Universitetet kineze në listën e zezë të SHBA-së blejnë çipa të ndaluar të Nvidia-s

Universitetet kineze në listën e zezë të SHBA-së blejnë çipa të ndaluar të Nvidia-s

Written by

in

Universitetet kineze në listën e zezë të SHBA-së blejnë çipa të ndaluar të Nvidia-s

Të paktën gjashtë universitete kineze, të cilat janë në listën e zezë të qeverisë amerikane, kanë raportuar se kanë blerë çipa kompjuterikë të kufizuar të kompanisë Nvidia gjatë viteve të fundit.

Sipas një hulumtimi të CNN-it, dy prej këtyre universiteteve, të njohura për lidhjet e tyre me ushtrinë kineze, kanë raportuar blerje të çipave të fuqishëm vetëm gjatë muajve të fundit.

Blerjet janë realizuar përmes shitësve pak të njohur në Kinë dhe kanë përfshirë sasi relativisht të vogla të çipave më të vjetër, jo teknologjinë më të avancuar që përdoret për zhvillimin e inteligjencës artificiale.

Megjithatë, këto raste nxjerrin në pah vështirësitë e SHBA-së për të kontrolluar qasjen e institucioneve kineze në teknologjinë e kufizuar. Sipas ekspertëve, pasi çipat futen në Kinë, bëhet shumë e vështirë të parandalohet rishitja e tyre.

Ndër rastet më të rëndësishme janë blerjet e raportuara nga Harbin Institute of Technology, i cili në shtator kishte siguruar një çip A100 për rreth 7 mijë dollarë, si dhe nga Northwestern Polytechnical University, që në shtator dhe tetor kishte blerë katër çipa H200 në vlerë totale prej rreth 240 mijë dollarësh.

Të dy universitetet janë pjesë e grupit të njohur në Kinë si “Shtatë Bijtë e Mbrojtjes Kombëtare”, për shkak të lidhjeve të tyre me Ushtrinë Çlirimtare Popullore të Kinës.

Edhe Beihang University në Pekin, një tjetër institucion i këtij grupi, ka raportuar më shumë se një duzinë blerjesh të çipave Nvidia nga viti 2022 deri në vitin 2024, kryesisht të modeleve A100 dhe A800.

Sipas dokumenteve të shqyrtuara nga CNN, blerjet janë bërë përmes kompanive pak të njohura kineze dhe jo drejtpërdrejt nga Nvidia apo furnizuesit e saj kryesorë.

Ekspertët vlerësojnë se një pjesë e çipave mund të jenë siguruar përmes rezervave të krijuara para vendosjes së kufizimeve amerikane, ndërsa të tjerët mund të kenë hyrë në Kinë përmes rrjeteve të kontrabandës, kompanive fiktive dhe dokumenteve të falsifikuara.

CNN thekson se të dhënat e siguruara mund të mos përfshijnë të gjitha blerjet, ndërsa nuk ka arritur të verifikojë nëse pajisjet janë dorëzuar në secilin rast të raportuar.

Zbulimi vjen në një kohë kur administrata amerikane po përpiqet të mbyllë boshllëqet ligjore që kanë mundësuar hyrjen e teknologjisë së avancuar të inteligjencës artificiale në Kinë.

Sinjali – aty ku e vërteta flet para lajmit!

/GazetaSinjali/

Burimi: Sinjali