Printet dhe modelet e ndryshme kanë qenë gjithmonë një mënyrë efektive për t’i dhënë freski garderobës.
Ato sjellin teksturë, thellësi dhe ngjyra, duke u kthyer shpesh në elementin kryesor rreth të cilit ndërtohet një kombinim veshjeje.
Njëkohësisht, përbëjnë kontrast të bukur me tonet neutrale dhe më të zbehta që dominojnë gjatë kësaj periudhe të vitit.
Foto ilustruese
Historia e modës dëshmon se çantat me motive të ndryshme kanë qenë të kërkuara ndër breza.
Vitet ’70 u karakterizuan nga printet artistike, vitet ’80 nga logot e markave, ndërsa vitet ’90 nga çantat e mëdha me motive shtazore, të cilat u bënë të njohura edhe përmes Jennifer Aniston dhe Gwyneth Paltrow.
Po ashtu, në atë periudhë ishin të pranishme edhe motivet me kuadrate, shkruan Who What Wear.
Megjithatë, kulmin e popullaritetit çantat me printime e arritën në vitet 2000, siç dëshmojnë fotografitë e shumta të paparacëve me Hilary Duff, Paris Hilton dhe motrat Mary-Kate e Ashley Olsen.
Duke qenë se moda aktuale po karakterizohet nga nostalgjia dhe maksimalizmi, rikthimi i këtyre modeleve ishte vetëm çështje kohe.
Me afrimin e fundit të vitit, vëmendja po zhvendoset edhe drejt trendeve që pritet të dominojnë në vitin 2027.
Nga modelet elegante me efekt të lëkurës së krokodilit, deri te printet më të guximshme, këto janë pesë tendencat e çantave që po rikthehen në qendër të vëmendjes.
1. Motivi i tigrit
Motivi i tigrit
Motivi leopard përkohësisht po lë vendin e parë, pasi viti 2026 po karakterizohet nga vijat e tigrit.
Ky trend krijon një ekuilibër mes elegancës së përmbajtur dhe pamjes së veçantë, duke qenë zgjedhje ideale për ato që pëlqejnë modelet më të guximshme.
Printi i tigrit i jep më shumë karakter kombinimeve me ngjyra neutrale dhe krijon një pamje më interesante edhe kur vishet me xhinse të zakonshme, pa u dukur tepër i theksuar.
2. Çantat me monograme
Foto ilustruese
Çantat me monograme, të zbukuruara me inicialet dhe simbolet karakteristike të markave, janë rikthyer zyrtarisht, duke sjellë sërish estetikën e viteve 2000.
Këtij trendi i ka dhënë shtysë edhe rikthimi i modelit legjendar Fendi Baguette, i bërë i famshëm përmes personazhit Carrie Bradshaw.
Pas tij vijnë edhe modelet Louis Vuitton Speedy dhe çantat me motivin Gucci Giglio.
Kështu, moda e logove të dukshme po zë sërish një vend të rëndësishëm në skenën e modës.
3. Çantat me efekt të lëkurës së krokodilit
Pak tekstura arrijnë të përcjellin një ndjesi luksi sa imitimi i lëkurës së krokodilit.
Lajmi i mirë për adhurueset e këtij stili është se ky motiv i përjetshëm do të vazhdojë të jetë aktual edhe në vitin 2027.
Ai i jep strukturë dhe elegancë të menjëhershme edhe kombinimeve më të thjeshta të veshjeve.
Këto modele dëshmojnë se një aksesor nuk ka nevojë për ngjyra të ndezura për të tërhequr vëmendjen.
4. Çantat me kuadrate
Foto ilustruese
Interesimi aktual i modës për natyrën dhe stilin britanik është reflektuar edhe te çantat, duke rikthyer në fokus modelet me kuadrate.
Ato janë më pak të theksuara sesa printet grafike, por sërish arrijnë të bien në sy.
Motivi tartan konsiderohet pothuajse një klasik, pasi ndërthur elegancën dhe pamjen e përjetshme me një dozë rebelimi të stilit punk, duke e bërë çantën moderne dhe larg pamjes së vjetruar.
5. Çantat me motiv leopard
Foto ilustruese
Motivi leopard tashmë mund të konsiderohet si një ngjyrë neutrale në modë, ndërsa rikthimi i tij në formën e çantave e dëshmon edhe një herë këtë.
Edhe pse ruan guximin dhe karakterin e modeleve të viteve ’90, me afrimin e vitit 2027 ky print po shfaqet në nuanca më të buta dhe më të përmbajtura.
Për më tepër, është një model mjaft i kombinueshëm dhe praktik, i cili tashmë ka fituar shumë adhuruese.
Së fundmi, me çanta të tilla janë parë edhe emra të njohur të modës dhe showbizit, si Hailey Bieber, Kate Moss dhe Zoë Kravitz. /Telegrafi/