Category: Lajme

  • Putin pajtohet për rifillimin e bisedimeve trepalëshe të paqes me Ukrainën dhe SHBA-në

    Putin pajtohet për rifillimin e bisedimeve trepalëshe të paqes me Ukrainën dhe SHBA-në

    Presidenti rus, Vladimir Putin, është pajtuar që bisedimet e paqes mes Rusisë, Ukrainës dhe Shteteve të Bashkuara, të ndërmjetësuara nga Uashingtoni, të rifillojnë që në muajin e ardhshëm, njoftoi të mërkurën Kremlini.

    Njoftimi erdhi pas takimit të Putinit me të dërguarin amerikan, Steve Witkoff, në Shën Petersburg, në kuadër të përpjekjeve të fundit të SHBA-së për t’i dhënë fund luftës në Ukrainë, konfliktit më të përgjakshëm në Evropë që nga Lufta e Dytë Botërore, shkruan Reuters, transmeton Dukagjini.

    Takimi, i cili u zhvillua në një pallat historik në Shën Petersburg dhe ishte i nënti mes Putinit dhe Witkoffit, nisi me një gjest vullneti të mirë nga Rusia.

    Autoritetet ruse liruan Stephen Hubbardin, një ish-mësues amerikan në pension, lirimin e të cilit presidenti amerikan, Donald Trump, ia kishte kërkuar Putinit.

    Takimi u zhvillua në një kohë kur në Kiev dhe mes aleatëve të Ukrainës janë shtuar shqetësimet se Shtetet e Bashkuara mund të jenë duke u tërhequr nga mbështetja për Ukrainën.

    Këto shqetësime lidhen, ndër të tjera, me raste kur Uashingtoni ka kufizuar ndarjen e informacioneve të inteligjencës në kohë reale për sulmet ruse, si dhe me vështirësitë që kanë prekur komunikimet ushtarake të Ukrainës.

    Bisedimet e fundit u zhvilluan gjithashtu më shumë se dy vjet pasi Trumpi, gjatë fushatës së tij të suksesshme zgjedhore, kishte premtuar se do t’i jepte fund luftës në Ukrainë brenda 24 orëve.

    Sipas Kremlinit, bisedimet e reja trepalëshe, të cilat pritet të zhvillohen në nivel teknik, mund të mbahen në Abu Dhabi. Ato do të përqendrohen në mënyrat për të garantuar sigurinë e Ukrainës dhe Rusisë pas përfundimit të luftës.

    Sipas njoftimit, negociatat mund të nisin më 10 nëntor ose pas kësaj date.

    Rundi i fundit i bisedimeve të paqes të ndërmjetësuara nga SHBA-ja ishte zhvilluar në shkurt, përpara se Shtetet e Bashkuara dhe Izraeli të nisnin luftën kundër Iranit.

    Megjithatë, Kremlini shprehu më pak optimizëm lidhur me rezultatet e bisedimeve që Witkoff kishte zhvilluar një ditë më herët në Oslo me presidentin ukrainas, Volodymyr Zelensky, udhëheqësit e Finlandës dhe Norvegjisë, si dhe përfaqësues evropianë dhe të NATO-s.

    Witkoff i kishte thënë Putinit se këto takime ishin karakterizuar nga një “farë dinamike pozitive”, ndërsa një zyrtar amerikan kishte deklaruar se pala ukrainase kishte paraqitur ide dhe propozime të reja.

    Megjithatë, ndihmësi i Kremlinit, Yuri Ushakov, u shpreh se rezultatet nuk ishin plotësisht të kënaqshme për Moskën.

    “Këto nuanca, si të thuash, nuk na kënaqin plotësisht”, u tha Ushakov gazetarëve pas takimit në Shën Petersburg, i cili zgjati gati tri orë.

    Burimi: Dukagjini

  • Pse lëkura e grave dhe burrave shërohet ndryshe? Shkencëtarët zbulojnë rolin e hormoneve

    Pse lëkura e grave dhe burrave shërohet ndryshe? Shkencëtarët zbulojnë rolin e hormoneve

    Lëkura e grave dhe e burrave nuk rigjenerohet në të njëjtën mënyrë, ndërsa një rol të rëndësishëm në këtë proces luajnë hormonet seksuale.

    Ky është përfundimi i një studimi të Universitetit të Lirë të Brukselit, të publikuar në revistën shkencore Nature.

    Hulumtimi u krye kryesisht te minjtë, ndërsa disa rezultate u konfirmuan edhe në qelizat e lëkurës njerëzore të rritura në laborator.

    Studiuesit ndoqën për pesë muaj aktivitetin e qelizave staminale, të cilat janë përgjegjëse për ripërtëritjen e vazhdueshme të lëkurës.

    Rezultatet treguan se te femrat, qelizat e krijuara nga ndarja e së njëjtës qelizë priren të veprojnë në mënyrë të koordinuar, duke ndarë ose duke nisur procesin e specializimit në të njëjtën kohë. Te meshkujt, qelizat shfaqin më shumë pavarësi në ritmin e tyre të zhvillimit.

    Sipas studiuesve, testosteroni ndikon në ritmin e pjekurisë së qelizave staminale, ndërsa estrogjeni ndihmon në ndarjen dhe koordinimin e tyre.

    Eksperimentet treguan se ndryshimi i niveleve të këtyre hormoneve mund të ndryshonte edhe mënyrën se si silleshin qelizat.

    Studimi zbuloi gjithashtu se plagët në shpinën e minjve femra mbylleshin më shpejt, veçanërisht në fazat e para të shërimit. Megjithatë, nevojiten studime të mëtejshme për të kuptuar se sa zbatohen këto rezultate te njerëzit.

    Studiuesit shpresojnë që zbulimet të ndihmojnë në zhvillimin e trajtimeve që marrin parasysh dallimet biologjike mes gjinive, veçanërisht për djegiet, plagët kronike dhe rikuperimin pas operacioneve.

    Ekipi planifikon të hetojë më tej edhe lidhjen mes këtyre mekanizmave dhe zhvillimit të kancerit të lëkurës. /Telegrafi/

  • Vrasja e rëndë në Klinë të Pejës për çështje pronësore, prokuroria ngrit aktakuzë

    Vrasja e rëndë në Klinë të Pejës për çështje pronësore, prokuroria ngrit aktakuzë

    Prokuroria Themelore në Pejë, përkatësisht Departamenti për Krime të Rënda, ka ngritur aktakuzë ndaj të pandehurit me inicialet J.J , nën dyshimin për kryerjen e veprave penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”, sipas Kodit Penal të Republikës së Kosovës.

    Sipas aktakuzës, më 21 mars 2026, rreth orës 15:00, në fshatin Bokshiq, Komuna e Klinës, i pandehuri, pas një mosmarrëveshjeje për çështje pronësore ndërmjet viktimës dhe babait të tyre, dyshohet se ka marrë një armë zjarri nga shtëpia dhe ka shtënë katër herë në drejtim të viktimës, vëllait të tij.

    “Si pasojë e plagëve të marra, viktima ka pësuar gjakderdhje të madhe të brendshme dhe të jashtme, për shkak të dëmtimit të arteries në këmbën e majtë, dhe më pas ka ndërruar jetë në Spitalin Rajonal të Pejës”, thuhet në njoftim.

    Po ashtu, sipas aktakuzës, i pandehuri e ka mbajtur dhe poseduar pa autorizim një pistoletë të kalibrit 9×19 mm, së bashku me një karikator dhe dhjetë fishekë të të njëjtit kalibër, për të cilën nuk posedonte leje nga organet kompetente.

    Prokurori i Shtetit, me rastin e ngritjes së aktakuzës, i ka propozuar Gjykatës kompetente që, pas shqyrtimit gjyqësor dhe administrimit të provave, të pandehurin ta shpallë fajtor dhe ta dënojë sipas ligjit për veprat penale për të cilat akuzohet. /Telegrafi/

  • Nga yll i Real Madridit në rrezik për stolin, Vini Jr përballet me një situatë të vështirë

    Nga yll i Real Madridit në rrezik për stolin, Vini Jr përballet me një situatë të vështirë

    Vinicius Junior po kalon një periudhë të vështirë te Real Madridi, ndërsa paraqitjet e tij të fundit kanë ngritur pikëpyetje për formën dhe kontributin që po jep në skuadër.

    Gazetari Edu Aguirre, në emisionin “El Chiringuito”, deklaroi se sulmuesi brazilian po përjeton një bllokim mendor, duke theksuar se atij nuk po i ecën asgjë në fushë.

    Sipas tij, Vinicius humbi katër topa dhe në disa raste u kthye duke ecur në fazën e mbrojtjes gjatë fitores 4-1 ndaj RB Leipzigut në Ligën e Kampionëve.

    Kjo situatë thuhet se ka shtuar shqetësimet te stafi teknik i drejtuar nga Jose Mourinho, veçanërisht sa i përket formacionit titullar për ndeshjet e ardhshme.

    Madje, sipas raportimit, nuk përjashtohet mundësia që klubi të shqyrtojë të ardhmen e brazilianit, vetëm pak muaj pas rinovimit të kontratës së tij.

    Statistikat e 26-vjeçarit tregojnë një rënie të ndjeshme të kontributit ofensiv. Në 11 paraqitje zyrtare me fanellën e Real Madridit, Vinicius ka realizuar vetëm një gol dhe ka dhënë dy asistime, ndërsa është ndëshkuar edhe me karton të kuq.

    Një tjetër e dhënë që ka tërhequr vëmendjen lidhet me mungesën e depërtimeve të tij individuale.

    Sipas statistikave të përmendura në raportim, braziliani ka regjistruar dy ndeshje radhazi si titullar pa provuar asnjë driblim, diçka që më parë i kishte ndodhur vetëm në tri raste në 309 ndeshje të nisura nga minuta e parë me fanellën madrilene.

    Për më tepër, Vinicius do ta humbasë El Clasicon ndaj Barcelonës, pasi duhet të vuajë pezullimin e marrë pas përjashtimit në kampionatin spanjoll.

    Ndërkohë, konkurrenca për një vend në formacion është shtuar edhe nga paraqitja e Diomandes, i cili u aktivizua nga banka rezervë në krahun e majtë kundër skuadrës gjermane dhe kontriboi me një gol e një asistim.

    Sipas raportimit, aftësia e tij për t’u kombinuar me Kylian Mbappen dhe puna në fazën defensive kanë bindur Mourinhon t’i japë më shumë hapësirë në ndeshjet e ardhshme.

    Kjo mund ta shtyjë Viniciusin drejt një roli më pak të rëndësishëm në skuadër pas përfundimit të pezullimit. Drejtuesit e Real Madridit, të udhëhequr nga Florentino Perez, thuhet se do ta përcjellin nga afër formën e brazilianit gjatë muajve nëntor dhe dhjetor të vitit 2026.

    Nëse paraqitjet e tij nuk përmirësohen, klubi madrilen mund të shqyrtojë ofertat që mund të vijnë për të gjatë afatit kalimtar të verës.

    Sipas raportimit, Arsenali vazhdon të jetë i interesuar për Viniciusin dhe është i gatshëm t’i ofrojë një kontratë të majme, duke i premtuar gjithashtu një rol qendror në projektin e trajnerit Mikel Arteta në “Emirates Stadium”. /Telegrafi/

  • Police conduct anti-muggling action in the north

    According to the North Mitrovica Regional Police Directorate, the operation is under a court ordinance.

    In this action, Kosovo Police are co-operating with Kosovo Customs, the Kosovo Tax Administration and other relevant institutions.

    Police have announced that further details concerning the operation will be published during the day.

    Source Layer: RTKLive

  • Policia zhvillon aksion kundër kontrabandës në veri

    Policia zhvillon aksion kundër kontrabandës në veri

    Sipas Drejtorisë Rajonale të Policisë në Mitrovicën e Veriut, operacioni po zhvillohet në bazë të një urdhërese të gjykatës.

    Në këtë aksion, Policia e Kosovës është duke bashkëpunuar me Doganën e Kosovës, Administratën Tatimore të Kosovës dhe institucionet e tjera relevante.

    Policia ka bërë të ditur se detaje të tjera lidhur me operacionin do të publikohen gjatë ditës.

    Burimi: RTKLive

  • Në Prishtinë nis vaksinimi kundër gripit sezonal

    Në Prishtinë nis vaksinimi kundër gripit sezonal

    Sipas njoftimit të Njësisë së Vaksinimit në QKMF Prishtinë, qytetarët duhet të kenë me vete letërnjoftimin për regjistrimin e të dhënave në sistem. Për fëmijët e vegjël kërkohet certifikata e lindjes me numrin personal.

    Vaksinimi në QKMF zhvillohet nga ora 07:00 deri në 20:00, ndërsa në QMF-të e kryeqytetit nga ora 07:00 deri në 13:30.

    Qytetarët mund t’i drejtohen qendrës më të afërt të mjekësisë familjare ku ofrohet shërbimi i vaksinimit për të marrë vaksinën kundër gripit sezonal.

    Burimi: RTKLive

  • In Pristina, vaccine against seasonal flu begins

    According to the KKMF Pristina Vaccination Unit announcement, citizens should have IDs for recording data in the system. It requires birth certificates with a personal number for young children.

    The vaccine at the QKMF takes place from seven o’clock to 8:00, and at the capital’s QMF from seven o’clock to 1:30.

    Citizens may head the nearest family medicine center where the vaccination service is offered to receive the seasonal flu vaccine.

    Source Layer: RTKLive

  • E vrau vëllanë pas një mosmarrëveshjeje pronësore në Klinë, ngrihet aktakuzë ndaj Jetmir Jusufit

    E vrau vëllanë pas një mosmarrëveshjeje pronësore në Klinë, ngrihet aktakuzë ndaj Jetmir Jusufit

    E vrau vëllanë pas një mosmarrëveshjeje pronësore në Klinë, ngrihet aktakuzë ndaj Jetmir Jusufit

    Prokuroria Themelore në Pejë ka ngritur aktakuzë ndaj Jetmir Jusufit, i dyshuar për vrasjen e vëllait të tij, Faruk Jusufit, në fshatin Bokshiq të Klinës, më 21 mars të këtij viti.

    Sipas aktakuzës, ngjarja kishte ndodhur pas një mosmarrëveshjeje për çështje pronësore, ndërsa i pandehuri dyshohet se mori një armë zjarri nga shtëpia dhe shtiu katër herë në drejtim të vëllait të tij, i cili më pas vdiq nga plagët e marra.

    Përveç veprës penale të vrasjes së rëndë, Jetmir Jusufi akuzohet edhe për mbajtje në posedim të paautorizuar të armëve, pasi, sipas Prokurorisë, posedonte një pistoletë të kalibrit 9×19 milimetra, një karikator dhe dhjetë fishekë pa lejen përkatëse.

    Sipas Prokurorisë, viktima kishte pësuar gjakderdhje të madhe të brendshme dhe të jashtme, si pasojë e dëmtimit të arteries në këmbën e majtë. Ai kishte ndërruar jetë në Spitalin Rajonal të Pejës.

    Prokuroria ka bërë të ditur se Jusufi dyshohet se e kishte mbajtur dhe poseduar pa autorizim një pistoletë të kalibrit 9×19 milimetra, me një karikator dhe dhjetë fishekë të të njëjtit kalibër.

    Me ngritjen e aktakuzës, prokurori i shtetit i ka propozuar gjykatës që, pas shqyrtimit gjyqësor dhe administrimit të provave, të pandehurin ta shpallë fajtor dhe ta dënojë sipas ligjit.

    Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

    Sinjali – aty ku e vërteta flet para lajmit!

    /GazetaSinjali/

    Burimi: Sinjali

  • ARRU publikon tarifat e ujit për vitin 2027, zbatimi nis nga 1 janari

    ARRU publikon tarifat e ujit për vitin 2027, zbatimi nis nga 1 janari

    Autoriteti Rregullator për Shërbimet e Ujit (ARRU) njofton publikun për publikimin e urdhëresave tarifore për vitin 2027, të miratuara në kuadër të Procesit Tarifor 2026–2028.

    Sipas një njoftimi për media thuhet se urdhëresat përcaktojnë tarifat për shërbimet e furnizimit me ujë të pijshëm, shërbimet e ujërave të ndotura, furnizimin me ujë të trajtuar me shumicë dhe furnizimin me ujë të patrajtuar me shumicë, për shtatë Kompanitë Rajonale të Ujit (KRU) në Kosovë, si dhe për ndërmarrjen “Ibër- Lepenc”.

    Tutje në njoftim thuhet se përmes këtij procesi, ARRU vazhdon përmbushjen e mandatit të saj rregullator, duke synuar përcaktimin e tarifave të arsyeshme, transparente dhe në përputhje me nevojat e sektorit.

    “Qëllimi është të ruhet ekuilibri ndërmjet mbrojtjes së interesit të konsumatorëve, përballueshmërisë së faturave dhe mbulimit të kostove të arsyeshme të ofrimit të shërbimeve, si parakusht për funksionimin dhe zhvillimin e qëndrueshëm të ndërmarrjeve të licencuara”, thuhet në njoftim.

    “Tarifat si mekanizëm për qëndrueshmërinë e sektorit. Përcaktimi i tarifave për vitin 2027 është mbështetur në analizën e kostove të ofrimit të shërbimeve, nevojave operative dhe investuese të ofruesve, si dhe objektivave për përmirësimin e performancës së tyre. Në këtë proces janë marrë parasysh faktorët që ndikojnë në shpenzimet e ndërmarrjeve, përfshirë kostot e energjisë elektrike, mirëmbajtjen e infrastrukturës, si dhe rehabilitimin dhe zgjerimin e rrjeteve të ujësjellësit dhe kanalizimit”, thuhet në njoftim.

    Po ashtu siç thuhet në njoftim tarifat e miratuara synojnë të krijojnë kushte më të qëndrueshme për operimin e ofruesve të shërbimeve dhe përmbushjen e detyrimeve të tyre ndaj konsumatorëve.

    “Njëkohësisht, ato duhet të mbështeten në parimin që kostot e njohura nga rregullatori të jenë të arsyetuara dhe të ndërlidhura me ofrimin efikas të shërbimeve, duke mbrojtur interesin publik dhe duke shmangur ngarkesat e pajustifikuara për konsumatorët”.

    Ndërkaq, në njoftim thuhet se një aspekt i rëndësishëm i Procesit Tarifor 2026–2028 është avancimi i metodologjisë së tarifimit dhe zbatimi i parimeve që synojnë një shpërndarje më të drejtë të kostove të shërbimeve.

    “Në këtë kuadër, rëndësi të veçantë ka zbatimi i parimit ‘ndotësi paguan’, sipas të cilit kostot që lidhen me ndotjen duhet t’i atribuohen ndotësit në mënyrën e duhur, në përputhje me kuadrin rregullator dhe metodologjinë përkatëse. Ky parim synon të rrisë përgjegjësinë për ndotjen e mjedisit, të përmirësojë transparencën në përcaktimin e kostove të shërbimeve të ujërave të ndotura dhe të kontribuojë në përdorimin më të përgjegjshëm të burimeve ujore. Zbatimi i tij duhet të mbështetet në kritere të qarta tarifore, trajtim të drejtë të kategorive të konsumatorëve dhe informim të përshtatshëm të publikut”, thuhet në njoftim.

    Po ashtu në njoftim bëhet e ditur se procesi Tarifor 2026–2028 është zhvilluar përmes analizave rregullatore dhe konsultimeve me ofruesit e shërbimeve dhe palët përkatëse të interesit.

    “Kjo qasje synon të sigurojë që vendimet tarifore të mbështeten në të dhëna, nevoja të arsyetuara dhe vlerësime të qëndrueshme, duke forcuar transparencën dhe llogaridhënien në sektorin e shërbimeve të ujit”.

    Ndërkaq, siç thuhet në njoftim ARRU vlerëson se rregullimi tarifor nuk përfundon me miratimin e tarifave, por duhet të shoqërohet me monitorimin e vazhdueshëm të performancës së ofruesve, përdorimin efikas të burimeve financiare dhe përmirësimin e cilësisë së shërbimeve për konsumatorët. Për këtë arsye, zbatimi i tarifave duhet të shoqërohet me angazhim të vazhdueshëm të ndërmarrjeve për rritjen e efikasitetit operacional, mirëmbajtjen e infrastrukturës dhe përmirësimin e shërbimeve.

    Po ashtu bëhet e ditur se ARRU i kushton rëndësi informimit të drejtë dhe transparent të konsumatorëve lidhur me tarifat e miratuara dhe ndikimin e tyre në faturat mujore.

    “Për këtë qëllim, urdhëresat tarifore për vitin 2027 dhe të dhënat e detajuara për tarifat e miratuara janë në dispozicion në ueb-faqen zyrtare të ARRU-së: www.arru-rks.org. Tarifat e miratuara për vitin 2027 do të zbatohen nga 1 janari 2027, në përputhje me urdhëresat përkatëse. ARRU do të vazhdojë të ushtrojë mandatin e saj rregullator në funksion të një sektori të ujit financiarisht të qëndrueshëm, ekonomikisht efikas dhe të orientuar drejt ofrimit të shërbimeve cilësore për të gjithë konsumatorët”, thuhet në njoftim. /Telegrafi/