Vetëm pak ditë pasi dha dorëheqjen e bujshme pas raportimeve për afera me një grua të dyshuar si spiune kineze dhe një vartëse të saj, Jensen Huang po shqyrton mundësinë e rikthimit në postin e Drejtorit Ekzekutiv të Nvidia-s, ndërsa aleatët e tij në Silicon Valley po ushtrojnë presion të madh mbi bordin e kompanisë.
Sipas burimeve të afërta me zhvillimet, Huang ka diskutuar skenarin e kthimit në krye të prodhuesit gjigant të çipave – me vlerë 4 trilionë dollarë – me bashkëpunëtorët e tij më të besuar. Këto lëvizje po ndodhin në kohën kur bordi i Nvidia-s po zhvillon një hetim të pavarur mbi sjelljen e tij, e cila shkaktoi një krizë të paprecedentë lidershipi këtë javë.
“Dhomë lufte” në Silicon Valley dhe kërkim mbështetjeje në Shtëpinë e Bardhë
Një aleat i Huang i ka thënë prestigjiozes Financial Times se drejtues të lartë në Silicon Valley po formojnë një të ashtuquajtur “dhomë lufte” për të lobuar fuqishëm për rikthimin e ish-shefit të Nvidia-s, duke kërkuar madje edhe mbështetjen e Shtëpisë së Bardhë.
“Të gjithë ata që luajnë një rol të rëndësishëm në industrinë e teknologjisë – përveç ndoshta laboratorëve të teknologjisë së fundit – kanë konsideratë të lartë për Jensenin”, është shprehur ky burim, duke konfirmuar se kjo fushatë lobuese ka miratimin e vetë Huang.
Përkrahja për të nuk mungon as brenda kompanisë, ku një pjesë e punonjësve besnikë kanë dalë publikisht pas dorëheqjes së tij dhe kanë nënshkruar një letër të hapur duke kërkuar rikthimin e menjëhershëm të tij.
Pengesat nga Uashingtoni dhe emrat për pasardhës
Megjithatë, ky rikthim mund të hasë në rezistencë të fortë politike në Uashington:
Kundërshtimi nga Thesari: Sekretari i Thesarit, Scott Besant, bëri thirrje të dielën për ndryshime rrënjësore në udhëheqjen e kompanisë pas largimit të Huang.
Lëvizjet e bordit: Financial Times raportoi të premten se bordi i Nvidia-s i ishte drejtuar CEO-s së Arm, Rene Haas, si një pasardhës i mundshëm i Huang, ndonëse vetë kompania Nvidia deklaroi se ende nuk ka nisur asnjë proces “formal” për zëvendësimin e tij.
Burimi: Sinjali