UDC përjashton Céline Amaudruz nga gara për Këshillin Federal

UDC përjashton Céline Amaudruz nga gara për Këshillin Federal

Written by

in

Partia Popullore Zvicerane (UDC) ka përzgjedhur zyrtarisht dy kandidatët që do të garojnë për vendin e Guy Parmelin në Këshillin Federal. Thomas Aeschi dhe Michael Graber u nominuan të premten nga grupi parlamentar i partisë, ndërsa Céline Amaudruz nga Gjeneva mbeti jashtë listës, pas një gare me tetë kandidatë.

Thomas Aeschi, 47 vjeç, këshilltar kombëtar nga kantoni i Zugut dhe kryetar i grupit parlamentar në Dhomat Federale, si dhe Michael Graber, këshilltar kombëtar nga kantoni i Valisit, janë dy emrat që UDC-ja do të propozojë për këtë garë, shkruan 20minuten.

Vendimi erdhi pas dëgjimeve të tetë kandidatëve. Grupi parlamentar nuk përzgjodhi një kandidat të tretë, por u përmbajt listës me dy emra të propozuar nga udhëheqja e partisë të mërkurën.

Moszgjedhja e Céline Amaudruz shihet si një goditje për Zvicrën frëngjishtfolëse dhe për gratë, pasi ajo ishte e vetmja grua në garë për ta pasuar Guy Parmelin. Edhe Pierre-Alain Schnegg, anëtar i qeverisë kantonale të Bernës nga rajoni Jura, nuk u përfshi në listën përfundimtare.

Céline Amaudruz ishte përballur me kritika brenda partisë

Eliminimi i Amaudruz nuk ishte befasi, pasi që nga shpallja e kandidaturës së saj ajo ishte përballur me sulme të shumta nga dega gjermanishtfolëse e partisë.

Kritikat kishin përfshirë pamjen e saj, faktin që është nënë e dy vajzave të vogla dhe pasurinë e saj. Gjithashtu, ishin vënë në pikëpyetje ndikimi i saj politik dhe aftësia për të qeverisur, pavarësisht se kishte qenë nënkryetare e UDC-së për gati dhjetë vjet, transmeton Telegrafi.

Moszgjedhja e saj përbën gjithashtu një goditje për kantonin e Gjenevës, i cili nuk ka pasur përfaqësues në qeverinë federale që nga largimi i Micheline Calmy-Rey në fund të vitit 2011.

Zugu dhe Valisi mund të përfaqësohen në Këshillin Federal

Ndërkohë, kantoni i Zugut mund të ketë dy përfaqësues në Këshillin Federal, pasi Thomas Aeschi do të ishte përkrah kreut të Mbrojtjes, Martin Pfister, i cili i përket Partisë së Qendrës.

Nëse Michael Graber zgjidhet, Valisi do të ketë sërish një ministër në Këshillin Federal, pas largimit të Viola Amherd në fund të marsit 2025./Telegrafi/