Skuadra madrilene e ka vendosur fitoren që në pjesën e parë, duke shënuar të tri golat brenda dyzet e pesë minutave të para.
Kylian Mbappe e ka kaluar Real Madrid në epërsi në minutën e dhjetë, nga pika e bardhë e penalltisë. Francezi është treguar i saktë pasi Matteo Prati e kishte ndalur në mënyrë të palejuar brenda zonës së rreptësisë.
Racing Santander ka tentuar të reagojë dhe ka pasur një mundësi të mirë për të barazuar, por portieri Thibaut Courtois ka bërë një pritje të rëndësishme.
Në mesin e pjesës së parë, Real Madrid e ka dyfishuar epërsinë. Arda Guler ka asistuar për Jude Bellingham, i cili e ka kaluar portierin kundërshtar dhe ka shënuar në portën e zbrazët.
Golin e tretë e ka realizuar Yan Diomande me një goditje të fortë nga jashtë zonës, pas një topi të kthyer nga mbrojtja e Racing Santander, duke e dërguar topin në këndin e sipërm të portës.
Në pjesën e dytë, Mbappe ka qenë afër golit të dytë personal, por goditja e tij është ndalur nga shtylla.
Racing Santander ka kërkuar edhe një penallti pas një prekje me dorë të Aurelien Tchouameni në zonën e rreptësisë, por pas shqyrtimit nga VAR është vendosur që nuk kishte penallti, pasi topi kishte prekur fillimisht këmbën e tij.
Me këtë fitore, Real Madridi e ka regjistruar fitoren e gjashtë radhazi në të gjitha garat dhe ka vazhduar garën me Barcelonën në krye të La Ligës.
Në anën tjetër, Racing Santanderit i është ndërprerë seria pozitive në shtëpi, ndërsa skuadra vazhdon të jetë pranë zonës së rënies nga liga.
Burimi: RTKLive