Category: Lajme

  • Mënyra si ecni fsheh një detaj: Një lloj ecjeje te gratë u lidh edhe me orgazmën

    Mënyra si ecni fsheh një detaj: Një lloj ecjeje te gratë u lidh edhe me orgazmën

    Hapat, ritmi dhe lëvizja e legenit mund të krijojnë përshtypje për vetëbesimin dhe gjendjen fizike, ndërsa një studim i vogël ka ngritur edhe një pyetje shumë më intime

    Mënyra se si ecim mund të japë informacione për qëndrimin e trupit, koordinimin, tonusin muskulor dhe gjendjen fizike. Shpesh, ecja krijon edhe përshtypje për vetëbesimin apo gjendjen emocionale të një personi.

    Por a mund të tregojë diçka edhe për jetën seksuale?

    Një studim i publikuar në The Journal of Sexual Medicine është marrë pikërisht me këtë pyetje. Studiuesit analizuan mënyrën e ecjes së një grupi të vogël grash dhe shqyrtuan nëse ekspertët mund të dallonin, vetëm duke i parë ato duke ecur, nëse kishin raportuar përjetimin e orgazmës gjatë marrëdhënieve vaginale.

    Ecje më e lirshme dhe lëvizje më e madhe e legenit

    Gratë që morën pjesë në studim plotësuan fillimisht një pyetësor për përvojat e tyre seksuale dhe më pas u filmuan duke ecur.

    Ekspertët që analizuan videot nuk kishin informacion për përgjigjet e pjesëmarrëseve. Megjithatë, sipas studimit, ata arritën të identifikonin historinë e raportuar të orgazmës vaginale në një pjesë të konsiderueshme të rasteve.

    Analiza tregoi se gratë që kishin raportuar një histori të tillë prireshin të kishin një ecje më të lirshme dhe më energjike, me hapa më të gjatë dhe me lëvizje më të dukshme të legenit dhe shtyllës kurrizore.

    Autorët e përshkruan këtë ecje si më fluide dhe më pak të ngurtë.

    Megjithatë, kjo nuk do të thotë se duke parë një grua duke ecur mund të përcaktohet me siguri jeta e saj seksuale. Studimi ishte i vogël dhe rezultatet nuk mund të përdoren si një lloj “testi” për aftësinë për të arritur orgazme, transmeton Telegrafi.

    Shutterstock

    Çfarë mund të tregojë mënyra e ecjes?

    Në jetën e përditshme, mënyrat e ndryshme të ecjes shpesh lidhen me tipare të caktuara të personalitetit, megjithëse këto interpretime nuk janë diagnoza psikologjike.

    Një person që ecën me hapa të vegjël, trup të tendosur dhe kokën pothuajse të palëvizshme mund të krijojë përshtypjen e pasigurisë ose tensionit. Megjithatë, një ecje e tillë mund të ndikohet edhe nga dhimbja, këpucët apo thjesht zakonet individuale.

    Një ecje e ngadalshme dhe e relaksuar, me lëvizje të lirshme të ijëve dhe krahët pranë trupit, zakonisht krijon përshtypjen e qetësisë.

    Në anën tjetër, hapat e sigurt, trupi drejt dhe ritmi konstant perceptohen shpesh si shenjë vetëbesimi dhe vendosmërie.

    Edhe ecja e ngjashme me atë të modeleve në pasarelë, me njërën këmbë para tjetrës, lëvizje të kontrolluar të ijëve dhe shpinë drejt, mund të japë përshtypjen e elegancës dhe sigurisë. Por kjo mënyrë ecjeje mund të mësohet dhe të praktikohet, prandaj nuk zbulon domosdoshmërisht karakterin.

    Shutterstock

    Ecja energjike tërheq vëmendjen

    Hapat e gjatë, figura drejt dhe lëvizjet më të theksuara të krahëve krijojnë zakonisht përshtypjen e energjisë dhe vetëbesimit.

    Interesante është se disa nga këto karakteristika, veçanërisht gjatësia e hapit dhe lëvizja më e lirshme e legenit dhe shtyllës kurrizore, u vunë re edhe në studimin që analizoi lidhjen ndërmjet ecjes dhe historisë së orgazmës vaginale.

    Megjithatë, shkencëtarët nuk kanë dëshmuar se një mënyrë e caktuar ecjeje do të thotë se një grua e arrin domosdoshmërisht më lehtë orgazmën.

    Ecja ndikohet nga shumë faktorë: anatomia, mosha, kondicioni, dëmtimet, dhimbjet, këpucët dhe gjendja emocionale.

    Prandaj, ecja mund të japë përshtypje për një person, por nuk është mënyrë e besueshme për të përcaktuar karakterin apo jetën e tij seksuale. Studimi mbetet interesant pikërisht sepse sugjeron një lidhje të mundshme mes lirisë së lëvizjes së trupit dhe disa aspekteve të funksionit seksual – por jo një rregull që vlen për çdo grua. /Telegrafi/

  • Presidentet gra, një traditë që po forcohet në Kosovë

    Presidentet gra, një traditë që po forcohet në Kosovë

    Presidentet gra, një traditë që po forcohet në Kosovë

    Kosova, në minutat e parë të datës 7 tetor 2026, është bërë me presidente të re, pas muajsh të tërë me këtë pozitë vakante – e mbajtur me ushtrues detyre.

    Justina Shiroka-Pula është e para e shtetit që pritet të shërbejë në këtë pozitë për një periudhë 5-vjeçare.

    Konfirmimi i Shiroka-Pulës në postin e drejtueses së shtetit erdhi pasi u votua nga 81 deputetë në seancën e jashtëzakonshme.

    Por, zgjedhja e Shiroka-Pulës në postin e të parës së shtetit, e pason një grua tjetër.

    Ishte Vjosa Osmani, presidentja që shërbeu nga viti 2021 deri më 2026 në këtë post.

    Më herët, edhe një grua e kreu këtë detyrë. Ishte Atifete Jahjaga ajo që u zgjodh në vitin 2011 dhe që shërberu deri më 2016.

    Pra, Kosova është bërë një ndër vendet e pakta në botë që për drejtues shteti ka pasur tre gra në historinë e saj si një shtet i ri.

    Vlen të theksohet se Shiroka-Pula është Presidenti/ja e shtatë në Republikën e Kosovës.

  • Kurti përqafon fort presidenten e re

    Kurti përqafon fort presidenten e re

    Kurti përqafon fort presidenten e re

    Justina Shiroka Pula është zgjedhur presidente e Kosovës.

    Ajo ishte propozimi i fundit i Albin Kurtit në ditën e gjatë të sotme, dhe që u pranua nga Partia Demokratike e Kosovës.

    Pasi u zgjodh, ajo pranoi një përqafim të fortë nga kryeministri.

  • Bajrami uron Shiroka-Pulën: Ju kam thënë që 6 deputetë të LDK s’e çojnë vendin në zgjedhje

    Bajrami uron Shiroka-Pulën: Ju kam thënë që 6 deputetë të LDK s’e çojnë vendin në zgjedhje

    Bajrami uron Shiroka-Pulën: Ju kam thënë që 6 deputetë të LDK s’e çojnë vendin në zgjedhje

    Deputetja e LDK-së, Hykmete Bajrami, ka reaguar pas zgjedhjes së presidentes së re të Kosovës, Justina Shiroka Pulës.

    “Ju kam thënë: ‘Gjashtë deputetë të LDK-së nuk e çojnë vendin në zgjedhje’”, ka shkruar Bajrami.

    Ajo ka shprehur urimin që Shiroka Pula të ruajë balancën mes pushteteve dhe unitetin shoqëror.

    “Uroj sinqerisht që profesoresha si presidente ta mbajë balancën mes pushteteve, unitetin shoqëror, ta respektojë Kushtetutën dhe interesin e vendit”, ka shkruar ajo.

    “Shumë suksese, Presidente!”, përfundoi Bajrami.

  • Osmani uron Shiroka Pulën për pozitën e presidentes: E ka mbështetjen time

    Osmani uron Shiroka Pulën për pozitën e presidentes: E ka mbështetjen time

    Osmani uron Shiroka Pulën për pozitën e presidentes: E ka mbështetjen time

    Ish-presidentja e Kosovës, Vjosa Osmani e ka uruar Justina Shiroka Pulën për zgjedhjen e saj në postin e kryetares së shtetit.

    Pas votimit në Kuvendin e Kosovës, Osmani ka thënë se do të jetë e hapur për ta mbështetur presidenten e re në sfidat që e presin.

    Ajo ka thënë se presidentja e re duhet ta udhëheq politikën e jashtme dhe t’i mbrojë ineteresat e shtetit të Kosovës dhe ruajtjen e aleancave.

    “Ka qenë një prej shpresave të mia të mëdha që një prej presidenteve të reja të jetë grua. I uroj sukses. Në këto sfida mund të llogrisë në mbështetjen time të përhershme për çdo çështje që është në interes të Republikës së Kosovës.”, ka thënë ajo.

  • Shiroka-Pula në fjalimin e parë: Do të jem presidente e të gjithë qytetarëve

    Shiroka-Pula në fjalimin e parë: Do të jem presidente e të gjithë qytetarëve

    Shiroka-Pula në fjalimin e parë: Do të jem presidente e të gjithë qytetarëve

    Presidentja e re e Kosovës, Justina Shiroka-Pula, ka folur pas zgjedhjes në këtë post.

    Në fjalimin e saj të parë si Presidente, Shiroka-Pula tha se e pranon detyrën me nder dhe përgjegjësi të plotë, duke theksuar se mandati i saj u përket të gjithë qytetarëve të Kosovës.

    “Sot e pranoj me nder të madh dhe me përgjegjësi të plotë detyrën e Presidentes së Republikës së Kosovës. Ky mandat nuk i përket vetëm një personi, ai i përket qytetarëve tanë, institucioneve tona dhe shtetit për të cilin shumë breza sakrifikuan”.

    “Do të jem presidente e të gjithë qytetarëve, do të dal pa dallim politik, etnik apo shoqëror. Do të punojë për unitet, drejtësi, zhvillim dhe për forcimin e institucioneve tona. Kosova duhet të ecë përpara”, deklaroi ajo./Klankosova.tv

  • Naomi Watts sfidon rregullat e modës afër të 60-ave: Kur doli në rrugët e Parisit, të gjithë sytë u kthyen nga ajo

    Naomi Watts sfidon rregullat e modës afër të 60-ave: Kur doli në rrugët e Parisit, të gjithë sytë u kthyen nga ajo

    Minifustan, geta me motive dhe taka të larta – aktorja zgjodhi një kombinim që sfidon idenë se me kalimin e viteve stili duhet të bëhet më i përmbajtur

    Për dekada me radhë ka ekzistuar një rregull i pashkruar i modës që u tregonte grave se çfarë “lejohej” të vishnin pasi kalonin një moshë të caktuar: jo taka shumë të larta, jo funde të shkurtra, jo geta që bien në sy dhe asgjë që tërheq tepër vëmendjen te këmbët.

    Sikur me kalimin e viteve gruaja duhej të bëhej gjithnjë e më e padukshme, ndërsa garderoba e saj më e gjerë, më e gjatë dhe më “e sigurt”.

    Pastaj, në Paris, u shfaq Naomi Watts.

    Aktorja 58-vjeçare mbërriti në sfilatën e Valentino-s gjatë Javës së Modës në Paris dhe tregoi në mënyrën më të mirë se sa të vjetruara janë këto rregulla.

    Pamja e saj nuk përpiqej t’i fshihte vitet – përkundrazi. Ishte lozonjare, femërore, paksa e guximshme dhe mbi të gjitha krejtësisht në stilin e saj.

    Naomi kishte zgjedhur një minifustan të çelët, të ngushtë pas trupit dhe me mëngë të gjata, me një formë pothuajse arkitekturore. Në qendër të kombinimit shtrihej një detaj vertikal i zi, nga qafa deri në fund të fustanit, i zbukuruar me fjongo të mëdha të zeza – njëra pranë qafës dhe tjetra në pjesën e poshtme.

    Poshtë fustanit dukej një këmishë në nuancë të kaltër të çelët, e cila i jepte siluetës së strukturuar një element më të lehtë dhe disi rinor.

    Por karakterin e vërtetë të këtij kombinimi e dhanë getat me motive të mëdha lulesh.

    Në vend që t’i fshihte nën pantallona apo një fund midi, Naomi i ktheu ato në një nga elementet kryesore të gjithë veshjes.

    Dhe pastaj erdhën takat.

    Në këmbë kishte këpucë Valentino Garavani Rockstud në ngjyrë vjollcë, me thumbat karakteristikë dekorativë dhe takën e hollë e të lartë.

    Pikërisht kombinimi i minifustanit, getave dekorative dhe takave të larta sfidoi idenë tradicionale se si duhet të vishet “në mënyrë të përshtatshme” një grua në moshë të pjekur.

    Modeli Valentino Rockstud është prej vitesh një nga elementet më të njohura të shtëpisë italiane të modës.

    As modeli i flokëve nuk ishte klasik. Naomi i kishte stiluar në një formë pothuajse skulpturore dhe artistike, ndërsa syzet e mëdha të diellit i dhanë paraqitjes një karakter edhe më editorial.

    Dhe pikërisht këtu qëndron thelbi.

    Nuk do të thotë që tani çdo grua 50 apo 60 vjeçe duhet të veshë minifund dhe taka të larta. As që duhet të përpiqet të duket “si vajzë”.

    Ideja është shumë më e thjeshtë: një grua nuk ka pse të veshë atë që të tjerët e konsiderojnë të përshtatshme për moshën e saj.

    Nëse i pëlqejnë këpucët e sheshta – le t’i veshë.

    Nëse ndihet mirë me atlete – po ashtu.

    Por nëse i pëlqejnë takat, fustanet e shkurtra, ngjyrat e forta, motivet e guximshme apo fundet që nxjerrin në pah këmbët – pse duhet data e lindjes të jetë arsye për të hequr dorë prej tyre?

    Naomi Watts tregoi pikërisht këtë në Paris: mosha nuk është kategori mode.

    Kanë kaluar kohët kur grave u thuhej se pas të 40-ave duhet të visheshin “më seriozisht”, pas të 50-ave “më përmbajtur”, ndërsa pas të 60-ave pothuajse të mos binin më në sy.

    Moda bashkëkohore u përket gjithnjë e më shumë grave që e njohin veten, e dinë se çfarë u pëlqen dhe nuk ndiejnë nevojën të përshtaten me idetë e të tjerëve për mënyrën se si “duhet” të duken.

    Sepse këshilla më e mirë e modës për një grua pas të 50-ave ndoshta nuk është më:

    “Çfarë i përshtatet moshës sate?”

    Por: “Në çfarë veshjeje ndihesh vetvetja?”

    Dhe Naomi Watts në Paris, në moshën 58-vjeçare, dha përgjigjen e saj: me minifustan, geta me lule dhe taka Valentino Rockstud. /Telegrafi/

  • Abrashi uron Shiroka-Pulën për zgjedhjen presidente: Kosova ka nevojë për stabilitet, dialog dhe unitet

    Abrashi uron Shiroka-Pulën për zgjedhjen presidente: Kosova ka nevojë për stabilitet, dialog dhe unitet

    Kryetari i Aleancës Kosova e Re (AKR), Emir Abrashi, ka uruar Justina Shiroka-Pulën për zgjedhjen presidente të Republikës së Kosovës.

    Në një reagim pas zgjedhjes së saj në krye të shtetit, Abrashi e ka cilësuar Shiroka-Pulën si një figurë me përvojë të gjatë akademike, publike dhe institucionale.

    “Lajm fantastik për Kosovën që një zonjë e nderuar, me përvojë të gjatë akademike, publike dhe institucionale, si znj. Shiroka Pula, merr përgjegjësinë më të lartë shtetërore në Republikën tonë”, ka shkruar Abrashi.

    Ai ka theksuar se, sipas tij, Kosova ka nevojë për stabilitet institucional, dialog dhe unitet.

    “Kosova sot, më shumë se kurrë, ka nevojë për stabilitet institucional, dialog dhe unitet, në mënyrë që energjinë tonë ta përqendrojmë në tejkalimin e sfidave që kemi përpara si shoqëri dhe si shtet”, është shprehur ai.

    Abrashi ka thënë se pret që presidentja e re ta ushtrojë detyrën në përputhje me përgjegjësitë kushtetuese të kreut të shtetit.

    “Jam i bindur se Presidentja Shiroka Pula do ta ushtrojë me nder, dinjitet dhe përgjegjësi këtë detyrë të lartë shtetërore, duke përfaqësuar unitetin e popullit, ashtu siç e përcakton Kushtetuta e Republikës”, ka shkruar kryetari i AKR-së.

    Në fund, Abrashi ka uruar Shiroka-Pulën dhe Republikën e Kosovës për zgjedhjen e presidentes së re.

    “Urime Presidentes Shiroka Pula dhe urime Republikës së Kosovës!”, ka përfunduar ai./Telegrafi.

  • PDK përshëndet miratimin e ndryshimeve në Ligjin për Specialen dhe zgjedhjen e presidentes

    PDK përshëndet miratimin e ndryshimeve në Ligjin për Specialen dhe zgjedhjen e presidentes

    Partia Demokratike e Kosovës ka përshëndetur miratimin e ndryshimeve në Ligjin për Dhomat e Specializuara, si dhe zgjedhjen e presidentes së re të Republikës së Kosovës.

    Përmes një deklarate, PDK-ja ka thënë se me këto dy vendime Kuvendi i Kosovës ka përmbushur dy kërkesat për të cilat kjo parti kishte insistuar gjatë ditëve të fundit.

    “Me vendimet e sotme, Kuvendi i Kosovës ka përmbushur dy kërkesat për të cilat Partia Demokratike e Kosovës ka insistuar gjatë ditëve të fundit: miratimin e ndryshimeve në Ligjin për Dhomat e Specializuara dhe zgjedhjen e Presidentit të Republikës”, thuhet në deklaratë.

    Sipas PDK-së, këto vendime kanë shmangur një krizë të re institucionale dhe kanë mundësuar funksionimin e plotë të institucioneve të Kosovës.

    “Kosova ka nevojë për institucione stabile, funksionale dhe të përgjegjshme”, ka theksuar kjo parti.

    PDK-ja ka përmendur edhe ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, të cilët po përballen me procesin gjyqësor në Dhomat e Specializuara të Kosovës në Hagë.

    “Për institucione të tilla kanë nevojë edhe Hashim Thaçi, Kadri Veseli, Jakup Krasniqi, Rexhep Selimi dhe bashkëluftëtarët e tyre, në përpjekjen për drejtësi dhe për mbrojtjen e së vërtetës së luftës çlirimtare të Kosovës”, thuhet në deklaratën e PDK-së.

    Partia Demokratike e Kosovës ka falënderuar deputetët që mbështetën ndryshimet në Ligjin për Dhomat e Specializuara.

    Një falënderim të veçantë, PDK-ja ua ka adresuar edhe mijëra qytetarëve që, për disa net me radhë, protestuan në Prishtinë duke kërkuar miratimin e këtyre ndryshimeve.

    “Zëri dhe këmbëngulja e tyre ishin pjesë e rëndësishme e këtij procesi”, thuhet në deklaratë.

    Në fund, PDK-ja ka vlerësuar se pas vendimeve të sotme, Kosova i ka institucionet e saj të konstituuara dhe funksionale.

    “Tani është koha për punë, përgjegjësi dhe përkushtim ndaj interesave të Republikës së Kosovës dhe qytetarëve të saj”, ka përfunduar deklarata./Telegrafi.

  • ​Çlirim Haziri pas miratimit të ndryshimeve të Ligjit për Specialen: Fitorja është e madhe

    ​Çlirim Haziri pas miratimit të ndryshimeve të Ligjit për Specialen: Fitorja është e madhe

    ​Çlirim Haziri pas miratimit të ndryshimeve të Ligjit për Specialen: Fitorja është e madhe

    Organizatori i protestave në mbështetje të ish-krerëve të Ushtrisë Çlirimtare të Kosovës që po gjykohen në Hagë, Çlirim Haziri, e ka cilësuar votimin e Ligjit për Mbrojtjen e Vlerave të UÇK-së si një fitore të protestuesve që për 21 ditë kanë qëndruar në sheshet e Prishtinës.

    Në fjalimin e mbajtur pas votimit, Haziri tha se miratimi i ligjit nuk duhet parë si fundi i protestës dhe angazhimit qytetar, por si një hap në kauzën që protestuesit kanë mbështetur gjatë tri javëve të fundit.

    “Fitorja e sonte është e madhe, por ky është vetëm fillimi i angazhimit tonë të pandalshëm qytetar në mbrojtje të Republikës”, tha Haziri para protestuesve, raporton Kosovapress.

    Ai pretendoi se presioni i vazhdueshëm i qytetarëve ishte vendimtar për votimin e ligjit në Kuvend.

    “Ky ligj nuk na u fal. Ky ligj nuk kaloi nga dëshira e atyre aty brenda. Ky ligj u fitua këtu jashtë. U fitua nga ju”, deklaroi Haziri.

    Organizatori i protestave kritikoi mënyrën se si politika e trajtoi çështjen gjatë ditëve të fundit, duke thënë se protestuesit kishin parë “luhatje” dhe “kalkulime” përpara votimit.

    Sipas tij, qytetarët nuk do të duhej të protestonin për 21 ditë që institucionet të merrnin një vendim që ai e konsideron detyrim ndaj trashëgimisë së UÇK-së.

    Haziri megjithatë u kërkoi protestuesve që të mos e paraqesin votimin si një arritje përfundimtare.

    “Ky votim sonte nuk është asnjë mrekulli. Ai është thjesht një borxh i vonuar, një detyrim minimal që ky shtet e kishte ndaj atyre që i dhanë jetën”, tha ai.

    Në pjesën më emocionale të fjalimit, Haziri përmendi Adem dhe Hamëz Jasharin, Zahir Pajazitin dhe Fehmi Lladrovcin, duke thënë se miratimi i një ligji në Kuvend nuk e përfundon atë që protestuesit e konsiderojnë përgjegjësi institucionale ndaj luftës së UÇK-së.

    Ai e lidhi vazhdimin e protestave edhe me proceset gjyqësore në Hagë, ku po gjykohen ish drejtues të UÇK-së.

    “Mendja dhe zemra jonë mbeten atje, në Hagë”, tha Haziri.

    Ai paralajmëroi se organizatorët do të vazhdojnë angazhimin edhe për sigurimin e fondeve dhe zbatimin e plotë të ligjit nga institucionet e Kosovës.

    “Ne do të jemi këtu derisa pafajësia e krerëve tanë të vërtetohet plotësisht”, deklaroi Haziri, duke shtuar se protestuesit do të vazhdojnë të mblidhen në sheshet e Prishtinës.

    Fjalimin ai e përmbylli duke falënderuar qytetarët për pjesëmarrjen gjatë 21 ditëve të protestave dhe me thirrjen: “Rroftë Ushtria Çlirimtare e Kosovës”.