimrit, kur ka më pak dritë natyrale, mund të jetë e dobishme të rishikohet ndriçimi i zyrës në shtëpi dhe të përdoren burime drite që e bëjnë hapësirën më të ndritshme.

    3. Preferoni një hapësirë më pak të mbyllur

    Për shumë njerëz që punojnë nga shtëpia, dritarja nuk shërben vetëm për të zvogëluar monotoninë ose për të krijuar shpërqendrime të vogla të dobishme.

    “Për shumë punonjës në distancë, të kesh një dritare nga e cila mund të shikosh jashtë lidhet po aq, ose edhe më shumë, me ndjesinë e hapësirës së hapur”, thotë Davies.

    Foto: Studio DB

    Një pamje nga jashtë krijon ndjesinë se nuk jeni “të bllokuar” brenda shtëpisë. Kjo mund të jetë veçanërisht e dobishme për njerëzit që nuk janë mësuar të kalojnë shumë orë ulur në të njëjtin vend.

    Megjithatë, në ditët shumë të ndritshme, drita e fortë mund të bëhet e bezdisshme. Në këto raste, perde të lehta dhe gjysmëtransparente mund të ndihmojnë që të ruhet ndriçimi natyral pa krijuar shkëlqim të tepërt.

    Në fund, vendosja e tavolinës përballë ose pranë dritares mund të duket si një zgjedhje thjesht estetike, por mund të ndikojë edhe në mënyrën si punoni. Mikro-pauzat, orientimi sipas dritës së ditës dhe ndjesia e një hapësire më të hapur janë tri arsye pse kjo mënyrë organizimi mund t’i përshtatet shumë mirë njerëzve që punojnë nga shtëpia. /Telegrafi/

  • A mund t’i duash fëmijët njësoj, por të mos i kesh njësoj për zemër?

    A mund t’i duash fëmijët njësoj, por të mos i kesh njësoj për zemër?

    Fëmijët kanë karaktere, nevoja dhe faza të ndryshme të zhvillimit, ndaj edhe marrëdhënia e prindit me secilin mund të jetë ndryshe. E rëndësishme është që këto ndjenja të mos kthehen në trajtim të pabarabartë

    Një pyetje e sinqertë e një prindi ka nxitur debat të madh në internet. Ai pranoi se i do të gjithë fëmijët e tij njësoj, por se nuk i ka të gjithë njësoj për zemër. Pikërisht kjo sinqeritet bëri që shumë prindër të tjerë të ndanin përvojat e tyre dhe të pranonin se edhe ata, në momente të ndryshme, e kanë ndier diçka të ngjashme.

    Dashuria ndaj fëmijëve nuk është e njëjtë me kënaqësinë që ndiejmë në shoqërinë e tyre

    Prindi që nisi debatin tregoi se ishte rritur në një familje relativisht të madhe dhe gjithmonë kishte besuar se prindërit i donin të gjithë fëmijët njësoj. Vetëm pasi u bë vetë prind, kuptoi se kjo ndoshta ishte e vërtetë.

    Por ai kuptoi edhe diçka tjetër: mund t’i duash të gjithë fëmijët njësoj, pa e pasur domosdoshmërisht të njëjtën afërsi me secilin prej tyre.

    Një fëmijë mund t’i ngjajë shumë prindit në karakteristika që ai i vlerëson edhe te vetja. Një tjetër mund ta kujtojë për tipare që vetë prindi nuk i pëlqen. Ka edhe fëmijë që, për shkak të temperamentit, fazës së zhvillimit apo sjelljeve të caktuara, kërkojnë shumë më tepër durim dhe energji.

    Autori i postimit e përshkroi njërin prej fëmijëve si emocionalisht shumë kërkues, ndërsa për një tjetër tha se gënjen shpesh, futet në telashe dhe konfliktohet me motrat e vëllezërit.

    Megjithatë, ai këmbënguli se i do të gjithë njësoj. Vështirësia, sipas tij, është se nuk ndihet njësoj mirë në shoqërinë e secilit, transmeton Telegrafi.

    Të jesh prind i mirë nuk do të thotë të shijosh çdo moment

    Pikërisht kjo ndjenjë i kishte shkaktuar atij më parë faj. Me kalimin e kohës, ai arriti në përfundimin se prindi nuk duhet domosdoshmërisht të jetë shoku më i mirë i fëmijës.

    Roli i tij është ta dojë, ta edukojë dhe ta përgatisë për një jetë të pavarur. Kjo do të thotë se prindi mund të mos kënaqet me çdo sjellje apo me çdo fazë që kalon fëmija, pa e dashur atë më pak.

    Edhe shumë komentues u pajtuan me këtë. Disa thanë se i duan të gjithë fëmijët njësoj, por se secili prej tyre mund t’i nxjerrë nga durimi në mënyra të ndryshme.

    Të tjerë treguan se fëmija që atë ditë u duket “më i dashur” mund të ndryshojë nga dita në ditë, madje edhe nga ora në orë.

    Mosha dhe faza e zhvillimit ndryshojnë marrëdhënien

    Një rol të madh luan edhe mosha. Nuk është gjithmonë e lehtë të kënaqesh në shoqërinë e një fëmije që po kalon një periudhë sfiduese, qoftë ai i vogël, në fazën e shpërthimeve emocionale, apo adoleshent që kërkon më shumë pavarësi dhe kundërshton më shpesh.

    Kjo nuk do të thotë se dashuria është më e vogël. Mund të nënkuptojë vetëm se marrëdhënia në atë periudhë kërkon më shumë përpjekje.

    Por ekziston një kufi shumë i rëndësishëm

    Shumë prindër që e kuptuan autorin e postimit theksuan megjithatë një gjë: fëmijët mund ta ndiejnë kur njëri prej tyre preferohet, vlerësohet apo trajtohet më mirë.

    Një komentues paralajmëroi se prindi duhet të kujdeset që ndjenjat e veta të mos shndërrohen në sjellje të dukshme para fëmijëve. Të tjerë kujtuan se sa e dhimbshme mund të jetë të rritesh me bindjen se motra apo vëllai është “i preferuari” i prindit.

    Disa njerëz ndanë edhe përvoja personale, duke thënë se e kishin ndier që në fëmijëri se nëna apo babai i donte sepse ishin fëmijët e tyre, por nuk i pëlqente domosdoshmërisht si persona.

    Dashuria mund të jetë e njëjtë, por marrëdhënia ndryshe

    Autorja e tekstit, nënë e pesë fëmijëve, dha një këndvështrim tjetër: ajo nuk do të thoshte se i do fëmijët në mënyrë të pabarabartë, por se i do në mënyra të ndryshme, sepse secili është person më vete.

    Ndonjëherë problemi nuk është te vetë fëmija, por te një sjellje konkrete ose te faza që po kalon.

    Prindi mund t’i thotë fëmijës: “Do të të dua gjithmonë, por nuk më pëlqen ajo që po bën tani.”

    Ky është një dallim i rëndësishëm: është e mundur ta duash fëmijën pa kushte dhe njëkohësisht të mos e miratosh sjelljen e tij.

    Prindërimi kërkon vetëdije dhe barazi

    Në fund, prindërimi mbetet një proces i vazhdueshëm reflektimi. Fëmijët kanë karaktere, nevoja dhe faza të ndryshme, ndaj edhe marrëdhënia me secilin mund të jetë ndryshe.

    Më e rëndësishmja është që prindi të jetë i vetëdijshëm për ndjenjat e veta dhe të mos lejojë që ato të kthehen në trajtim të pabarabartë.

    Mund t’i duash fëmijët njësoj, edhe kur me secilin prej tyre krijon një lidhje krejtësisht të ndryshme. /Telegrafi/

  • Zemra mund të mbetet pa oksigjen pa dhimbje: Çfarë është ishemia e heshtur e miokardit

    Zemra mund të mbetet pa oksigjen pa dhimbje: Çfarë është ishemia e heshtur e miokardit

    Mungesa e dhimbjes në gjoks nuk e përjashton problemin me furnizimin e zemrës me gjak dhe oksigjen. Ishemia e heshtur mund të kalojë pa simptoma, ndaj vlerësimi i faktorëve të rrezikut dhe kontrolli mjekësor kanë rëndësi të veçantë

    Mungesa e dhimbjes në gjoks nuk do të thotë domosdoshmërisht se muskuli i zemrës po merr mjaftueshëm gjak dhe oksigjen. Ishemia e heshtur e miokardit nënkupton furnizim të pamjaftueshëm të zemrës me oksigjen, të konfirmuar me ekzaminime, edhe pse personi nuk ka simptoma të dallueshme. Për këtë arsye, vlerësimi i rrezikut dhe trajtimi i duhur kanë rëndësi edhe kur njeriu ndihet mirë.

    Çfarë ndodh në zemër kur nuk ka dhimbje apo paralajmërime?

    Muskuli i zemrës furnizohet me oksigjen përmes arterieve koronare. Kur qarkullimi i gjakut nuk i plotëson nevojat e tij, shfaqet ishemia e miokardit. Në formën e heshtur mungojnë dhimbja në gjoks dhe simptomat e tjera që zakonisht do ta paralajmëronin pacientin.

    Një shkak i shpeshtë është ateroskleroza, pra grumbullimi i pllakave në muret e arterieve, të cilat e ngushtojnë hapësirën e tyre. Kur gjatë aktivitetit zemra ka nevojë për më shumë oksigjen, qarkullimi i kufizuar mund të mos jetë i mjaftueshëm. Ishemia mund të lidhet edhe me çrregullime të enëve të vogla të gjakut ose me spazma të arterieve koronare.

    Ishemia e heshtur dhe infarkti i heshtur nuk janë e njëjta gjë. Ishemia nënkupton furnizim të pamjaftueshëm me oksigjen, ndërsa infarkti nënkupton vdekjen e një pjese të muskulit të zemrës si pasojë e ishemisë. Prandaj, zbulimi i ishemisë së heshtur nuk do të thotë automatikisht se personi ka kaluar infarkt.

    Kush është më i rrezikuar dhe pse diabeti kërkon vëmendje

    Diabeti rrit rrezikun për sëmundje koronare dhe, te disa pacientë, mund ta dobësojë edhe perceptimin e dhimbjes. Një shpjegim i mundshëm është dëmtimi i nervave që marrin pjesë në përcjelljen e sinjaleve nga zemra. Megjithatë, mekanizmat që bëjnë që ishemia te një person të shkaktojë dhimbje, ndërsa te një tjetër të kalojë pa u vërejtur, nuk janë sqaruar plotësisht.

    Episodet e heshtura mund të ndodhin edhe te persona që nuk kanë pasur kurrë anginë, por edhe te ata që kanë kaluar infarkt ose kanë herë pas here dhimbje nga sëmundja koronare. Te i njëjti pacient mund të alternohen episode me dhe pa dhimbje.

    Në vlerësimin e rrezikut rëndësi kanë edhe duhanpirja, tensioni i lartë i gjakut, kolesteroli i lartë dhe historia familjare e sëmundjeve të hershme të zemrës. Sëmundja kronike e veshkave e rrit më tej rrezikun kardiovaskular, transmeton Telegrafi.

    Si zbulohet ishemia e heshtur?

    Diagnoza kërkon prova objektive se, në rrethana të caktuara, muskuli i zemrës nuk po merr mjaftueshëm oksigjen. Në varësi të gjendjes klinike mund të përdoren testi i ngarkesës fizike, stres-ekokardiografia ose ekzaminimet e perfuzionit të miokardit.

    Një EKG normal në qetësi nuk e përjashton isheminë që shfaqet vetëm herë pas here ose gjatë aktivitetit.

    CT-koronarografia dhe koronarografia invazive tregojnë kryesisht gjendjen e arterieve koronare dhe ngushtimet e mundshme. Rezultatet interpretohen së bashku me funksionin e zemrës dhe, kur është e nevojshme, me testet që vlerësojnë isheminë.

    Jo çdo pacient ka nevojë për çdo ekzaminim dhe jo çdo ngushtim i arteries do të thotë domosdoshmërisht se ekziston ishemi.

    Studimi i randomizuar DIAD, ku morën pjesë 1.123 persona me diabet tip 2 pa simptoma të sëmundjes koronare, tregoi se testimi rutinë i perfuzionit të zemrës nuk e uli ndjeshëm numrin e infarkteve apo vdekjeve nga shkaqet kardiake gjatë rreth pesë vjetëve ndjekje. Kjo mbështet qasjen që pacientët me diabet, por pa simptoma, të mos dërgohen automatikisht për ekzaminime të ishemisë, ndërsa kontrolli i faktorëve të rrezikut mbetet thelbësor.

    Sa e rrezikshme është dhe kur nevojitet stent apo bypass?

    Sëmundja koronare mund të mbetet e pazbuluar deri në shfaqjen e infarktit apo arrestit kardiak. Ishemia mund të kontribuojë edhe në çrregullime të rrezikshme të ritmit të zemrës, por rreziku individual varet nga shumë faktorë dhe jo vetëm nga prania ose mungesa e dhimbjes.

    Trajtimi përshtatet sipas ndryshimeve në enët e gjakut, funksionit të zemrës dhe sëmundjeve të tjera. Ai mund të përfshijë barna që zvogëlojnë isheminë, ulin kolesterolin dhe kontrollojnë tensionin, si dhe terapi antiagregante kur ekziston indikacioni.

    Aspirina dhe barna të tjera nuk duhet të fillohen pa këshillën e mjekut, sepse përfitimi duhet të peshohet kundrejt rrezikut të gjakderdhjes.

    Zbulimi i ishemisë së heshtur nuk do të thotë automatikisht se duhet stent ose bypass. Vendimi varet nga vendndodhja dhe shkalla e ngushtimit, funksioni i barkushes së majtë dhe përfitimi i pritshëm nga ndërhyrja.

    Çfarë mund të bëni?

    Masat më të rëndësishme janë ndërprerja e duhanit, kontrolli i tensionit, kolesterolit dhe sheqerit në gjak, ushqyerja e shëndetshme dhe ruajtja e peshës së përshtatshme. Aktiviteti fizik duhet t’i përshtatet gjendjes shëndetësore dhe planit të dakorduar me mjekun.

    Nëse shfaqen presion i ri në gjoks, gulçim i papritur, djersë të ftohta ose dobësi e theksuar, nuk duhet pritur domosdoshmërisht dhimbje e fortë. Këto mund të jenë shenja të një problemi akut të zemrës dhe kërkojnë vlerësim urgjent.

    Nëse dyshohet për infarkt, duhet thirrur urgjenca dhe pacienti nuk duhet të vozisë vetë deri në spital. /Telegrafi/

  • Ish-kancelari gjerman punësohet në Rusi

    Ish-kancelari gjerman punësohet në Rusi

    Ish-kancelari gjerman, Gerhard Schröder është emëruar në bordin mbikëqyrës të Hyperglobus, kompanisë që operon në Rusi me zinxhirin e supermarketeve Globus. Ai do të angazhohet në zhvillimin strategjik dhe drejtimin e përgjithshëm të biznesit.

    Hyperglobus u shkëput nga kompania gjermane Globus Holding në vitin 2025 dhe tashmë operon në mënyrë të pavarur në Rusi, megjithëse vazhdon të përdorë markën Globus. Kompania ka 22 dyqane në tetë rajone ruse.

    Pronari i Hyperglobus, Thomas Bruch, e cilësoi Schröderin si një shtesë të rëndësishme në bord, duke përmendur përvojën e tij shumëvjeçare në çështjet politike dhe ekonomike të Rusisë, shkruan moscow times.

    Sipas tij, ish-kancelari do të ndihmojë kompaninë të ruajë një qasje të orientuar drejt dialogut dhe të gjejë zgjidhje konstruktive në kushtet aktuale.

    Schröder, i cili ishte kancelar i Gjermanisë nga viti 1998 deri më 2005, ka mbajtur prej vitesh marrëdhënie të afërta me presidentin rus Vladimir Putin. Pas largimit nga politika, ai mori poste drejtuese në kompani të lidhura me sektorin energjetik rus, përfshirë Rosneft dhe projektin Nord Stream.

    Vetë Schröder ka theksuar rëndësinë e vazhdimit të marrëdhënieve ekonomike me Rusinë, veçanërisht në sektorin ushqimor.

    Emërimi i tij vjen në një periudhë kur Moska po vendos nën administrim të përkohshëm shtetëror asetet e disa kompanive të huaja. Vetëm pak ditë para emërimit të Schröderit, Rusia vendosi nën administrim të përkohshëm asetet ruse të gjigantit gjerman Metro.

    Në maj të këtij viti, Putin e kishte përmendur Schröderin si personin me të cilin do të preferonte të zhvillonte negociata nga pala evropiane. Bashkimi Evropian e kishte kundërshtuar këtë ide

  • “Zonjat në video duhet të mbajnë përgjegjësi”, Selin Bollati: Kam dëgjuar se bashkëshortja e zotit Hila po i qëndron pranë në këto momente

    “Zonjat në video duhet të mbajnë përgjegjësi”, Selin Bollati: Kam dëgjuar se bashkëshortja e zotit Hila po i qëndron pranë në këto momente

    Mbrëmjen e së premtes ka nisur sezoni i ri i emisionit “Goca dhe Gra” në Top Channel, me katër bashkëmoderatore në tryezë. Kësaj here, Ori Nebijajt dhe Ema Andreas u janë bashkuar Selin Bollati dhe Orinda Huta.

    Pjesa e parë e programit u fokusua te diskutimi rreth publikimit dhe shpërndarjes në rrjet të videove intime, ku janë përfshirë disa personazhe të njohura të ekranit.

    Gjatë diskutimit, Selin Bollati rikujtoi rastin e Beatriks Ramosajt në edicionin e parë të “Big Brother VIP”, duke argumentuar se mënyra se si shoqëria reagoi ndaj saj në atë kohë tregon, sipas saj, një standard të dyfishtë në mënyrën se si gjykohen situata të ndryshme.

    “Jemi shoqëri hipokrite, nuk i trajtojmë të gjitha situatat njësoj. Beatriks në atë rast u kryqëzua dhe nuk u la gjë pa u thënë”, u shpreh Selin.

    Ajo argumentoi se, edhe pse nuk është dakord me linçimin e grave të përfshira në videot intime, duhet të diskutohet edhe përgjegjësia e personave që kanë qenë pjesë e marrëdhënieve të tilla.

    “Nuk po themi që t’i kryqëzojmë, përgjegjësia të ndahet, duhet të mbajnë përgjegjësi”, tha ajo.

    Selin iu referua gjithashtu situatës familjare të kompozitorit Adrian Hila, duke thënë se, sipas informacioneve që kishte dëgjuar, bashkëshortja e tij po i qëndronte pranë gjatë kësaj periudhe. Ajo e përshkroi rastin si një situatë ku, sipas saj, nuk mund të përdoret thjesht termi “gabim”, duke pasur parasysh moshën e personave të përfshirë.

    Në anën tjetër, Orinda Huta kundërshtoi paralelizmin me rastin e Beatriks Ramosajt, duke argumentuar se fakti që një person është gjykuar ashpër në të kaluarën nuk do të thotë se shoqëria duhet të përsërisë të njëjtën sjellje.

    “Nuk mund t’i paralelizojmë. Se kryqëzuam Beatriks, nuk mund ta bëjmë edhe tani. A nuk kemi të drejtë të ndryshojmë?”, tha Orinda.

    Ajo shtoi se jeta dhe marrëdhëniet njerëzore nuk mund të shihen si një vijë e drejtë dhe se nuk është e drejtë që të përsëriten të njëjtat forma gjykimi ndaj grave të përfshira në situatën aktuale.

  • “Do të zgjidhet në mënyrën e lehtë ose të vështirë” – Trump paralajmëron një vendim për Iranin

    “Do të zgjidhet në mënyrën e lehtë ose të vështirë” – Trump paralajmëron një vendim për Iranin

    Presidenti amerikan Donald Trump dha të shtunën sinjale se mund të merret një vendim lidhur me rifillimin e mundshëm të operacioneve ushtarake kundër Iranit.

    “Kam një vendim për të marrë lidhur me Iranin”, u tha Trump gazetarëve ndërsa largohej nga Shtëpia e Bardhë për një tur elektoral në mbështetje të kandidatëve republikanë për zgjedhjet e ndërmjetme në Ohio.

    “Irani është shkatërruar. Kështu që pyetja e vetme është: do të zgjidhet në mënyrën e lehtë apo atë të vështirë? Do të shkojë ose në mënyrën e lehtë, ose në atë të vështirë”, citohet të ketë thënë presidenti amerikan.

    Trump shtoi se Irani po heq dorë “praktikisht” nga çdo plan për të siguruar armë bërthamore.

    Të premten, portali Axios raportoi se këshilltarët kryesorë të Trumpit për sigurinë kombëtare u takuan fshehurazi në Camp David për të diskutuar opsionet e SHBA-së lidhur me Iranin dhe konfliktin saudito-houthi në Jemen.

    Irani po përgatit një përgjigje më të gjerë dhe më të fuqishme nëse Shtetet e Bashkuara rifillojnë sulmet ushtarake në shkallë të gjerë, thanë burime për Reuters, ndërkohë që vazhdon përpjekjet diplomatike, të cilat zyrtarët iranianë privatisht i konsiderojnë si të pasuksesshme.

    Planifikimi pasqyron bindjen brenda udhëheqjes iraniane se çdo fushatë e re amerikane duhet të përballet me një përgjigje më të fortë se më parë, edhe pse Teherani kërkon të shmangë përshkallëzimin përmes bisedimeve.

    Komandantët e lartë po shqyrtojnë planet për të zgjeruar objektivat e mundshëm – duke kaluar nga asetet e lidhura me SHBA-në te vendet që mbështesin operacionet ushtarake amerikane dhe ndoshta edhe te vendndodhje jashtë Lindjes së Mesme – sipas tre zyrtarëve të lartë iranianë dhe një burimi të brendshëm të njohur me diskutimet.

    Këto diskutime pasojnë shtatë muaj konflikti që nisi me sulmet amerikano-izraelite më 28 shkurt.

    Edhe pse një armëpushim i 8 prillit i dha fund luftës 40-ditore, armiqësitë kanë vazhduar në mënyrë sporadike që atëherë

  • Ylli i Nottingham Forestit assesi s’e pranon barazimin: Ankohet për fushën, lojën e deri tek VAR-i

    Ylli i Nottingham Forestit assesi s’e pranon barazimin: Ankohet për fushën, lojën e deri tek VAR-i

    Austriaku Xaver Schlager është ankuar për të gjitha gjërat e mundshme në përballjen ndaj Kosovës.

    Austria me fat mori një pikë ndaj Kosovës, sfidë ku epilogu përfundimtar rezultoi të jetë 1-1.

    Schlager pas ndeshjes për “ORF” shpërtheu në kritika lidhur me çdo situatë.

    “Në mendimin tim kjo ndeshje ishte afër limitit. Të luaje direkt ishte kompletisht e pamundur, secili top kërcente, nuk kishte të bënte me futboll”.

    “Ishte thjesht ta godisje topin përpara, të luftojë dhe të shpresoje se gjyqtari do të fishkëllonte diku. Më vjen keq për të gjithë për të gjithë ata që e kanë shikuar, ishte e tmerrshme”.

  • Moti nesër: Minus në mëngjes, diell gjatë ditës

    Moti nesër: Minus në mëngjes, diell gjatë ditës

    Ehëna do të nisë me temperatura nën zero, por gjatë ditës moti do të jetë kryesisht me diell.

    Sipas Institutit Hidrometeorologjik të Kosovës, gjatë ditës priten vranësira të pakta, ndërsa temperaturat minimale do të lëvizin nga -1 deri në 2°C.

    Temperaturat do të rriten ndjeshëm, me maksimalet që pritet të arrijnë nga 20 deri në 24°C.

  • Francë, deri në 500 shkolla mbyllen të hënën për shkak të protestave të nxënësve

    Francë, deri në 500 shkolla mbyllen të hënën për shkak të protestave të nxënësve

    Deri në 500 shkolla në Francë mund të mbyllen pjesërisht ose plotësisht të hënën, pas përleshjeve të ditëve të fundit mes policisë dhe nxënësve protestues, ka bërë të ditur ministri francez i Arsimit, Edouard Geffray.

    Sipas tij, mësimi do të pezullohet pjesërisht ose tërësisht në rreth 400 deri në 500 shkolla të mesme, pasi kushtet e sigurisë nuk janë përmbushur. Geffray tha gjithashtu se që nga fillimi i protestave, 24 shkolla janë djegur ose dëmtuar rëndë.

    Mijëra nxënës kanë protestuar për kushtet në arsim, ndërsa protestat e nisura javën e kaluar janë përhapur nga Parisi edhe në qytete të tjera, përfshirë Montpellier, Nantes dhe Marseille.

    Nxënësit kundërshtojnë mungesën e mësuesve, klasat e mbipopulluara dhe gjendjen e dobët të ndërtesave shkollore, shkruan BBC, transmeton Klankosova.tv.

    Ministri i Drejtësisë, Gerald Darmanin, tha të premten se 735 nga rreth 3,700 shkolla në Francë ishin prekur në një mënyrë apo tjetër nga protestat e dhunshme.

    Ndërkohë, ministri i Arsimit paralajmëroi se numri i shkollave të prekura të hënën mund të jetë i ngjashëm me atë të së premtes, por premtoi një rikthim gradual dhe të pjesshëm të mësimit.

    Geffray pretendoi se në protestat e nxënësve janë infiltruar edhe aktivistë, veçanërisht nga e majta ekstreme, të cilët sipas tij e kanë devijuar protestën dhe janë përfshirë në akte të dhunshme.