Blog

  • Trump nderon Elon Musk me medaljen më të lartë shkencore në SHBA: Thomas Edison i kohëve moderne

    Trump nderon Elon Musk me medaljen më të lartë shkencore në SHBA: Thomas Edison i kohëve moderne

    Presidenti amerikan, Donald Trump, i ka ndarë drejtorit ekzekutiv të SpaceX, Elon Musk, Medaljen Kombëtare të Shkencës, një nga vlerësimet më prestigjioze në Shtetet e Bashkuara, duke e cilësuar atë si “Thomas Edison të kohëve moderne”.

    Ceremonia u mbajt të enjten në Institutin e Paqes në Washington, ku u nderuan edhe disa figura të tjera të rëndësishme të teknologjisë: bashkëthemeluesi i Google, Sergey Brin, drejtori ekzekutiv i Nvidia-s, Jensen Huang, si dhe drejtuesja e AMD-së, Lisa Su.

    “Dua t’i falënderoj të gjithë që janë këtu për të festuar përparimin emocionues të shkencës dhe teknologjisë në epokën e artë të Amerikës”, tha Trump në fjalën e tij hyrëse, përpara se t’i kushtonte vëmendje të veçantë Musk-ut, transmeton Telegrafi.

    Presidenti e përshkroi atë si një “gjigant industrial”, duke deklaruar se pak amerikanë në histori kanë bërë më shumë për të çuar përpara interesat kombëtare të vendit.

    “Gjenialiteti dhe vendosmëria e tij e kanë shndërruar fantashkencën në realitet”, tha Trump, përpara se ta përgëzonte Musk-un dhe ta cilësonte mikun e tij si një person “shumë, shumë të veçantë”.

    Megjithatë, pavarësisht fjalëve të ngrohta gjatë ceremonisë, marrëdhënia mes Trump-it dhe Musk-ut ka kaluar nëpër periudha të tensionuara vitet e fundit.

    Musk iu bashkua Trump-it në fazën e fundit të fushatës presidenciale dhe, pas rikthimit të tij në Shtëpinë e Bardhë në janar të vitit 2025, mori një rol të profilit të lartë në Departamentin për Efikasitetin e Qeverisë (DOGE). Në praktikë, ai u bë figura kryesore e përpjekjeve për të ulur shpenzimet dhe për të zvogëluar administratën federale.

    Marrëdhënia mes tyre u përkeqësua pasi Musk kritikoi projektligjin e shpenzimeve të Trump-it, të njohur si “One Big Beautiful Bill”, duke nxitur një përplasje publike mes të dyve.

    Së fundmi, megjithatë, Musk është afruar sërish me administratën Trump. Drejtuesi i Tesla-s pritet të marrë rolin e bashkëdrejtuesit të projektit “Meridian”, të porositur nga Departamenti amerikan i Mbrojtjes.

    Projekti synon të shqyrtojë të ardhmen e luftës, të identifikojë armët dhe teknologjitë që do t’i nevojiten ushtrisë amerikane dhe të propozojë zgjidhje konkrete për zhvillimin, testimin dhe vënien në përdorim të këtyre kapaciteteve.

    Sipas një njoftimi të Shtëpisë së Bardhë, Musk u nderua për arritjet inxhinierike me ambicie dhe përmasa të jashtëzakonshme, të cilat kanë zgjeruar kufijtë e eksplorimit të hapësirës, sistemeve inteligjente dhe komunikimit, si dhe kanë ndihmuar në forcimin e udhëheqjes teknologjike amerikane dhe hapjen e një kapitulli të ri në industrinë prodhuese të vendit. /Telegrafi/

  • "Ata e hoqën qafe, ai ishte një bombë me sahat", pretendime tronditëse për vdekjen e Maradonës

    “Ata e hoqën qafe, ai ishte një bombë me sahat”, pretendime tronditëse për vdekjen e Maradonës

    Gjyqi i shtatë punonjësve të shëndetësisë të akuzuar për vdekjen e Diego Armando Maradonës ka sjellë akuza të rënda kundër ekipit mjekësor që u kujdes për futbollistin legjendar argjentinas në ditët e tij të fundit.

    Prokurori Patricio Ferrari tha se Maradona iu la një grupi amatorë të çorganizuar dhe se shtëpia ku po shërohej nuk kishte as pajisjet më themelore mjekësore. Prokuroria filloi argumentet e saj përfundimtare të enjten në një gjykatë në San Isidro, pranë Buenos Airesit.

    Maradona vdiq më 25 nëntor 2020 në moshën 60 vjeçare nga pamjaftueshmëria kardiake dhe edema akute pulmonare. Dy javë më parë, ai i ishte nënshtruar një operacioni për një hemorragji në tru, pas së cilës u lirua për të marrë trajtim në shtëpi në Tigre, në veri të Buenos Airesit.

    Prokuroria beson se ekipi mjekësor e neglizhoi seriozisht jetën e tij dhe se vdekja e Maradonës mund të ishte parandaluar. Shtatë profesionistët mjekësorë të akuzuar i mohojnë akuzat dhe, nëse dënohen, përballen me dënime me burgim nga tetë deri në 25 vjet.

    “Maradona ishte një bombë me sahat më 11 nëntor 2020. Ata e hoqën qafe dhe e çuan në shtëpinë ku vdiq 14 ditë më vonë”, tha Ferrari gjatë prezantimit të tij të fundit, raporton Gazzetta dello Sport.

    Sipas tij, stafi mjekësor ishte në dijeni të gjendjes shëndetësore të Maradonës, por pavarësisht kësaj, ata nuk arritën të siguronin kushte të përshtatshme për trajtim.

    “Pati çorganizim të plotë. Ishte një grup amatorësh që rritën rrezikun përtej kufijve të lejuar, dhe disa prej tyre treguan edhe indiferencë”, tha prokurori.

    Ferrari kritikoi veçanërisht kushtet në shtëpinë ku Maradona kaloi ditët e tij të fundit.

    “Nuk kishte doreza, as garzë, as infuzion intravenoz, as kuti të ndihmës së shpejtë, as defibrilator, as ambulancë, asgjë nga ato që premtuan. Ishte një boshllëk i plotë, nuk kishte asgjë në atë shtëpi”, shtoi Ferrari.

    Leopoldo Luque (i dyti nga e majta), i pandehuri kryesor në gjyqin për vdekjen e legjendës së futbollit Diego Maradona. Foto: Profimedia

    Prokurori theksoi se Maradona kishte probleme komplekse shëndetësore që kërkonin mbikëqyrje të vazhdueshme mjekësore.

    “Ishte një situatë që u zhvillua gjatë disa ditësh. Një komision mjekësor ndërdisiplinor arriti në përfundimin se Maradona nuk ishte një njeri i shëndetshëm që vdiq papritur, por një pacient me një gjendje mjekësore jashtëzakonisht komplekse dhe serioze. Një nga përfundimet ishte se vdekja ishte e shmangshme dhe se kujdesi mjekësor ishte i pamjaftueshëm”.

    Ai e përshkroi ekipin mjekësor si “një grup amatorësh që harruan gjatë gjithë kohës se po merreshin me një pacient të prekshëm me një gjendje të ndërlikuar mjekësore”.

    Pas tij, prokurori Cosme Iribarren filloi argumentet e tij përfundimtare, duke kujtuar momentin kur pa trupin e Maradonës ditën e vdekjes së tij. “Ky imazh do të mbetet i gdhendur në kujtesën time përgjithmonë”, tha ai.

    Shtatë të pandehur rrezikojnë deri në 25 vjet burg

    Shtatë anëtarë të ekipit mjekësor janë në gjyq, përfshirë neurokirurgun Leopoldo Luque, psikiatren Agustina Cosachov, psikologun Carlos Diaz dhe personel mjekësor dhe të kujdesit shëndetësor.

    Ata akuzohen për vrasje me dashje të mundshme, që do të thotë se ishin të vetëdijshëm se veprimet ose mosveprimet e tyre mund të çonin në vdekjen e Maradonës, por ranë dakord për një rezultat të tillë.

    Prokuroria pretendon se Maradona është lënë pas dore dhe se atij nuk i është dhënë kujdesi mjekësor që kërkonte gjendja e tij. Mbrojtja, nga ana tjetër, mohon përgjegjësinë dhe pretendon se Maradona vdiq për shkak të problemeve të tij shëndetësore të gjata dhe se vdekja e tij ishte e papritur dhe e paparashikueshme.

    Gjatë gjyqit u dëgjuan dëshmitarë të shumtë dhe ekspertë mjekësorë. Disa mbështetën pretendimet e prokurorisë për kujdes të pamjaftueshëm, ndërsa të tjerë kundërshtuan përfundimin se vdekja e Maradonës mund të ishte parandaluar.

    Gjyqi i parë u anulua për shkak të një skandali të madh

    Ky është një rigjykim, i cili filloi në prill të këtij viti. Procedurat e para u hapën në mars të vitit 2025, por u anuluan dy muaj më vonë për shkak të një skandali që përfshinte gjyqtaren Juliet Makintach.

    U zbulua se gjyqtarja kishte marrë pjesë në xhirimin e një dokumentari të paautorizuar për çështjen, gjë që shkelte rregullat e procedurës gjyqësore. Si rezultat, gjyqi duhej të fillonte nga e para, përpara një trupi gjykues të ri.

    Rigjykimi përfshiu më shumë se 40 seanca dëgjimore dhe më shumë se 100 deklarata nga të pandehurit dhe dëshmitarët. Pas argumenteve përfundimtare të prokurorisë dhe avokatëve të familjes së Maradonës, avokatët mbrojtës të shtatë të pandehurve do të japin prezantimet e tyre. Vetëm atëherë gjykata do të vendosë për fajësinë e tyre.

    Maradona konsiderohet si një nga futbollistët më të mëdhenj të të gjitha kohërave. Ai fitoi Kupën e Botës me Argjentinën në vitin 1986 dhe e kaloi pjesën më të madhe të karrierës së tij në Napoli, me të cilën fitoi dy tituj kampioni italian dhe Kupën UEFA. /Telegrafi/

  • Kontrollohet shtëpia e të dyshuarit në Prishtinë, sekuestrohen disa SIM-kartela në rastin e mashtrimit

    Kontrollohet shtëpia e të dyshuarit në Prishtinë, sekuestrohen disa SIM-kartela në rastin e mashtrimit

    Policia e Kosovës ka vazhduar hetimet lidhur me një rast të dyshuar të mashtrimit në Prishtinë, ku gjatë kontrollit të shtëpisë së një të dyshuari janë gjetur dhe sekuestruar disa SIM-kartela, të cilat dyshohet se janë përdorur për kryerjen e veprës penale.

    Sipas raportit të Policisë, më 9 janar 2026, rreth orës 12:30, me urdhëresë të gjykatës është kontrolluar shtëpia e të dyshuarit të tretë, mashkull kosovar. Gjatë kontrollit, zyrtarët policorë kanë gjetur dhe sekuestruar disa SIM-kartela që dyshohet se kanë shërbyer për kryerjen e veprës penale të mashtrimit.

    I dyshuari është shoqëruar në stacionin policor, ku është intervistuar në lidhje me rastin. Pas intervistimit, në konsultim me prokurorin, ai është liruar dhe rasti do të vazhdojë të trajtohet në procedurë të rregullt.

    Policia nuk ka dhënë detaje të tjera lidhur me rastin, ndërsa hetimet po vazhdojnë. /Telegrafi/

  • Ekskluzive | Goditet grupi i dyshuar për mashtrime me SMS në Kosovë – mbi 150 raste vetëm në Prishtinë, bastisje edhe në Prizren

    Hetimet për një skemë të gjerë mashtrimesh përmes SMS-ve, ku qytetarëve u janë marrë të dhënat bankare duke u paraqitur rrejshëm si institucione shtetërore dhe banka, kanë çuar në identifikimin dhe procedimin e disa personave të dyshuar.

    Burimet e Sinjalit bëjnë me dije se Njësia e Krimeve Kibernetike ka hetuar ankesa të shumta të qytetarëve, të cilët dyshohet se janë mashtruar përmes mesazheve që paraqiteshin kinse vinin nga Policia e Kosovës, banka, ATK-ja apo platforma e-Kosova.

    Përmes këtyre mesazheve, sipas dyshimeve hetimore, janë siguruar të dhëna të kartelave bankare, të cilat më pas janë përdorur për transferime të parave, tërheqje të mjeteve apo blerje online.

    Në kuadër të hetimeve, më 4 qershor 2026, në lagjen Dragodan në Prishtinë, ishte arrestuar Angel Ognyanov Ralchev, ndërsa gjatë kontrollit të apartamentit ishin sekuestruar dy telefona, katër SIM kartela, tetë kartela bankare, pajisje të tjera teknologjike dhe një automjet. Atij më pas i ishte caktuar një muaj paraburgim.

    Katër ditë më vonë, më 8 qershor, në Prizren ishte arrestuar edhe Florian Imer Hoti, ndërsa gjatë kontrolleve në dy lokacione në Krushë të Madhe ishin sekuestruar prova materiale që dyshohet se ndërlidhen me rastin.

    Sipas informacioneve që ka siguruar Sinjali, hetimet kanë nxjerrë dyshime për një grup të strukturuar kriminal, ndërsa vetëm në rajonin e Prishtinës janë identifikuar mbi 150 raste mashtrimi, me një dëm financiar të konsiderueshëm.

    Hetuesit kanë identifikuar edhe persona të tjerë që dyshohet se lidhen me skemën, ndërsa veprimet hetimore për lokalizimin dhe verifikimin e rolit të tyre kanë vazhduar.

    Në zhvillimin më të fundit, më 8 tetor 2026, hetuesit kanë realizuar një urdhërkontroll në Prizren, me asistencë të njësive kompetente.

    Gjatë kontrollit të shtëpisë së personit të dyshuar janë gjetur dhe sekuestruar disa SIM kartela, të cilat dyshohet se janë përdorur në kryerjen e veprave penale.

    I dyshuari është shoqëruar për intervistim dhe, pas përfundimit të procedurave, në konsultim me Prokurorin e Shtetit është liruar në procedurë të rregullt.

    Rasti po hetohet për veprat penale “Lëshimi i çeqeve pa mbulesë ose të rreme dhe keqpërdorimi i kartelave të bankës apo kreditit” dhe “Mashtrimi”, ndërsa hetimet për personat e tjerë të dyshuar po vazhdojnë.

    Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

    Sinjali – aty ku e vërteta flet para lajmit!

    /GazetaSinjali/

    The post Ekskluzive | Goditet grupi i dyshuar për mashtrime me SMS në Kosovë – mbi 150 raste vetëm në Prishtinë, bastisje edhe në Prizren appeared first on Sinjali.

    Burimi: Sinjali

  • Pas dekadash në arrati, arrestohet në SHBA i shumëkërkuari shqiptar, i akuzuar për disa vrasje

    Pas dekadash në arrati, arrestohet në SHBA i shumëkërkuari shqiptar, i akuzuar për disa vrasje

    Pas dekadash në arrati, arrestohet në SHBA i shumëkërkuari shqiptar, i akuzuar për disa vrasje

    Arrestohet në Shtetet e Bashkuara të Amerikës i shumëkërkuari Valentin Ftoni.

    Raportohet se hetimet për gjetjen e tij u kryen në bashkëpunim me marshallët amerikanë, Ambasadën Amerikane në Tiranë dhe autoritete të tjera ligjzbatuese.

    Ftoni i është shmangur drejtësisë duke përdorur identitete të ndryshme. Ai dyshohet se është autor i disa vrasjeve, teksa në Shqipëri i është dhënë një dënim me 25 vite burg.

    The post Pas dekadash në arrati, arrestohet në SHBA i shumëkërkuari shqiptar, i akuzuar për disa vrasje appeared first on Insajderi.

  • I ofroi 5 euro ryshfet policit në Vërmicë, prangoset

    I ofroi 5 euro ryshfet policit në Vërmicë, prangoset

    I ofroi 5 euro ryshfet policit në Vërmicë, prangoset

    Një person është arrestuar në Pikën e Kalimit Kufitar në Vërmicë, nën dyshimin për dhënie ryshfeti.

    Sipas raportit policor, i dyshuari gjatë prezantimit të dokumenteve personale dhe të kamionit, kishte vendosur një kartëmonedhë prej 5 eurosh brenda dokumenteve, transmeton Klankosova.tv.

    I dyshuari është intervistuar nga organet kompetente dhe, me vendim të prokurorit, është dërguar në mbajtje.

  • Podujevë: Djali rrah babanë, vetë përfundon në Psikiatri

    Podujevë: Djali rrah babanë, vetë përfundon në Psikiatri

    Podujevë: Djali rrah babanë, vetë përfundon në Psikiatri

    Një person dyshohet se ka ushtruar dhunë ndaj babait të tij mbrëmjen e së enjtes në Podujevë.

    Sipas raportit 24-orësh të Policisë, i dyshuari, i cili dyshohet se është përdorues i narkotikëve, ka pranuar trajtim mjekësor në Klinikën e Psikiatrisë në QKUK.

    “Me vendim të prokurorit, ai është arrestuar dhe dërguar në mbajtje”, thotë PK./Klankosova.tv

  • Vëllai sulmon motrën në Malishevë, gjatë ndërhyrjes për t’i ndarë lëndohet edhe babai

    Vëllai sulmon motrën në Malishevë, gjatë ndërhyrjes për t’i ndarë lëndohet edhe babai

    Vëllai sulmon motrën në Malishevë, gjatë ndërhyrjes për t’i ndarë lëndohet edhe babai

    Një rast i dhunës në familje është raportuar mbrëmjen e së enjtes në Malishevë, ku si pasojë e një mosmarrëveshjeje, një grua është sulmuar fizikisht nga vëllai i saj.

    Sipas raportit policor, gjatë incidentit, lëndime trupore ka pësuar edhe babai i tyre, i cili kishte ndërhyrë për t’i ndarë, transmeton Klankosova.tv.

    Të dy viktimat kanë pranuar tretman mjekësor, ndërsa i dyshuari, pas marrjes së terapisë mjekësore, është intervistuar nga organet e rendit.

    Me vendim të prokurorit, i dyshuari është liruar.

  • Gjuha e Vuçiqit ndaj Shaip Kamberit dhe shqiptarëve, Mustafa publikon videon: Kjo ushqen urrejtjen dhe krijon terren për frikësim

    Gjuha e Vuçiqit ndaj Shaip Kamberit dhe shqiptarëve, Mustafa publikon videon: Kjo ushqen urrejtjen dhe krijon terren për frikësim

    Kryetari i Partisë për Veprim Demokratik (PVD), Ragmi Mustafa, ka reaguar ndaj deklaratave të presidentit të Serbisë, Aleksandar Vuçiq, në televizionin Informer, lidhur me deputetin shqiptar Shaip Kamberi dhe bashkimin politik të shqiptarëve.

    Mustafa ka thënë se Vuçiqi e paraqet bashkimin politik të shqiptarëve si veprim të “armiqve të Serbisë”, ndërsa Kamberin e ka cilësuar si “më të keqin dhe më të ligun ndër ta”.

    Lexoni të plotë postimin e tij:

    Dëgjojeni gjuhën e Aleksandër Vučićit në TV Informer ndaj Shaip Kamberit dhe shqiptarëve.

    Bashkimin politik të shqiptarëve e paraqet si vepër të “armiqve të Serbisë”, siç e përmbledh Bujanovačke, ndërsa Shaip Kamberin e quan “më të keqin dhe më të ligun ndër ta”.

    Ai pretendon se bashkimi synon ngritjen e çështjes së Luginës së Preshevës në Shtetet e Bashkuara të Amerikës dhe në Evropë. Në këtë kontekst sulmon edhe kongresmenin amerikan Joe Wilson, duke e etiketuar si “të paguar” të shqiptarëve. Angazhimin me përfaqësues amerikanë, evropianë dhe diplomatë e paraqet si veprim kundër Serbisë. Dhe e përmbyll: “Nuk do t’ua lejoj.”

    Kjo gjuhë ushqen urrejtjen dhe krijon terren për frikësim. Përfaqësimin demokratik dhe avokimin ndërkombëtar për të drejtat tona përpiqet t’i trajtojë si kërcënim.

    Po, çështjen e Luginës së Preshevës do ta ngremë në Uashington, në Bruksel dhe kudo ku mbrohen të drejtat e njeriut. Do të kërkojmë mbështetje për barazi, përfaqësim dhe zbatimin e zotimeve të shtetit ndaj shqiptarëve. Bashkëpunimi me partnerët amerikanë dhe evropianë është pjesë e këtij angazhimi demokratik.

    Z. Vučić, shqiptarët kanë të drejtë të bashkohen, të përfaqësohen dhe të flasin për padrejtësitë që përjetojnë. Për këtë nuk u duhet leja jote.

    Qëndroj përkrah Shaip Kamberit dhe “Koalicionit Shqiptar” si dhe të drejtës sonë për përfaqësim publik të lirë e dinjitoz. Barazia nuk është armiqësi. /Telegrafi/

  • Me afrimin e dimrit dhe intensifikimin e sulmeve ruse, banorët e Kievit kërkojnë strehim diku tjetër

    Me afrimin e dimrit dhe intensifikimin e sulmeve ruse, banorët e Kievit kërkojnë strehim diku tjetër

    Ndërsa sulmet ruse ndaj qyteteve ukrainase po intensifikohen dhe temperaturat e vjeshtës paralajmërojnë një tjetër dimër të vështirë, banorët e Kievit po përballen me një zgjedhje të vështirë: si t’u bëjnë ballë sulmeve me dronë e raketa dhe të ftohtit të ashpër.

    “Dimri i kaluar në Kiev ishte shumë i vështirë”, thotë Mariia Shostak, nënë e dy fëmijëve, e cila tashmë po bën gati valixhet për t’u larguar nga banesa e saj e vogël, transmeton Telegrafi.

    Temperaturat për periudha të gjata nën zero dhe ndërprerjet e shpeshta të energjisë elektrike, të shkaktuara nga sulmet ruse ndaj infrastrukturës energjetike, e bënë dimrin e kaluar një nga më të vështirët që nga fillimi i luftës.

    “Ka pasur ditë dhe javë që ishin të padurueshme. Fillova të mendoja se nuk mund ta përjetoja edhe një dimër tjetër kështu”, tregon ajo.

    Mariia nuk po pret as ardhjen e dimrit. Sulmet e fundit ruse ndaj kryeqytetit e kanë shtyrë të marrë vendimin për t’u larguar.

    Gjendja, sipas saj, ndryshoi në fund të gushtit dhe në fillim të shtatorit, kur Kievi nisi të sulmohej pothuajse gjatë gjithë kohës. Më parë, dronët dhe raketat përgjoheshin në periferi, ndërsa tani shpërthimet po ndodhin në qendër të qytetit, drejtpërdrejt mbi kokat e banorëve.

    Pas disa javësh sulmesh në rritje, që deri në fund të shtatorit kishin përfshirë pika karburanti, centrale elektrike dhe ura të rëndësishme mbi lumin Dnipro, kryetari i Kievit, Vitaliy Klitschko, e përshkroi situatën si “shumë dramatike”. Sipas tij, sulmet po e shkatërrojnë qytetin.

    Fëmijët e Mariias, Arturi katërvjeçar dhe Kira dyvjeçare, kanë lindur të dy pas nisjes së pushtimit të plotë rus në vitin 2022. Për të mos i ekspozuar ndaj një tjetër dimri të rrezikshëm dhe të vështirë, ajo planifikon t’i marrë me vete në Hurghada, në bregdetin egjiptian të Detit të Kuq. Ky destinacion është më i lirë se shumë vende evropiane dhe ka klimë më të ngrohtë.

    “Nuk ndihem aspak e sigurt në Ukrainë”, thotë Mariia.

    Sondazhet tregojnë se shumë ukrainas po mendojnë në mënyrë të ngjashme, edhe pse jo të gjithë kanë vendosur të largohen. Një anketë e kompanisë kërkimore Gradus, e realizuar në shtator, zbuloi se 40 për qind e ukrainasve po shqyrtonin mundësinë e zhvendosjes nëse kushtet e jetesës vazhdonin të përkeqësoheshin. Ndërkohë, 35 për qind thanë se nuk do të largoheshin, ndërsa 25 për qind nuk kishin vendosur ende.

    “ njerëzit po mendojnë për një kombinim faktorësh stresues”, tha Evgeniya Blyznyuk, themeluese dhe drejtoreshë ekzekutive e Gradus. Sipas saj, shqetësimi nuk lidhet vetëm me energjinë elektrike dhe ndërprerjet e saj, por edhe me sulmet ndaj qendrave të mëdha logjistike, që shtojnë frikën për furnizimin me produkte dhe ushqime gjatë dimrit.

    Sulmet e fundit ndaj urave, pikave të karburantit dhe shkollave në Kiev e kanë shtuar ndjenjën e pasigurisë. Për familjet me fëmijë të vegjël, situata është veçanërisht shqetësuese.

    Iryna, e cila kërkoi të mos publikohej mbiemri i saj, thotë se vajza e saj trevjeçare, Polina, e pati shumë të vështirë dimrin e kaluar. Familja kaloi javë pa ngrohje, ndërsa temperatura brenda banesës zbriste në zero ose pesë gradë Celsius.

    “Të qëndroje aty me një fëmijë të vogël, që sëmurej vazhdimisht, nuk ishte aspak mirë”, tregon ajo.

    Përvojat e fundit e kanë përkeqësuar edhe më shumë gjendjen e vajzës. Familja është përballur me dy sulme raketore këtë vit. Shpërthimi i parë, në fillim të qershorit, ua theu disa dritare në banesën e tyre në pjesën veriperëndimore të Kievit. Një muaj më vonë, pasi disa dëme ishin riparuar, një tjetër shpërthim pranë ndërtesës dhjetëkatëshe hodhi dhe e mbeturina drejt banesës, duke i detyruar të zhvendoseshin përkohësisht.

    Shëndeti i Polinës është përkeqësuar. Ajo vuan nga ankthi i rëndë, i cili shoqërohet me episode të mosmbajtjes së urinës, të vjella dhe dridhje të pakontrollueshme.

    “ Tani kemi edhe një problem neurologjik me të dhe kjo është arsyeja pse po mendojmë të largohemi. Pas çdo bombardimi shfaqen simptoma të reja”, thotë Iryna.

    Bashkëshorti i saj shërben në ushtri, ndërsa ajo ende nuk ka vendosur se ku do të shkojë. Puna në një organizatë joqeveritare ndërkombëtare mund t’i mundësojë të punojë nga distanca në Poloni.

    “Presidenti ynë thotë se është më mirë të largohemi nga Kievi, sepse ky është objektivi numër një”, shprehet ajo.

    Për disa banorë të tjerë, zgjidhja gjendet më afër, në hapësirat rurale të Ukrainës. Olena Konoplia kaloi disa javë duke kërkuar një vend të përshtatshëm, para se të vendoste të zhvendosej në një shtëpi fshati, rreth dy orë larg kryeqytetit.

    “Vendosa se alternativa më e mirë do të ishte një fshat i vogël, pa fabrika, magazina apo stacione hekurudhore. Gjithçka që mund të bëhet objektiv i rusëve”, shpjegon ajo.

    Gjatë vizitës, Olena po transportonte furnizime në shtëpinë e re dhe mbikëqyrte vendosjen e një dere të re. Sipas traditës ukrainase, një prift kishte ardhur tashmë për ta bekuar banesën.

    Shtëpia ka ngrohëse me gaz, ndërsa në një hambar pranë saj është grumbulluar dru zjarri për t’i bërë ballë ndërprerjeve të mundshme të energjisë. Olena ka instaluar edhe internet me shpejtësi të lartë, të domosdoshëm për punën e saj në një fondacion bamirësie me seli në Kiev.

    Në një kohë kur sirenat e alarmit ajror dëgjohen vazhdimisht në kryeqytet dhe shpërthimet janë bërë pjesë e përditshmërisë, qetësia e fshatit është ajo që i nevojitet më shumë.

    “Pas disa netësh këtu, kur mund të fle pa shpërthime dhe pa sirena, ndihem më mirë. Mund të punoj, të shkruaj artikujt e mi dhe ndihem mirë”, thotë ajo.

    Së shpejti, me Olenën do të bashkohet edhe nëna e saj e moshuar, e cila jeton në një lagje të rrezikshme të Kievit dhe për të cilën kjo situatë përbën rrezik për shëndetin.

    Megjithatë, jo të gjithë kanë mundësi të marrin me qira ose të blejnë një shtëpi në fshat, apo të kalojnë disa muaj jashtë vendit. Shumica e banorëve të Kievit do të përpiqen ta përballojnë edhe një dimër tjetër në kryeqytet, ashtu siç kanë bërë më parë.

    Autoritetet po marrin masa për t’i ndihmuar. Disa nga banorët më të cenueshëm, përfshirë të moshuarit dhe gratë me fëmijë të vegjël, po pajisen me mundësi strehimi në sanatoriume dhe qendra rehabilitimi të përshtatura në zonat e pyllëzuara në periferi të qytetit.

    Ndërkohë, gjatë 18 muajve të fundit, rreth 15 centrale të vogla elektrike janë ndërtuar në pjesë të ndryshme të Kievit, me synimin për të forcuar rrjetin energjetik të dëmtuar. Ato janë vendosur në bunkerë të përforcuar dhe mbrohen nga sulmet me dronë përmes strukturave të mëdha prej çeliku. Secili central mund të sigurojë energji elektrike dhe ngrohje për disa qindra ndërtesa të larta banimi.

    Por kompanitë energjetike kanë nisur të paralajmërojnë ndërprerje të planifikuara të rrymës, ndërsa supermarketet po përballen herë pas here me mungesa të disa produkteve. Kjo po e shton presionin mbi banorët që të largohen.

    Megjithatë, Evgeniya Blyznyuk nuk pret një largim masiv nga kryeqyteti. Sipas saj, shumica e njerëzve ende nuk kanë marrë vendim, pasi hezitojnë të rrezikojnë vendet e punës ose t’i largojnë fëmijët nga shkolla.

    “Ata do ta shtyjnë vendimin derisa kushtet të bëhen vërtet të papërballueshme”, përfundon ajo. /Telegrafi/