Një aksident i rëndë trafiku në Stacionin e Autobusëve në Prishtinë ka përfunduar tragjikisht për një 73-vjeçare. E moshuara, e cila u godit nga një autobus mëngjesin e së premtes, fillimisht ishte dërguar në QKUK me vetëdije dhe në gjendje të qëndrueshme shëndetësore. Por vetëm disa orë më vonë, gjendja e saj u përkeqësua dhe, përkundër trajtimit mjekësor, ajo ndërroi jetë.
Gazeta Sinjali mëson se viktima është Nexhmije Krasniqi, rreth 73-vjeçare, ndërsa aksidenti ka ndodhur më 6 nëntor 2026, rreth orës 08:00, në hapësirën e Stacionit të Autobusëve në Prishtinë.
Sipas informacioneve që ka siguruar Sinjali, në aksident është përfshirë një autobus që drejtohej nga Florent Gjoshi, rreth 48-vjeçar, i cili dyshohet se ka goditur këmbësoren.
Menjëherë pas aksidentit, 73-vjeçarja është dërguar për trajtim mjekësor në Qendrën Klinike Universitare të Kosovës.
Në momentet e para pas aksidentit, ajo ishte e vetëdijshme dhe gjendja e saj shëndetësore raportohej si stabile.
Megjithatë, rreth orës 11:00, nga QKUK autoritetet janë njoftuar se gjendja e viktimës ishte rënduar.
Për rastin është njoftuar Prokuroria e Shtetit, e cila ka kërkuar që të përcillej gjendja shëndetësore e këmbësores dhe të informohej për çdo zhvillim.
Rreth orës 12:30, mjeku kujdestar ka konfirmuar lajmin tragjik se Nexhmije Krasniqi kishte ndërruar jetë.
Pas konfirmimit të vdekjes, në vendin e ngjarjes ka dalë edhe përfaqësuesi i Prokurorisë së Shtetit, ndërsa Njësia e Hetimeve të Trafikut Rajonal ka vazhduar veprimet hetimore për zbardhjen e rrethanave të aksidentit.
Me vendim të Prokurorisë, shoferi i autobusit, Florent Gjoshi, është ndaluar.
Hetimet pritet të sqarojnë dinamikën e aksidentit, rrethanat në të cilat është goditur këmbësorja dhe përgjegjësinë eventuale penale të shoferit.
Deri më tani nuk janë bërë të ditura hollësi të tjera për shkaqet e aksidentit.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali