Parlamenti i Greqisë ka miratuar projektligjin që ndalon përdorimin e rrjeteve sociale nga personat nën moshën 15-vjeçare. Ligji i ri do të hyjë në fuqi më 1 janar 2027 dhe do t’i detyrojë platformat digjitale të verifikojnë moshën e përdoruesve, me sanksione të ashpra për shkeljet.
Nisma u miratua të premten me votat e shumicës parlamentare të partisë në pushtet, Demokracia e Re, e udhëhequr nga kryeministri Kyriakos Mitsotakis. Partitë e tjera nuk e mbështetën projektligjin, pas një debati të tensionuar që kishte nisur një ditë më parë.
Mitsotakis i kishte paralajmëruar planet për kufizimin e qasjes së të miturve në rrjetet sociale që në prill. Në një video të publikuar në TikTok, kryeministri grek e cilësoi masën si “të vështirë, por të nevojshme”.
Qeveria synon të mbrojë fëmijët nga ndikimet negative të rrjeteve sociale dhe të kufizojë ekspozimin e tyre ndaj përmbajtjeve potencialisht të dëmshme në internet.
Partia socialiste opozitare PASOK abstenoi në votim, pasi kishte propozuar një alternativë më të kufizuar. Ajo kërkonte ndalimin e rrjeteve sociale për fëmijët nën 13 vjeç, ndërsa për moshat 13 dhe 14 vjeç propozonte kontrolle prindërore.
Me këtë vendim, Greqia i bashkohet vendeve që po ndërmarrin masa për kufizimin e përdorimit të rrjeteve sociale nga të miturit. Australia, Franca, Brazili, Indonezia, Austria, Danimarka dhe Mbretëria e Bashkuar janë ndër shtetet që kanë miratuar ose po përgatisin masa të ngjashme.
Mbështetësit e kufizimeve argumentojnë se algoritmet e platformave janë krijuar për t’i mbajtur përdoruesit sa më gjatë para ekranit dhe se përdorimi i tepruar mund të ndikojë negativisht në shëndetin mendor të fëmijëve dhe adoleshentëve.
Nga ana tjetër, kundërshtarët vënë në pikëpyetje zbatimin praktik të ndalimeve, efektivitetin e tyre dhe mundësinë që të miturit t’i anashkalojnë kufizimet.
Ligji pritet të hyjë në fuqi më 1 janar 2027, duke e vendosur Greqinë në mesin e vendeve që po kërkojnë të forcojnë mbrojtjen e fëmijëve në mjedisin digjital.
Sinjali – aty ku e vërteta flet para lajmit!
Burimi: Sinjali