Pas ankesave të palëve dhe konfirmimit të dënimit me burgim të përjetshëm nga Gjykata e Apelit, vëllezërit Jeton dhe Nexhat Vllasaliu, të dënuar për vrasjen e biznesmenit Bedri Rexhepi, sot, më 29 tetor 2026, përballen sërish me drejtësinë, këtë herë në Gjykatën Supreme të Kosovës.
Seanca në instancën më të lartë gjyqësore mbahet pas ankesave të palëve, ndërsa më herët Gjykata e Apelit kishte lënë në fuqi aktgjykimin e Gjykatës Themelore në Prishtinë, me të cilin dy vëllezërit ishin dënuar secili me burgim të përjetshëm.
Familja e biznesmenit të ndjerë Bedri Rexhepi përfaqësohet nga avokati Besnik R. Berisha, i cili gjatë procedurave të mëparshme kishte kundërshtuar kërkesat e mbrojtjes për anulimin e aktgjykimit dënues.
Më 28 maj 2025, Gjykata Themelore në Prishtinë i kishte shpallur fajtorë Jeton dhe Nexhat Vllasaliun për vrasjen e rëndë të biznesmenit Bedri Rexhepi dhe dëmtimin e kufomës, duke i dënuar me burgim të përjetshëm.
Ky vendim ishte konfirmuar më 3 prill 2026 nga Gjykata e Apelit, e cila kishte refuzuar ankesat e mbrojtjes, duke lënë në fuqi dënimet e shqiptuara nga shkalla e parë.
Si ndodhi vrasja e biznesmenit Bedri Rexhepi?
Sipas aktakuzës së Prokurorisë Themelore në Prishtinë, vëllezërit Jeton dhe Nexhat Vllasaliu kishin planifikuar vrasjen e biznesmenit gjatë periudhës nga 9 janari deri më 8 prill 2021, me qëllim përfitimin e dobisë pasurore.
Prokuroria kishte pretenduar se dy vëllezërit e kishin vënë në lajthitje biznesmenin, duke i ofruar për shitje dy vetura në vlerë prej 30 mijë eurosh.
Më 8 prill 2021, Bedri Rexhepi kishte shkuar në shtëpinë e njërit prej të akuzuarve në fshatin Vllasali, ku, sipas aktakuzës, ishte privuar nga jeta.
Sipas pretendimeve të Prokurorisë, Jeton Vllasaliu e kishte ngufatur biznesmenin, duke besuar se ai kishte me vete shumën prej 30 mijë eurosh. Megjithatë, te viktima ishin gjetur vetëm 8 mijë euro.
Pas vrasjes, sipas aktakuzës, dy vëllezërit kishin ndërmarrë veprime për fshehjen e trupit dhe zhdukjen e gjurmëve të krimit.
Mbetjet mortore të biznesmenit ishin gjetur më 30 shtator 2022, në vendin e quajtur “Mali i Madh”, në fshatin Vllasali të Novobërdës, më shumë se një vit pas zhdukjes së tij.
Besnik R. Berisha: Nexhati ishte organizatori, Jetoni ekzekutuesi
Gjatë shqyrtimit të çështjes në Gjykatën e Apelit, avokati Besnik R. Berisha, përfaqësues i familjes së viktimës, kishte kundërshtuar kërkesat e mbrojtjes për kthimin e rastit në rigjykim.
Berisha kishte vlerësuar se bëhej fjalë për një krim jashtëzakonisht të rëndë, ndërsa kishte mbështetur dënimin me burgim të përjetshëm ndaj dy vëllezërve.
Sipas deklarimeve të tij gjatë procedurave të mëparshme, Nexhat Vllasaliu kishte qenë organizatori i vrasjes, ndërsa Jeton Vllasaliu ekzekutuesi.
Në anën tjetër, mbrojtja e të dënuarve kishte kundërshtuar aktgjykimin e shkallës së parë, duke kërkuar anulimin e tij.
Megjithatë, Gjykata e Apelit kishte vlerësuar se nuk kishte bazë për ndryshimin apo anulimin e vendimit të Gjykatës Themelore.
Pas konfirmimit të burgimit të përjetshëm, çështja shqyrtohet në Supreme
Pas vendimeve të dy instancave gjyqësore, rasti i vrasjes së biznesmenit Bedri Rexhepi tashmë ka arritur në Gjykatën Supreme.
Seanca e sotme mbahet pas ankesave të palëve, të cilat kanë kundërshtuar vendimet e mëparshme gjyqësore.
Në këtë fazë të procedurës, Gjykata Supreme pritet të shqyrtojë pretendimet juridike të paraqitura nga palët, ndërsa mbetet të shihet nëse do të ketë ndryshime lidhur me vendimet e mëparshme.
Rasti ka tërhequr vëmendje të madhe publike, si për mënyrën e kryerjes së vrasjes, ashtu edhe për faktin se trupi i biznesmenit ishte fshehur për më shumë se një vit.
Gazeta Sinjali po përcjell zhvillimet e këtij procesi gjyqësor dhe do të raportojë për deklarimet e palëve dhe vendimet eventuale të Gjykatës Supreme.
Shënim: Personi i përmendur në këtë lajm konsiderohet i pafajshëm derisa fajësia e tij të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali