Kompania japoneze Sony ka rikthyer kufjet ikonike MDR-3, të prezantuara për herë të parë në vitin 1979 së bashku me kasetofonin e famshëm Walkman TPS-L2, duke i përshtatur me disa teknologji moderne.
Modeli i ri, i quajtur MDR-3R, ruan dizajnin klasik të paraardhësit, përfshirë konstruksionin e lehtë, formën e hapur dhe jastëkët karakteristikë në ngjyrë blu dhe portokalli, të cilët mund të ndërrohen.
Sony ka ruajtur edhe drejtuesit e zërit prej 23 milimetrash, ndërsa ka bërë përmirësime të lehta në cilësinë e audios. Ndër risitë kryesore janë mikrofoni i integruar për telefonata, komandat në kabllo dhe lidhja përmes portës USB-C.
Kufjet nuk kërkojnë karikim, lidhje Bluetooth apo përditësime softuerike, pasi funksionojnë duke u lidhur drejtpërdrejt me pajisje të përputhshme.
Përveç modelit standard, kompania ka prezantuar edhe versionin special MDR-3R Stranger Things Edition, të frymëzuar nga kufjet që përdor personazhi Max në serialin e Netflix-it.
Ky version vjen me logon e serialit, jastëkë të kuq dhe të zinj, si dhe paketim të veçantë.
Modeli standard shitet për 59.99 dollarë, ndërsa edicioni special kushton 79.99 dollarë. Të dy modelet janë në dispozicion në SHBA përmes dyqanit zyrtar të Sony-t, Amazon dhe shitësve të tjerë.
Sinjali – aty ku e vërteta flet para lajmit!
Burimi: Sinjali