Përplasjet brenda familjes së Dolly Parton duket se po vazhdojnë edhe pas vdekjes së këngëtares.
Nipi i saj, Bryan Seaver, ka dalë në mbrojtje të motrës, Rebecca Seaver, pas raportimeve se ajo është larguar nga posti i drejtoreshës ekzekutive të muzeut “Life of Many Colors”, që ndodhet në hotelin SongTeller në Nashville.
Përmes një postimi në Facebook, Bryan shprehu krenarinë për punën e së motrës në krijimin e arkivit dhe muzeut kushtuar Dolly Parton, shkruan DailyMail.
Ai gjithashtu mohoi çdo armiqësi mes anëtarëve të familjes, duke theksuar se i mbështet si Rebeccën, ashtu edhe kushërirën e tij Danielle Parton.
Sipas raportimeve të TMZ, Rebecca dhe punonjësit që ajo drejtonte janë larguar nga muzeu, i cili ishte hapur më 29 shtator.
Ajo kishte punuar për realizimin e ekspozitës së bashku me motrën e Dolly-t, Rachel Parton George.
Ndërkohë, edhe vetë Bryan Seaver është përfshirë në një konflikt ligjor me Danny Nozell, menaxherin e pasurisë së këngëtares.
Bryan, i cili më parë drejtonte sigurinë e pronave dhe bizneseve të Parton, u largua nga pozicioni në shtator.
Nozell e ka akuzuar për kërcënime, ndërsa Seaver i ka mohuar ato dhe ka pretenduar në dokumentet gjyqësore se mesazhet janë nxjerrë jashtë kontekstit.
Në qendër të mosmarrëveshjes është edhe një pagesë prej 251 mijë dollarësh për shërbimet e sigurisë, e cila, sipas Seaver, i është paguar më vonë kompanisë së tij.
Ai ka pretenduar gjithashtu se kishte ngritur shqetësime për probleme të sigurisë dhe vonesa në hotelin SongTeller. /Telegrafi/