Presidenti i Shteteve të Bashkuara, Donald Trump, duket se po e largon zëvendëspresidentin J.D. Vance nga drejtimi i negociatave të paqes me Iranin, duke i kërkuar që vëmendjen ta përqendrojë te problemet e brendshme të SHBA-së.
Gazeta The New York Times e interpreton postimin e Trumpit në rrjetet sociale si një pezullim joformal të pjesëmarrjes së Vance-it në negociata, ndërsa Politico shkruan se presidenti po e “tërheq” zëvendësin e tij nga kjo çështje.
“Nuk kemi nevojë për një marrëveshje me Iranin. Ato ditë kanë ikur prej kohësh”, shkroi Trump.
Në të njëjtin postim, presidenti amerikan bëri të ditur se i kishte kërkuar Vance-it të përqendrohej plotësisht te korrupsioni dhe krimi në qytetet dhe shtetet e drejtuara nga demokratët.
Ky zhvillim vjen pas deklaratave të fundit të Vance-it, i cili e lidhi humbjen e rëndë të republikanëve në zgjedhjet e mesmandatit me luftën kundër Iranit.
“Arsyeja pse humbëm është lufta”, kishte shkruar zëvendëspresidenti, duke argumentuar se humbja e Senatit për gjashtë vitet e ardhshme nuk mund të justifikohej me këtë konflikt.
Më herët gjatë këtij viti, Trump e kishte ngarkuar Vance-in me drejtimin e negociatave me Teheranin. Në prill, zëvendëspresidenti udhëtoi drejt Pakistanit, ku zhvilloi bisedime maratonë me përfaqësuesit iranianë, por takimi përfundoi pa marrëveshje.
Së fundmi, Vance kishte kontaktuar një zyrtar të lartë iranian përmes ndërmjetësve të Katarit, duke propozuar rifillimin e negociatave dhe një takim të menjëhershëm mes përfaqësuesve të të dyja vendeve, të cilin do ta drejtonte vetë.
Sinjali – aty ku e vërteta flet para lajmit!
Burimi: Sinjali