
Burimi: Sinjali

Kryeministri i Shqipërisë, Edi Rama, ka shprehur shqetësimin për pamjet e nxënësve që vandalizuan monumentin e librit ‘Lahuta e Malsisë’ të Gjergj Fishtës, duke thënë se kjo ngjarje ngre pikëpyetje për njohuritë e të rinjve mbi kulturën dhe historinë shqiptare.
Gjatë një takimi me drejtuesit e gjimnazeve të Tiranës në Ministrinë e Arsimit, Rama tha se veprimi i një grupi adoleshentësh ndaj librit të Fishtës është shqetësues përtej dëmtimit të një vepre me rëndësi kulturore.
“Kur kam parë dje pamje e nxënësve që vandalizonin librin e Gjergj Fishtës nuk kam hasur asnjë ndjesi tjetër përveç shqetësimit të madh që shkon përtej faktit se një grusht adoleshentësh po dhunonin një simbol aq kuptimplotë të kulturës dhe historisë së vendit tonë”, deklaroi Rama.
Ai shtoi se, sipas tij, ky veprim tregon se të rinjtë mund të mos kenë njohuri të mjaftueshme për figurat e rëndësishme të historisë dhe kulturës kombëtare.
“Kjo do të thotë se sipas meje, ata nuk e dinë kush është Fishta. Është momenti që të gjithë ne të reflektojmë në këtë padije dramatike”, u shpreh kryeministri.
Rama e lidhi këtë shqetësim edhe me ndikimin e rrjeteve sociale te fëmijët, duke përmendur veçanërisht TikTok-un. Sipas tij, algoritmet e platformave mund të ndikojnë në sjelljen e të rinjve dhe t’i largojnë ata nga realiteti.
“Jemi në një front të përbashkët për të kompensuar mesazhet që fëmijët marrin nga Tik-Tok, ku ata mendojnë se shënjestrojnë, por ata algoritmi i shënjestron njësoj si rrjetet e drogës që përzgjedhin dhe i çojnë te varësia që i ndan nga realiteti”, deklaroi Rama.
Kryeministri theksoi se, pavarësisht këtij shqetësimi, pjesa më e madhe e nxënësve, sipas tij, nuk përfshihet në këto sjellje, por paralajmëroi se grupi që shfaq prirje të tilla përbën një problem që kërkon vëmendje.
“Lavdi Zotit pjesa më e madhe e nxënësve është e shëndoshë, por kjo pjesë që është shkëputur, është rrezik aktual me të cilin duhet të përballemi”, tha Rama.
Burimi: Dukagjini

Presidenti i Ukrainës, Volodymyr Zelenskyy, ka akuzuar Shtetet e Bashkuara të Amerikës se po vonojnë qëllimisht dërgesat e raketave për interceptimin e raketave ruse, duke thelluar përplasjen publike me presidentin amerikan, Donald Trump.
Duke folur të hënën me senatorë amerikanë, Zelenskyy tha se Pentagoni po vonon dërgesat e raketave që tashmë janë paguar nga vendet evropiane përmes programit PURL, i cili synon të sigurojë pajisje ushtarake për Ukrainën.
Sipas tij, dërgesa është në pritje të nënshkrimit të sekretarit amerikan të Mbrojtjes, Pete Hegseth.
Ndërkohë, një zyrtar i Shtëpisë së Bardhë, i cili foli për The Washington Post në kushte anonimiteti, tha se SHBA-ja vazhdon të luajë një rol konstruktiv në bisedimet me të dyja palët, me synimin për t’i dhënë fund luftës.
Zelenskyy tha gjithashtu se disa vende evropiane janë të gatshme t’i transferojnë Ukrainës raketa për sistemet e mbrojtjes ajrore Patriot nga rezervat e tyre, por po presin miratimin e SHBA-së.
“E gjithë kjo tregon se është marrë një vendim politik për të ngadalësuar mbështetjen ndaj nesh”, tha ai, sipas deklaratave të publikuara nga presidenca ukrainase.
Sipas The Washington Post, administrata Trump nuk e kishte miratuar transferimin e këtyre raketave në Ukrainë.
Trump, ndërkaq, ka fajësuar sulmet ukrainase ndaj rafinerive ruse të naftës për rritjen e çmimeve të karburanteve, një çështje e rëndësishme për zgjedhjet e mesmandatit në SHBA.
“Për të qenë i sinqertë, mendoj se është koha që dikush tjetër të negociojë në emër të Ukrainës”, tha Trump të hënën.
Zelenskyy i cilësoi si të vështira për t’u shpjeguar vendimet e SHBA-së lidhur me luftën, përfshirë vonesat në dërgesat e armëve dhe kufizimet në shkëmbimin e informacioneve të inteligjencës. Uashingtoni mohon se ka bërë ndryshime në shkëmbimin e informacioneve me Kievin.
Ukraina thotë se nuk mori paralajmërim për sulmin rus
Zelenskyy tha se Ukraina nuk kishte marrë paralajmërim nga SHBA-ja për një sulm të mundshëm rus me raketa të dielën në mbrëmje.
Sipas zëdhënësit të Forcave Ajrore të Ukrainës, vendi nuk ishte paralajmëruar përpara sulmit me raketa ruse, i cili goditi termocentrale në Kiev rreth orës 23:00. Megjithatë, Ukraina mori paralajmërim për një sulm të mëvonshëm.
“Edhe një herë, Rusia nisi sulme me raketa balistike në disa valë gjatë natës dhe, edhe një herë, nuk pati paralajmërim nga partnerët tanë”, shkroi Zelenskyy të hënën në rrjetet sociale.
Mungesa e paralajmërimit ka rikthyer shqetësimet se Uashingtoni mund të jetë duke kufizuar informacionet e inteligjencës për të ushtruar presion ndaj Kievit që të pranojë kushtet e Moskës.
Ndërkohë, sulmet ruse kanë vazhduar edhe të martën. Autoritetet ukrainase njoftuan se katër persona u vranë dhe të paktën 11 të tjerë u plagosën.
Shërbimi Shtetëror i Emergjencave të Ukrainës bëri të ditur se tre persona u vranë në rajonin e Kievit, ndërsa një tjetër humbi jetën në sulmet ndaj qytetit të Zaporizhzhias, në juglindje të vendit.
Autoritetet thanë se Rusia po vazhdon të godasë infrastrukturën energjetike dhe atë të transportit.
Gjashtë të vrarë nga një sulm me dron në Harkiv
Gjashtë persona, mes tyre edhe fëmijë të vegjël, u vranë të hënën pasi një dron rus goditi një park në rajonin e Harkivit, në verilindje të Ukrainës.
Zelenskyy e cilësoi sulmin si një “mizori të pastër”, duke thënë se droni goditi drejtpërdrejt njerëzit në një park pranë një kafeneje.
Në mesin e viktimave ishte edhe një vajzë njëvjeçare. Sipas autoriteteve, nga sulmi në Nova Vodolaha u vra edhe nëna e saj.
Witkoff pritet të udhëtojë në Norvegji dhe Rusi
Ndërkohë, i dërguari i posaçëm i Trumpit, Steve Witkoff, pritet të udhëtojë këtë javë në Norvegji për raundin e ardhshëm të negociatave për përfundimin e luftës në Ukrainë, raportoi Reuters, duke cituar tre persona të njohur me çështjen.
Dy prej burimeve thanë se presin që në takime të marrë pjesë edhe Zelenskyy. Ndërsa Jared Kushner, dhëndri i Trumpit, i cili pritej të ishte pjesë e bisedimeve, është i sëmurë dhe do të marrë pjesë virtualisht.
Diskutimet në Oslo pritet të përfshijnë Zelenskyyn, kryeministrin norvegjez Jonas Gahr Støre, përfaqësues të grupit E4 — Britanisë së Madhe, Francës, Gjermanisë dhe Polonisë — si dhe përfaqësues të Bashkimit Evropian dhe NATO-s.
Burimi: Dukagjini

Kryeministri i Shqipërisë, Edi Rama, ka deklaruar se protestat e ditëve të fundit po shfrytëzohen nga grupe të ndryshme për të nxitur dhunë dhe për të destabilizuar vendin, duke mohuar se aktet e dhunshme kanë të bëjnë me kërkesat e nxënësve dhe studentëve.
Gjatë një takimi me drejtuesit e gjimnazeve në Ministrinë e Arsimit, Rama tha se institucionet arsimore janë vendosur në qendër të vëmendjes për të krijuar përshtypjen se protestat lidhen me arsimin, ndërsa, sipas tij, qëllimi i vërtetë është të kamuflohen veprimet e dhunshme.
“Institucioni i cili është bërë objekt i sulmit dhe agresionit të vërtetë është vendosur në qendër të vëmendjes për një arsye, për të kamufluar ç’ka në të vërtetë është në durimin e helmuar të kësaj proteste. Për të krijuar idenë që kjo është një protestë për arsimimin, për të justifikuar kësisoj këtë valë dhune që s’ka të bëjë me nxënësit e studentët, por me një grup njerëzish ku ka nga të gjithë”, deklaroi Rama.
Ai tha se në grupet që sulmojnë policinë ka edhe studentë që, sipas tij, janë të ekstremizuar politikisht, por theksoi se e drejta për të protestuar nuk duhet të ngatërrohet me aktet e dhunës.
“Në atë grup që agreson policinë, që mban në një presion terrori qytetin, ka dhe studentë të cilët janë të ekstremizuar në pikëpamjet e tyre, që i përkasin rrymave të reja të ekstremizmit politik, por problemi nuk janë dhe s’do jenë asnjëherë as studentët, as qytetarët që ushtrojnë të drejtën e protestës”, u shpreh kryeministri.
Gjatë fjalës së tij, Rama mori në dorë një gur, të cilin e përdori për të ilustruar rrezikun që, sipas tij, paraqesin sulmet ndaj policisë. Ai argumentoi se një objekt i tillë mund të shkaktojë pasoja të rënda kur hidhet drejt trupave policore.
“Ky gur është objekti që ndan qartësisht dy anët e kësaj historie. Ky gur është objekti që përcakton ku mbaron e drejta e protestës dhe ku fillon e drejta e shtetit për të reaguar”, tha Rama.
Kryeministri akuzoi gjithashtu grupe të ndryshme se po përpiqen të shfrytëzojnë pakënaqësinë e qytetarëve për të penguar zhvillimin e vendit dhe procesin e integrimit evropian të Shqipërisë.
Sipas tij, këto grupe synojnë të krijojnë destabilitet në një moment që ai e cilësoi si të rëndësishëm për vendin dhe përparimin e negociatave me Bashkimin Evropian.
“Duart që janë futur këtu për të shfrytëzuar manifestimin e pakënaqësisë qytetare për arsye nga më të ndryshmet, janë duar që së bashku kërkojnë të shfrytëzojnë një moment, një boshllëk, një hapësirë të krijuar për të frenuar ecurinë e mëtejshme të vendit tonë, për të destabilizuar një vend që ka qenë eksportues i stabilitetit në këtë pjesë të Europës, në rajonin e Ballkanit Perëndimor, dhe për ta frenuar procesin e negociatave në BE”, deklaroi Rama.
Burimi: Dukagjini

Këshilli i Sigurimit i Organizatës së Kombeve të Bashkuara (OKB), do të mbajë sot mbledhjen e radhës për situatën në Kosovë, ku pritet të diskutohen zhvillimet politike, gjendja e sigurisë dhe dialogu ndërmjet Kosovës dhe Serbisë.
Mbledhja është paraparë të nisë në orën 15:00 sipas kohës së Nju Jorkut, përkatësisht në orën 21:00 sipas kohës së Kosovës.
Përfaqësuesi Special i Sekretarit të Përgjithshëm të OKB-së dhe shefi i UNMIK-ut, Peter Due, pritet të paraqesë raportin e fundit të Sekretarit të Përgjithshëm për Kosovën, i cili përfshin periudhën nga 16 marsi deri më 15 shtator 2026.
Sipas organizatës Security Council Report, në raport vlerësohet se situata e përgjithshme e sigurisë ka mbetur e qëndrueshme, ndërsa gjatë periudhës së raportimit kanë vazhduar vështirësitë në funksionimin e institucioneve dhe përparimi i kufizuar në zbatimin e marrëveshjeve të arritura në dialogun e ndërmjetësuar nga Bashkimi Evropian.
Një pjesë e diskutimeve pritet t’u kushtohet zhvillimeve politike në Kosovë, përfshirë formimin e qeverisë në shtator dhe zgjedhjen e Justina Pula-Shirokës presidente më 7 tetor, me 81 vota.
Në fokus pritet të jetë edhe situata në veri të Kosovës. Raporti i Sekretarit të Përgjithshëm e përshkruan gjendjen në këtë pjesë të vendit si të qetë, por të brishtë, për shkak të mosmarrëveshjeve ndërmjet autoriteteve qendrore dhe atyre lokale.
Në dokument përmenden edhe çështjet që lidhen me kompetencat komunale, rrënimin e objekteve, dëbimet nga pronat dhe veprimet e Policisë së Kosovës. Këto zhvillime janë trajtuar në raport në kontekstin e marrëdhënieve ndërmjet institucioneve dhe komuniteteve.
Çështje tjetër që pritet të diskutohet është dialogu Kosovë-Serbi dhe zbatimi i marrëveshjeve ekzistuese, përfshirë Marrëveshjen e Ohrit të vitit 2023.
Sipas raportit, gjatë periudhës së përfshirë nuk është mbajtur takim i nivelit të lartë në kuadër të dialogut, megjithëse përfaqësuesi i posaçëm i BE-së, Peter Sørensen, ka vazhduar kontaktet me të dyja palët.
Në mbledhje mund të trajtohen edhe përpjekjet për rikthimin e gjyqtarëve dhe prokurorëve serbë në sistemin e drejtësisë së Kosovës, si dhe përgjegjësia për sulmin e armatosur në Banjskë në shtator 2023.
Raporti përmend gjithashtu çështjen e personave të zhdukur gjatë luftës në Kosovë. Sipas të dhënave të përfshira në dokument, deri më 15 shtator 2026, fati i 1 mijë e 579 personave vazhdonte të mbetej i pazbardhur.
Në mbledhje pritet të ketë qëndrime të ndryshme edhe për të ardhmen e UNMIK-ut. Shtetet e Bashkuara kanë kërkuar më herët mbylljen e misionit, ndërsa Britania e Madhe ka mbështetur rishikimin strategjik të rolit dhe përgjegjësive të tij. Rusia dhe Kina kundërshtojnë reduktimin e misionit.
Në seancë pritet të marrin pjesë edhe përfaqësues të Kosovës, Serbisë dhe Bashkimit Evropian.
Kjo është mbledhja e dytë e rregullt e Këshillit të Sigurimit për Kosovën gjatë vitit 2026.
Burimi: Dukagjini

Protestat në Shqipëri, qytetarët kosovarë i vlerësojnë si legjitime, por kërkojnë të ndalohet dhuna dhe dëmtimi i institucioneve.
Disa prej tyre, të intervistuar nga Ekonomia Online, shpresojnë për gjetjen e një zgjidhjeje sa më të shpejtë, në mënyrë që situata të mos përshkallëzohet më tej.
Për Fevzi Berishën, qytetarët shqiptarë kanë të drejtë t’i shprehin pakënaqësitë e tyre, por, në këndvështrimin e tij, dhuna nuk duhet të arsyetohet në asnjë rrethanë.
“Mendoj që protestat janë legjitime në çdo vend, që popullata të shprehë pakënaqësinë për dukuritë që ndodhin nëpër vendet e ndryshme, mirëpo megjithatë në asnjë mënyrë nuk arsyetohet dhuna që përdoret, edhe atëherë dhuna konsideroj e dyanshme, edhe nga e protestuesve edhe nga ana e policisë, mund të protestohet në mënyrë të qetë, mund të mos bëhen dëmtimet, sepse ato dëmtime janë të të gjithë qytetarëve dikush është i kënaqur, dikush jo, por jo të bëhen në atë mënyrë qysh janë bërë dëmtimet, e sidomos edhe të protestuesve, në anën tjetër, sigurisht edhe individualisht ka pasur edhe raste të veçanta, kur mënyra jo të mira ka vepruar edhe Policia, shteti. Prandaj apeli kishte me qenë që me gjet një zgjidhje sa më të shpejt që me u ndërpre, me u protestu, të protestohet por jo në atë mënyrë qysh është sot. Po ajo është shumë e dhimbshme pavarësisht e kujtdo qoftë ajo është e dhimbshme për çdo shtet, aq më tepër në shtetin amë që e konsiderojmë shtet tonin”, tha Berisha.
Edhe Murat Gërbeshi i përkrah protestat, teksa bën një krahasim mes protestave në Kosovë, që u bënë për disa ditë kundër Gjykatës Speciale, me ato në Shqipëri, ku po kërkohet dorëheqja e kryeministrit shqiptar, ndërsa ka shprehur shqetësimin e tij për mundësinë e përshkallëzimit të situatës.
“Kjo nuk është vetëm në Shqipëri, por në Itali dhe tëra anët, kjo është një lëvizje qytetare, çka do të dalë në fund një Zot e di. Shumë keq, shiko këtu te na kem 19 ditë ose 20 ditë, nuk ka pasur thyerje, unë dje jam kthyer nga Shqipëria, atje ish kiamet, vërtetë është tepër, Shqipëria gjithë qashtu, ju e dini në 97-tën, veç po e luti Zotin që s’kërcet pushka se ata s’dinë mu ndalë. Shiko, Policia është për ata që me mbrojt, s’ka qare ndryshe, se ata me fjalë s’po munden me i ndalë, kush po futet këtu, kush po punon, një Zot e din”, theksoi Gërbeshi.
Një tjetër qytetar, Xhelal Mati, shpreh keqardhjen për situatën e krijuar, duke thënë se ajo është e dëmshme për studentët, qytetarët, shtetin dhe Qeverinë.
Ai kritikon shkatërrimin e institucioneve publike dhe përplasjet mes protestuesve dhe Policisë, ndërsa kërkon që kryeministri Edi Rama ta kuptojë pakënaqësinë e studentëve dhe të reflektojë për mundësinë e ndryshimeve politike.
“Pavarësisht keq, shumë keq, si për studentë, si për popull si për shtet, si për Qeveri si për krejt. Mirëpo pse po ndodh, ata që e kanë marrë iniciativën me i bë ata e dinë më mirë, ama mua nuk po më vjen mirë hiq, fundi fundit kë po e shkatërron, po e shkatërron shtetin tënd, fundi fundi me kë mes vete, Policia me studentë, studentet me Polici, po shpresoj që do të vetëdijesohen edhe më në fund do të zgjidhet edhe Edi Rama që është aty duhet me pas njëfarë karakteri njerëzor, me u bindë që gjitha herët nuk mundesh me qenë në pushtet, por ka ardhë koha për ndryshime, gjithë këta studentë nuk po i këqyre askush pa arsye, por kanë një arsye që janë dërgo edhe ky duhet ti kuptojmë dhe duhet me dhanë dorëheqje, por tash varet qysh e pranon edhe qysh do të sillet, mua s’po me pëlqen hiq. Po hiq mirë, a mirë duket a? Ajo është katastrofë, institucionet e kujt, a janë të popullit? Kush ka investu qeky shtet, e ka rrënuar shtetin e ka shkatërruar shtetin, tash po këqyrin edhe studentet, janë të emocionuar, janë pak të inatosur ai ndoshta nuk e bën me vetëdije, se edhe policia janë nuk janë sjellë mirë, secila e ka negativitetin e vet, qysh do të përfundojë po shpresoj që do të bëhet mirë, të shohim, ama mua nuk më pëlqen hiç”, potencoi Mati.
Qytetarët e intervistuar nga EO shpresojnë që situata të qetësohet dhe palët të gjejnë një zgjidhje, duke shmangur dhunën dhe dëmtimin e pronës publike.
Sipas tyre, pakënaqësitë duhet të shprehen përmes protestave paqësore, ndërsa institucionet duhet të dëgjojnë kërkesat e qytetarëve dhe studentëve.
Ndryshe, qe tetë ditë po zhvillohen protesta të dhunshme në Tiranë, me të vetmen kërkesë, dorëheqjen e kryeministrit Edi Rama.Deri më tani janë raportuar qindra protestues të lënduar, në mesin e tyre edhe dhjetëra efektivë të Policisë.
Burimi: Dukagjini