Një sulm ukrainas me dronë ndaj qytetit rus të Voronezhit, gjatë natës, shkaktoi vdekjen e dy personave dhe plagosjen e 17 të tjerëve, shumë prej të cilëve ishin pasagjerë në një tren udhëtarësh, sipas guvernatorit rajonal.
Alexander Gusev shkroi në Telegram se “më shumë se 70 dronë” ishin rrëzuar mbi qytet nga mbrëmja e së dielës deri në orët e para të së hënës, duke e cilësuar sulmin si “akt terrorist”, raporton euronews.
Sipas Gusevit, një pjesë e madhe e të plagosurve, përfshirë dy persona në gjendje të rëndë, po udhëtonin me tren në zonat periferike të Voronezhit, në bregun e majtë të lumit, kur mbetjet e një droni të rrëzuar ranë mbi të. Ai nuk bëri të ditur se ku humbën jetën dy viktimat.
Zjarre shpërthyen në disa objekte industriale, në një qendër biznesi në qendër të qytetit dhe në një ndërtesë banimi. Megjithatë, guvernatori deklaroi se objektet industriale nuk pësuan dëme të konsiderueshme.
Sulmi ndodh disa ditë pasi Rusia ra dakord, të mërkurën, për rifillimin e negociatave trepalëshe me Ukrainën dhe Shtetet e Bashkuara në muajin nëntor. Sipas Moskës, bisedimet pritet të zhvillohen në Abu Dhabi.
Palët zhvilluan disa raunde bisedimesh të drejtpërdrejta gjatë vitit 2025, por pa arritur një marrëveshje, ndërsa negociatat janë ndërprerë që nga fillimi i këtij viti.
Duke folur për televizionin ukrainas të dielën, presidenti Volodymyr Zelenskyy konfirmoi se takimi trepalësh do të mbahet muajin e ardhshëm.
Burimi: Dukagjini