Mungesa e shërbimeve elementare po i shtyn banorët të largohen nga Malësia e Gollakut. Në Krilevë të Kamenicës, pavarësisht përmirësimit të rrugëve, mungojnë shkolla, shërbimet shëndetësore dhe transporti publik. Banorët kërkojnë ndërhyrje konkrete për të krijuar kushte më të mira jetese dhe për të ndalur zbrazjen e fshatit. Ata paralajmërojnë se, pa investime në shërbimet publike, rrezikon të shuhet jeta në këtë zonë.
Mungesa e kushteve elementare i ka detyruar shumë banorë të Malësisë së Gollakut të largohen nga vendlindja. Në Krilevë të Kamenicës, ndonëse infrastruktura rrugore është përmirësuar, mungesa e shkollës, e shërbimeve shëndetësore dhe e transportit publik vazhdon ta vështirësojë jetën e banorëve.
Për banorët, shqetësuese është mundësia që, pa ndërhyrje konkrete, Krileva dhe fshatrat e tjera të Gollakut të vazhdojnë të humbin banorë.
Ramush Cakolli thotë se hapja e shkollave dhe e ambulancave, si dhe funksionalizimi i shërbimeve të tjera, janë të domosdoshme për ta mbajtur gjallë jetën në këtë zonë.
Ndërsa banorët më të moshuar shprehin shqetësimin për të ardhmen e fshatit, të rinjtë thonë se mungesa e mundësive po i shtyn familjet të kërkojnë një jetë më të mirë diku tjetër.
Krileva është ndër fshatrat e Malësisë së Gollakut që po përballen me largimin e banorëve. Për ata që ende jetojnë aty, përmirësimi i shërbimeve publike dhe krijimi i kushteve elementare mbeten vendimtare për të ardhmen e fshatit dhe për mundësinë që familjet të qëndrojnë ose të rikthehen në vendlindje.
Burimi: RTKLive