Sipas njoftimit të Qendrës Kinematografike të Kosovës (QKK), drejtoresha e këtij institucioni, Blerta Zeqiri, dhe ambasadorja e Kosovës në Itali, Nita Shala, gjatë qëndrimit në Romë, kanë zhvilluar një takim me drejtorin e përgjithshëm për Kinemanë dhe Audiovizualin në Ministrinë e Kulturës së Italisë, Giorgio Carlo Brugnoni.
Takimi u zhvillua në kuadër të pjesëmarrjes në Festivalin EuroBalkan Film, ndërsa në fokus ishte forcimi i marrëdhënieve kulturore dhe kinematografike ndërmjet dy vendeve.
Gjatë takimit është dakorduar që të nisin punët për hartimin e marrëveshjes bilaterale për bashkëprodhimin e filmave, e cila synon të krijojë mundësi të reja për projekte të përbashkëta, bashkëpunim ndërmjet industrive filmike dhe shkëmbim profesional e artistik.
Qendra Kinematografike e Kosovës e ka vlerësuar këtë takim si një hap të rëndësishëm drejt zgjerimit të partneriteteve ndërkombëtare dhe promovimit të filmit kosovar në arenën evropiane.
Burimi: RTKLive