Qytetarët në Bullgari po votojnë në raundin e dytë të zgjedhjeve presidenciale, ku presidentja Iliana Iotova përballet me Andrey Gyurov, ish-kryeministër në detyrë dhe kandidat i mbështetur nga opozita pro-perëndimore.
Iotova, e cila favorizon dialogun me Moskën dhe kundërshton ndihmën ushtarake për Ukrainën, mori 35 për qind të votave në raundin e parë.
Ndërsa Gyurov siguroi 32 për qind, duke ngushtuar ndjeshëm diferencën mes tyre.
Raundi i parë u karakterizua nga pjesëmarrje e ulët, me vetëm 23 për qind të votuesve që morën pjesë në zgjedhje.
Raportohet se politika ndaj Rusisë dhe lufta në Ukrainë janë kthyer në temat kryesore të kësaj gare.
Debati është intensifikuar edhe pas incidenteve në Detin e Zi, ku disa anije u goditën në tetor, duke lënë 21 persona të zhdukur, në një zhvillim që dyshohet se lidhet me përhapjen e pasojave të luftës Rusi-Ukrainë.
Gjatë një debati televiziv, Gyurov kritikoi Iotovën për qëndrimin e saj ndaj Rusisë dhe kërkoi që Moska të emërtohet qartë si përgjegjëse për kërcënimet.
Nga ana tjetër, Iotova deklaroi se paqja mund të arrihet vetëm përmes negociatave, duke argumentuar se furnizimi i mëtejshëm i Ukrainës me armë vetëm sa do të shtonte shkatërrimin dhe viktimat.
E mbështetur nga kryeministri Rumen Radev, Iotova është paraqitur si një presidente që synon paqen, ndërsa ka premtuar gjithashtu të trajtojë varfërinë në Bullgari.
Nëse fiton balotazhin, 62-vjeçarja Iotova do të bëhet gruaja e parë e zgjedhur presidente në historinë e Bullgarisë.
Ndërkohë, Gyurov, 50 vjeç, mbështet fuqishëm lidhjet e Bullgarisë me Bashkimin Evropian dhe NATO-n, duke e cilësuar këtë garë si një zgjedhje mes dy drejtimeve të ndryshme për të ardhmen e vendit.
Rezultati i balotazhit pritet të përcaktojë edhe orientimin e mëtejshëm të politikës së jashtme bullgare, në një shoqëri të ndarë mes afrimit me Perëndimin dhe ruajtjes së marrëdhënieve me Rusinë.