Vrasja e Arlinda Zekajt në Vitomiricë të Pejës ka tronditur opinionin publik, ndërsa reagime të shumta kanë ardhur edhe nga artistët shqiptarë, të cilët kanë shprehur dhimbjen dhe indinjatën për tragjedinë.
Rina Balaj, Brikena Selmani, Oriola Marashi, Yll Limani Adelina Thaçi e shumë të tjerë kanë reaguar përmes rrjeteve sociale, duke rikthyer në vëmendje faktin se Arlinda kishte kërkuar ndihmë dhe kishte paralajmëruar institucionet për rrezikun që i kanosej, vetëm pak ditë para se të vritej.
Rina Balaj e ka cilësuar ngjarjen si një lajm që të copëton shpirtin, duke theksuar se Arlinda kishte denoncuar dhunën, kishte kërkuar mbrojtje dhe kishte shprehur frikën për jetën e saj.
Këngëtarja ka ngritur pikëpyetje se sa gra të tjera duhet të humbin jetën që thirrjet e tyre për ndihmë të merren seriozisht, duke kërkuar drejtësi për të ndjerën.
Edhe Brikena Selmani është shprehur e tronditur nga rasti, duke vënë në pikëpyetje mënyrën se si një grua mund të kërkojë ndihmë në polici dhe vetëm tri ditë më vonë të humbasë jetën.
Ndërkaq, modelja Oriola Marashi ka bërë thirrje që vrasjet e grave të mos trajtohen si lajme që harrohen pas 24 orësh, duke nënvizuar rëndësinë që këto raste të mos humbasin vëmendjen publike.
Reagim ka bërë edhe Yll Limani, i cili ka rikujtuar se Arlinda ishte raportuar në polici për dhunë në familje dhe kishte kërkuar ndihmë para se të vritej.
Adelina Thaçi, në mesazhin e saj prekës, i ka shprehur lamtumirën Arlindës, duke kërkuar falje për faktin se shteti, që duhej ta mbronte, nuk arriti ta ruante. Ajo ka theksuar se drejtësia për të ndjerën mbetet një borxh.
Rasti i Arlinda Zekajt ka rikthyer në qendër të debatit publik mbrojtjen e grave që përballen me dhunën në familje dhe përgjegjësinë e institucioneve për të reaguar në kohë.
Krahas dhimbjes dhe zemërimit, kërkesa që bashkon reagimet është që vdekja e saj të mos mbetet vetëm një tjetër ngjarje tragjike, por të pasohet nga drejtësia dhe llogaridhënia. /Telegrafi/
Rina Balaj
Brikena Selmani
Yll Limani
Yll Limani
Adelina Thaçi