Sulmuesi anglez Ivan Toney është deklaruar i pafajshëm për akuzën e sulmit, lidhur me një incident të pretenduar në një klub nate në Londër, në dhjetor të vitit 2025.
Toney u paraqit të enjten para Gjykatës së Kurorës në Southwark, ku zyrtarisht mohoi akuzën ndaj tij. Gjykimi është caktuar të nisë më 12 qershor 2028.
Sipas raportimeve, incidenti kishte ndodhur në një klub nate dhe hapësirë koncertesh në qendër të Londrës, ku një debat mes futbollistit dhe Saber Da Silvas dyshohet se kishte përfunduar në përleshje fizike.
Ish-sulmuesi i Brentfordit dyshohet se e kishte goditur Da Silvan me kokë dhe më pas me disa grushte. Sipas raportimeve, ai kishte pësuar lëndime në hundë dhe gishta.
Policia kishte arritur në vendin e ngjarjes brenda gjysmë ore dhe e kishte larguar Toney nga lokali. Futbollisti ishte akuzuar zyrtarisht në korrik të vitit 2026, pas një hetimi nga Policia Metropolitane.
Një zëdhënës i Toneyt kishte deklaruar më herët se futbollisti ishte i tronditur nga akuza dhe dëshironte ta dëshmonte pafajësinë e tij në gjykatë.
Gjykimi pritet të nisë vetëm tri ditë pas fillimit të Kampionatit Evropian 2028, i cili do të organizohet në Mbretërinë e Bashkuar dhe Irlandë. Kjo mund të ndikojë në mundësinë e sulmuesit për të qenë pjesë e turneut, kur ai do të jetë 32-vjeçar.
Toney kishte shënuar 72 gola gjatë katër viteve te Brentfordi, përpara se në vitin 2024 të transferohej te Al-Ahli në Arabinë Saudite.
Sinjali – aty ku e vërteta flet para lajmit!
Burimi: Sinjali