Ushtria izraelite nis operacion të ri në Gaza, synon të ndajë jugun nga veriu

Ushtria izraelite nis operacion të ri në Gaza, synon të ndajë jugun nga veriu

Written by

in

Ushtria izraelite ka nisur një operacion të ri ushtarak në pjesën qendrore të Rripit të Gazës, me synimin për të goditur atë që i cilëson si infrastrukturë terroriste dhe për të kontrolluar zonat përgjatë rrugës kryesore që lidh veriun me jugun e enklavës palestineze.

Operacioni po zhvillohet në tri zona pranë kampeve të refugjatëve Bureij dhe Nuseirat, ndërsa ushtria izraelite ka mbyllur disa segmente të rrugës Salah al-Din, një nga arteriet kryesore të qarkullimit në Gaza, shkruan jerusalempost.

Përmes një njoftimi, organi izraelit për koordinimin e aktiviteteve në territoret palestineze (COGAT) bëri të ditur se operacioni është përqendruar pranë të ashtuquajturës Vija e Verdhë, kufiri deri ku janë tërhequr forcat izraelite në kuadër të marrëveshjes së armëpushimit, e cila hyri në fuqi më 10 tetor 2025.

Autoritetet izraelite u kanë bërë thirrje banorëve që të mos i afrohen zonave ku po zhvillohet operacioni, ndërsa nuk kanë dhënë hollësi për kohëzgjatjen e tij.

Ndërkohë, raportimet nga terreni bëjnë të ditur se tanket izraelite po i afrohen rrugës Salah al-Din, mbyllja e së cilës mund të vështirësojë lëvizjen ndërmjet pjesës veriore dhe asaj jugore të Rripit të Gazës.

Operacioni i ri po zhvillohet pavarësisht armëpushimit në fuqi. Sipas të dhënave të Ministrisë së Shëndetësisë në Gaza, që nga fillimi i tij, sulmet izraelite kanë vrarë 1.650 palestinezë dhe kanë plagosur 5.975 të tjerë. /Telegrafi/