Kryeministri i Polonisë, Donald Tusk, i ka kërkuar presidentit Karol Nawrocki të konfirmojë gjyqtarët e zgjedhur nga parlamenti për Gjykatën Kushtetuese, në përpjekje për t’i dhënë fund përplasjes lidhur me emërimet dhe kontrollin e këtij institucioni.
Tusk e akuzoi presidentin se po zgjedh një përballje të drejtpërdrejtë, e cila, sipas tij, mund t’i kushtojë shtrenjtë Polonisë, transmeton Telegrafi.
“Zgjidhja e konfliktit është e thjeshtë dhe mund të arrihet pa ndryshuar Kushtetutën. Presidenti i njeh gjyqtarët e zgjedhur në mënyrë të ligjshme nga Sejmi, siç parashihet me Kushtetutë, dhe ata fillojnë detyrën në Gjykatën Kushtetuese”, shkroi Tusk të hënën në rrjetet sociale.
Përplasjet e fundit u përshkallëzuan javën e kaluar, kur protestuesit dhe policia u përballën jashtë selisë së Gjykatës, pas pezullimit të kryetarit të saj. Ngjarja shënoi një tjetër episod në konfliktin që po vazhdon prej vitesh për emërimet e gjyqtarëve dhe kontrollin e institucionit.
Që prej rikthimit në pushtet në vitin 2023, Tusk ka premtuar zgjidhjen e krizës kushtetuese, e cila zgjat prej më shumë se një dekade. Opozita nacionaliste vazhdon të ketë ndikim në Gjykatën Kushtetuese, ndërsa parlamenti ka zgjedhur gjyqtarë të rinj, por jo të gjithë janë lejuar të bëjnë betimin para presidentit.
Emërimet në këtë institucion janë politizuar ndjeshëm, ndërsa janë ngritur vazhdimisht pikëpyetje për pavarësinë e tij. Qeveria e mëparshme e partisë Ligj dhe Drejtësi (PiS), në vitin 2015, emëroi gjyqtarë të lidhur politikisht me të, të cilët nuk njihen nga qeveria e Tuskut dhe as nga Bashkimi Evropian.
Kriza u përshkallëzua të premten në mbrëmje, kur policia u vendos përreth Gjykatës, ndërsa autoritetet gjyqësore dhe politike ndërmorën hapa që prekën udhëheqjen e saj. Presidenti Nawrocki ndërpreu një vizitë në Senegal dhe u kthye në Varshavë, pas zhvillimeve.
Protestuesit konservatorë dhe përfaqësues të opozitës së djathtë dhe ekstremit të djathtë i cilësuan veprimet e qeverisë si “grusht shteti”. Në anën tjetër, koalicioni qeverisës proevropian tha se masat ishin të nevojshme për ruajtjen e sundimit të ligjit.
Të shtunën, Nawrocki zhvilloi bisedime me liderët politikë, por takimi nuk solli ndonjë rezultat të rëndësishëm.
Ndërkohë, Komisioni Evropian ka bërë të ditur se po e përcjell nga afër situatën dhe ka theksuar se parlamenti polak ka të drejtë të emërojë gjyqtarët e Gjykatës Kushtetuese.
“U takon autoriteteve polake të sigurojnë që Gjykata Kushtetuese të funksionojë në përputhje me Kushtetutën e Polonisë dhe duke respektuar praktikën përkatëse gjyqësore të Gjykatës së Drejtësisë së Bashkimit Evropian”, deklaroi një zëdhënës i Komisionit për Euronews.
Ai shtoi se emërimi i tetë anëtarëve të rinj të Gjykatës Kushtetuese është në kompetencën kushtetuese të Sejmit, parlamentit të Polonisë. /Telegrafi/